ភ្នំពេញ : ភោជនីយដ្ឋាន Rambutan ដែលមានបរិយាកាសត្រជាក់ល្ហឹមអមដោយអាងទឹកពណ៌ខៀវថ្លាឆ្វង់នោះ ពោរពេញដោយភាពច្នៃប្រឌិតខាងបង្កើតអាហារដែលប្រើគ្រឿងផ្សំបែប ខ្មែរឲ្យទៅជាមុខម្ហូបថ្មីយ៉ាងឆ្ងាញ់ប្លែក។
កន្លងមកយើង ធ្លាប់នាំលោកអ្នកទៅភោជនីយដ្ឋាននេះដើម្បីភ្លក្ស «ទឹកគ្រឿងក្ដាមស្រែបន្លែស្រស់» ដែលមានផ្កាស្នោ និងផ្សិតម្ជុល ក៏ដូចជាមុខម្ហូប «ត្រីក្រហមដុតគ្រឿង» ដែលជាប់ចំណាត់ថ្នាក់លេខ២ពីកម្មវិធីប្រកួតធ្វើម្ហូប នៅសណ្ឋាគារសូហ្វីតែល រាជធានីភ្នំពេញ។ ដោយឡែកថ្ងៃនេះយើងខ្ញុំនឹងនាំលោកអ្នកទៅភ្លក្សអាហារលាងមាត់វិញ ម្ដង នោះគឺ«បង្អែមផ្លែត្នោត» ដ៏ពិសេសម៉្យាង។
គ្រឿងផ្សំ របស់បង្អែមនេះរួមមាន គ្រាប់ត្នោត ទឹកអំពៅ cinnamon stick ទឹកស្ករត្នោត និងខ្ទិះដូង។ វិធីចម្អិនគឺដំបូងត្រូវយកគ្រាប់ត្នោតចិតជាដុំតូចៗរួចទុកមួយ អន្លើសិន។ យកចំណិតផ្លែត្នោតនោះទៅចម្អិនជាមួយស្ករត្នោតឲ្យឡើងក្រហមដូចជា ត្នោតឆឹង រួចទុកវាដោយឡែក។ បន្ទាប់មក ទឹកអំពៅត្រូវយកលាយជាមួយខ្ទិះដូងរម្ងាស់លើភ្លើងឲ្យឡើងឈ្ងុយ មុននឹងដាក់ចម្អិតផ្នែកត្នោតដែលឆឹងរួចចូល រួចបន្ថែមដុំ cinnamon stick ដើម្បីឲ្យវាមានក្លិនឈ្ងុយនោះជាការស្រេច។
ចង់ដឹងថា បង្អែមផ្លែត្នោតមានរសជាតិបែបណានោះ លោកអ្នកអាចអញ្ជើញទៅភ្លក្សផ្ទាល់នៅភោជនីយដ្ឋាន Rambutan ស្ថិតនៅផ្ទះលេខ២៩ ផ្លូវលេខ៧១ សង្កាត់បឹងកេងកង១។ ទាក់ទងទូរស័ព្ទលេខ ០១៧ ៩៩២២៤០ និង ០១២ ៩២៩៣២៨ ទំនាក់ទំនងអ៊ីមែល bookings@rambutanresort.com និងវេបសាយ www.rambutanresort.com៕
