.jpg)
បន្លែត្រូវបានបង់ភ្លាមៗ មុននឹងដួសដាក់ចាន ដើម្បីរក្សាភាពស្រស់ និងរសជាតិឆ្ងាញ់។ ហុង មិនា
បាត់ដំបង៖ ផ្សំឡើងពីបន្លែចម្រុះពណ៌ ដូចជា បៃតង លឿង ស និងខ្មៅ ស្ទើរតែមួយកញ្ច្រែងប្រជុំគ្នាក្នុងចានតែមួយ បបរផិ ជាអាហារប្រពៃណីដ៏ពេញនិយមមួយប្រភេទរបស់អ្នកស្រុកបាត់ដំបង ដែលជារូបមន្ដចម្អិនតជំនាន់ ហើយល្បីល្អចំពោះសុខភាពរាងកាយ។
ស្រដៀងនឹងក្លិនសម្លប្រហើរ បបរផិ មានគ្រាប់អង្ករឆ្អិន និងទឹកស៊ុបឈ្ងុយប្រហើរ ជាទីពេញនិយមរបស់អ្នកខេត្តបាត់ដំបង ពិសាស្ទើរតែរៀងរាល់ថ្ងៃ ដោយវាមិនត្រឹមតែឆ្ងាញ់នោះទេ ថែមទាំងល្បីជំនួយដល់សុខភាព និងជួយថែរាងបានទៀតផង។
ស្ថិតនៅហាង បបរផិ បាត់ដំបង ទល់មុខអគារសាលាក្រុង ស្រ្តីវ័យជាង ៥០ ឆ្នាំ កំពុងមមាញឹកកូរបបរនៅក្នុងឆ្នាំងធំយ៉ាងញាប់ដៃ រូតរះដួសបំពេញចានគោម ត្រៀមលើកឲ្យភ្ញៀវអង្គុយពេញហាង រង់ចាំភ្លក្សរសជាតិបបរដ៏សម្បូរជីវជាតិនេះ។
កញ្ញា គិត ចរណៃ ជាម្ចាស់ហាង បបរផិអ្នកបាត់ដំបងបានប្រាប់មក ភ្នំពេញ ប៉ុស្តិ៍ ថា៖ «ចំពោះភ្ញៀវប្រចាំវិញ គាត់មកពិសាស្ទើរតែរាល់ថ្ងៃ ហើយកម្ម៉ង់បបរផិរាល់ថ្ងៃដែរ។ ឧទាហរណ៍ថា គាត់មានគ្នា ៣ នាក់ ក្នុងមួយតុយ៉ាងតិចណាស់ គឺត្រូវមានបបរ ២ ចានដែរ»។
បបរផិ បន្លែស្លឹកបៃតង ថែមសាច់ខ្យង និងពងត្រី ក្ដៅហុយៗសម្បូរដោយជីវជាតិ។ហុង មិនា
បបរផិ មានបន្លែជាច្រើនមុខរួមគ្នាដូចជាផ្សិតម្ជុល ផ្សិតចំបើង ផ្សិតអំបោះ ផ្សិតភ្លៅមាន់ ស្លឹកផ្ទី ស្លឹកបាស ស្អំ ស្នៀតពោត ពោតក្រហម ននោង ល្ពៅ និងសាច់ត្រី ចានតូចមានតម្លៃ ៤ ០០០៛ ចានធំ ៥ ០០០៛ ព្រមទាំងបបរផិពិសេសបបរឌុបតម្លៃ ៧ ០០០៛ បើសិនជាបន្ថែមសាច់ខ្យង ក្បាលត្រី និងពងត្រីតម្លៃកើនឡើងទៅតាមទំហំចាន។
បបរផិ ត្រូវតែមានសីតុណ្ហភាពក្តៅ និងបន្លែផ្សំទាំងអស់ស្រស់ៗ ដែលស្រុសនៅក្នុងឆ្នាំងផ្សេងពីបបរ លើកលែងតែល្ពៅប៉ុណ្ណោះ ដែលត្រូវចម្អិនជាមួយអង្ករ។
ម្ចាស់ហាង បបរផិ រូបនេះបានបន្ថែមទៀតថា៖ «ដំបូងដាំទឹក ដាក់គ្រឿងកិន ដាក់អំបិល ស្ករ ប៊ីចេង ប្រហុកហើយរំងាស់វា។ បើសិនជាខ្ញុំអ្នកចម្អិន ខ្ញុំដាក់ដាំទឹកផ្សេង និងដាំអង្ករផ្សេងដល់ពេលឆ្អិនហើយ ភ្ញៀវមកកុម្ម៉ង់ញ៉ាំ ទើបធ្វើម្តងមួយចានជូនគាត់»។
បបរផិ ដែលប្រជាជនតាមតំបន់ខ្លះហៅថា បបរប្រូង ពុំសូវមានលក់ហូរហែ ដូចបបរគ្រឿងទូទៅ សាច់ត្រី សាច់ជ្រូក សាច់មាន់ និងគ្រឿងសមុទ្រនោះឡើយ។
ហាង បបរផិ បាត់ដំបង មានភ្ញៀវពេញៗតុ ដែលភាគច្រើនមកញ៉ាំបបរនេះតែម្ដង។ ហុង មិនា
