ក្រុងបាងកក : អង្គុយជិតមាត់សមុទ្រស្រូបយកខ្យល់អាកាសពេលល្ងាចជាមួយនឹងការគយគន់ព្រះទិនកររៀបអស្ដង្គត នៅឆ្នេរសមុទ្រដែលមានទូកតូចធំចតត្រៀបត្រានិងកូនកោះមួយដុះពីមុខផងនោះ បណ្ដាភ្ញៀវទាំងឡាយរបស់ភោជនីយដ្ឋាន ម៉ារីណាវីឡា (Marinavilla) ហាក់ទទួលនូវអារម្មណ៍ស្រស់ស្រាយ ជាមួយនឹងក្ដីរំពឹងថាបានឆ្ងាញ់មាត់នឹងអាហារសមុទ្រស្រស់ៗ។
ក្រោយពីគយគន់ទេសភាពហើយមួយសន្ទុះក្លិនម្ហូបគ្រឿងសមុទ្របានភាយចេញពីចង្ក្រានរបស់ភោជនីយដ្ឋានម៉ារីណាវីឡា ស្ថិតក្នុងក្រុងក្រាប៊ី ប្រទេសថៃ។ហាងនេះតុបតែងបែបសាមញ្ញជាមួយការលាបពណ៌ផ្ទៃមេឃជាមួយនឹងកៅអីពណ៌សនិងអំពូលភ្លើងភ្លឺស្រទន់តិច។
អង្គុយបានមួយសន្ទុះបុគ្គលិកហាងយ៉ាងស្រស់ស្អាតស្លៀកសំពត់ខ្លីនិងអាវយឺតបែបទង់ជាតិអាមេរិកបានកាន់បញ្ជីរាយនាមមុខម្ហូប ដោយពេលនោះខ្ញុំបានកុម៉្មង់ត្រីចំហុយម្ទេសសម្លការីខៀវគ្រឿងសមុទ្រ ញ៉ាំស្វាយពងសត្វប្រឡាំងកាសបុកល្ហុងបង្គាស្រស់និងម្ហូបពិសេសដ៏ពេញនិយមនៅទីនោះបំផុតគឺ«បង្គាបំពងទឹកអំពិលទុំ»។
បង្គាបំពងទឹកអំពិលទុំគឺជាមុខម្ហូបបែបថៃដែលមានរសជាតិឆ្ងាញ់ប្លែកមាត់មែនហើយវាក៏ងាយស្រួលចម្អិនថែមទៀតផង។
គ្រឿងគ្រៅរបស់វារួមមានបង្គាស្រស់ធំៗទឹកអំពិលសាលាដ ត្រសក់ការ៉ុតម្សៅបំពង ស្ករសអំបិលនិងគ្រឿងស៊ុប។ ចំណែករបៀបធ្វើវិញគឺមុនដំបូងត្រូវយកបង្គាទៅលាងទឹកបេះសម្បកឲ្យស្អាតរួចជ្រលក់ជាមួយម្សៅបំពង។ បន្ទាប់មកត្រូវយកអំពិលទៅត្រាំទឹកឲ្យចេញជាតិឲ្យអស់បន្ទាប់មកចាក់ចូលខ្ទះឆាជាមួយអំបិល ស្ករ និងម្សៅស៊ុប។ នៅពេលដែលឆ្អិន ស្រង់បង្គាបំពងដាក់ចានជាមួយសាលាដ ត្រសក់ការ៉ុតរួចសឹមស្រោចទឹកអំពិលចូលជាការស្រេច៕
