The Phnom Penh Post Search

Search form




Logo of Phnom Penh Post newspaper Phnom Penh Post - បង្អែម​គ្រាប់​កកោះ​ស្អិត​ល្មួត​មាន​តែ​មួយ​គត់​នៅ​ភោជ​នីយ​ដ្ឋាន​វ័នម័រ




បង្អែម​គ្រាប់​កកោះ​ស្អិត​ល្មួត​មាន​តែ​មួយ​គត់​នៅ​ភោជ​នីយ​ដ្ឋាន​វ័នម័រ

Content image - Phnom Penh Post
បង្អែម​គ្រាប់​កកោះ​លាយ​អង្ករ​ដំណើប​ និងទឹក​ខ្ទិះ​ផ្អែម​ឈ្ងុយ។ ឈឹម ស្រីនាង

បង្អែម​គ្រាប់​កកោះ​ស្អិត​ល្មួត​មាន​តែ​មួយ​គត់​នៅ​ភោជ​នីយ​ដ្ឋាន​វ័នម័រ

ភ្នំពេញ: ជា​ឈ្មោះ​ឈើ​​មួយ​ប្រភេទ មាន​ខ្លឹមពណ៌​ក្រមៅ ប្រើ​ការធ្វើ​សសរ​ផ្ទះ ក្តារ​ក្រាល ឬក្តារ​ងឿ គ្រាប់​របស់​រុក្ខជាតិ​ដើម​កកោះ​មិនសូវ​មាន​មនុស្ស​ច្រើន​ឡើយ​ដែល​ដឹងពី​វិធី​ចម្អិន​វា។

ជាទូទៅ​ប្រជាជន​រស់នៅ​ក្បែរ​តំបន់​ព្រៃភ្នំ ឬ​អ្នកដែល​មាន​វ័យ​ចំណាស់​ធ្លាប់ឆ្លង​កាត់​ជីវភាព​បែប​ជនបទ​កាលពី​កុមារ​ភាព​ ទំនង​ជាធ្លាប់​ភ្លក្ស​រសជាតិ​គ្រាប់​កកោះ​នេះ។

គ្រាប់​កកោះ​ខ្ចី​ដែលគេ​អាច​បេះចេញ​ពី​ដើម​របស់​វានោះ អាច​ត្រូវ​បានគេ​ចម្អិន​ដោយស្ងោរ ឬចំហុយ ដើម្បី​ទទួល​ទាន​ជា​អាហារ​សម្រន់ មាន​រសជាតិ​ស្រដៀង​នឹង​គ្រាប់​ខ្នុរ​ដែរ។រីឯគ្រាប់​កកោះ​ទុំដែល​ជ្រុះពី​ដើម គេអាច​រើស​យកមក​លីង ឬ​ដុត​ ទុក​គ្រាន់ខាំ​កកេរ​ ជា​ពិសេស​គឺកុមារ​នៅស្រុក​ស្រែ​ដែល​មិនសូវ​សម្បូរ​ចំណី​ចំណុក​ច្រើនមុខ​ដូច​ក្មេង​នៅ​ទីក្រុង។​

ទោះបី​ជា​យ៉ាង​ណាក្ដី កម្រ​មាន​អ្នក​ណា​យក​គ្រាប់កកោះ​មក​ចម្អិនជា​បង្អែម​មាន​រូបមន្ត​ផ្សំ​ត្រឹមត្រូវ​នោះទេ។

នៅ​ភោជនីយ​ដ្ឋាន​វ័នម័រ ស្ថិត​នៅម្ដុំ​ទួលគោក បង្អែម​គ្រាប់​កកោះ ដែល​មានប្រភព​ពី​ទឹកដី​ខេត្ត​បាត់ដំបង ត្រូវ​បាន​ចាត់ទុក​ថា ជា​អាហារ​លាង​មាត់​ពិសេស​ប្រចាំ​ហាង​តែម្ដង។

គ្រាប់​កកោះ​ឆ្អិន​ពណ៌​ត្នោតដ៏​រលើប​រលោងមាន​សាច់ស្អិត​ល្មួត​លាយ​ជាមួយ​អង្ករ​ដំណើប​ទន់​ និងទឹក​ខ្ទិះដូង​ខាប់ឈ្ងុយ​រសជាតិ​ផ្អែម​ល្មម។

បង្អែម​កកោះ​ដែល​សឹង​តែពុំ​មានលក់​នៅ​ហាងអាហារ​ណា​ផ្សេង​ទៀត​នោះ នៅ​ភោជនីយ​ដ្ឋាន​វ័នម័រ មួយ​ចាន​មាន​តម្លៃ ២,៥ ដុល្លារ​ និង​អាចញ៉ាំ​បាន​គ្នាពីរ​នាក់៕

អត្ថបទគួរចាប់អារម្មណ៍