ប្រជាជនវ័យចំណាស់ គ្រាន់តែឮឈ្មោះបបរនេះភ្លាម ធ្វើឲ្យពួកគាត់រឭកដល់អតីតកាល ដែលប្រជាជនបេះបោចបន្លែ ធាងត្រាវ និងស្លឹករុក្ខជាតិនានា មកបំពេញជីវជាតិក្នុងបបររាវ ក្នុងសម័យខ្មែរក្រហម។ ចាស់ៗខ្លះទៀតក៏បានលើកឡើងថា បបរផិ ឬបបរប្រូងនេះ មានប្រវត្តិយូរលង់មកហើយ ដោយពួកគាត់ធ្លាប់ទទួលទានតាំងពីមុនរបបអាវខ្មៅទៅទៀត។
រីឯជនជាតិភាគតិចព្នង និងទំពួន ក៏មានម្ហូបឈ្មោះ ប្រូង ជាអាហារប្រពៃណី ដែលគេចម្អិនក្នុងបំពង់ឫស្សី ដោយផ្សំគ្រឿងពីបន្លែចម្រុះ និងស្លឹករុក្ខជាតិជាច្រើនមុខផងដែរ។
លោក ណាច ណប់ អ្នកសម្របសម្រួលសហគមន៍អេកូទេសចរណ៍អណ្ដូងក្រឡឹង នៅខេត្តមណ្ឌលគិរី បានប្រាប់ ភ្នំពេញ ប៉ុស្ដិ៍ ឲ្យដឹងថា៖ «បបរប្រូង មានប្រភពមកពីសម្លប្រូងរបស់ជនជាតិព្នងយើង»។
អ្នកសម្របសម្រួលវ័យ ៣២ ឆ្នាំរូបនេះ បានបន្តទៀតថា៖ «ចាស់ៗជំនាន់ដើម ក្រៅពីបន្លែជាច្រើនមុខនោះ គាត់ក៏មានថែមសាច់ក្រៀម ដូចជាសាច់គោ ក្របី និងស្បែកក្របីឆ្អើរ ដើម្បីឲ្យរសជាតិកាន់តែឆ្ងាញ់»។
ដោយឡែកម្ចាស់ហាង បបរផិ បាត់ដំបង ដែលជាក្មេងស្រករក្រោយ កញ្ញាមិនបានដឹងពីប្រវត្តិនៃបបរនេះទេ។
ម្ចាស់ហាងវ័យ ៣០ ឆ្នាំ រូបនេះបាននិយាយថា៖ «ដឹងត្រឹមតែថា គេចូលចិត្តធ្វើញ៉ាំនៅតាមផ្ទះធម្មតា វាដូចជាសម្លប្រហើរអ៊ីចឹងគ្រាន់តែបន្ថែមអង្ករឲ្យក្លាយជាបបរផិហ្នឹង ហើយគេចូលចិត្តញ៉ាំណាស់ អ៊ីចឹងខ្ញុំក៏សាកធ្វើលក់ទៅ ឃើញថាលក់ដាច់ពិតមែន អ៊ីចឹងពួកខ្ញុំក៏ធ្វើលក់បន្តរហូតមកដល់សព្វថ្ងៃនេះទៅ ហើយបបរផិនេះក៏ជាអាហារប្រចាំខេត្តបាត់ដំបងដែរ ព្រោះថាអ្នកនៅបាត់ដំបងគេស្គាល់បបរនេះទាំងអស់»។
យ៉ាងណាមិញ កញ្ញា គិត ចរណៃ បានធីបចោលបន្លែ ២ មុខ ដោយមូលហេតុជំនឿលើសុខភាព និងចំណូលចិត្តផ្ទាល់ខ្លួន។
ម្ចាស់ហាងបបរផិ ដំបង បានលើកហេតុផលថា៖ «ទំពាំងវាឆ្ងាញ់មែន ប៉ុន្តែវាអាចប៉ះពាល់ដល់អ្នកញ៉ាំ ជាពិសេសអ្នកមានជំងឺ។ សូម្បីតែអ្នកមិនមានជំងឺក៏ស្ទើរតែមិនអាចញ៉ាំបានផង។ វាអាចមានបញ្ហាសុខភាពចំពោះភ្ញៀវ។ ហើយបើត្រាវវិញ និយាយឲ្យចំខ្ញុំជាម្ចាស់ហាងផ្ទាល់ គឺមិនចូលចិត្តទើបខ្ញុំមិនដាក់ចូល»។
ហាងបបរផិ អ្នកបាត់ដំបង ក៏បម្រើអាហារសម្រន់ដ៏ពេញនិយម រួមមាន ខ្យងឆា ៧ ៥០០៛ បុកល្ហុងក្តាម បុកល្ហុងបង្គារ បុកល្ហុងងាវតម្លៃ ១២ ០០០៛ និងមុខម្ហូបជាច្រើនមុខទៀតផងដែរ។
បបរផិ បាត់ដំបង មានទីតាំងស្ថិតនៅផ្លូវលេខ ៣ ទល់មុខសាលាក្រុងបាត់ដំបង។ ទូរស័ព្ទលេខ ០៩៣ ៦៩២ ១៦៨ និង ០៨១ ៦៦៦៦ ៣០៕
