ភ្នំពេញ : ស្ថិតលើវិថីលេខ២១៤ កែងនឹងផ្លូវលេខ៥៥ ភោជនីយដ្ឋានជ្រកក្រោមស្លាកយីហោ Crepe Mania មានការរចនាបែបសាមញ្ញ ស្របទៅនឹងទស្សនវិស័យនៃការធ្វើអាជីវកម្មម្ហូបអាហាររបស់ខ្លួនផង ដែរ។
អាហារដ្ឋាននេះ Crepe Mania មានផ្ដល់នូវជម្រើសអាហារប្រពៃណីបារាំងបែប Crepe ជាច្រើនប្រភេទ និងមានរសជាតិប្រៃ ឬផ្អែមទៅតាមប្រភេទរបស់វា។ នំក្រែបត្រូវបានគេចម្អិនដោយចាក់ម្សៅនៅលើខ្ទះក្ដៅ ឬបន្ទះលោហៈរាបស្មើ ដោយមានប៊័រនៅលើនោះ។ ម្សៅត្រូវបានគេផ្អៀងខ្ទះពង្រាបឲ្យស្ដើង និងរាបស្មើដូចការចាក់បាញ់ឆែវដែរ។ ក្រែបត្រូវបានគេចម្អិនដោយមានជម្រើសស្នូលជាច្រើន មិនថាស្នូលផ្អែម ឬប្រៃទេ។
ថ្ងៃនេះភ្នំពេញប៉ុស្ដិ៍នឹងបង្ហាញ ជូនវិធីចម្អិនក្រែប ឬផេនខេកទឹកឃ្មុំ ដែលផ្សំឡើងពីគ្រឿងផ្សំរួមមាន ម្សៅមី ពងមាន់ ទឹកដោះគោឆៅ ប៊័រ ទឹកឃ្មុំ និងស្រា។
វិធីចម្អិនដំបូងត្រូវយកប៊័រទៅកម្ដៅរំលាយវា រួចយកម្សៅមីវាយចូលជាមួយពងមាន់ ទឹកដោះគោឆៅ និងប៊័រដែលរំលាយរួច។ វាយល្បាយខាងលើឲ្យសព្វ រួចចៀនវាលើខ្ទះ។ ក្រោយពីចៀនឆ្អិន យើងត្រូវដួសដាក់ចាន ដោយស្រូបទឹកឃ្មុំពីលើ រួចចាក់ស្រាពីលើដើម្បីអុជភ្លើងឲ្យឆេះបន្ថែមរសជាតិឲ្យកាន់តែ ឆ្ងាញ់។
អ្នកក៏អាចមានជម្រើសទទួលទាននំផេនខេក នេះជាមួយនឹងផ្លែឈើនានាដូចជា ចេក ម្នាស់ ផ្លែប៉ោម ក្រូចឆ្មារ និងស្ករស ជាដើមតាមចំណូលចិត្ត។
ហាង Crepe Mania ស្ថិតនៅផ្ទះលេខ៣៨ ផ្លូវ២១៤កែងផ្លូវ៥៥ និងបើកបម្រើពីម៉ោង៨ព្រឹកដល់៧យប់ ទូរស័ព្ទលេខ ០១២ ៥៣៣ ០១៩៕
