សៀមរាប : បន្ទាប់ពីនឿយហត់ក្រោយពីឡើងចុះប្រាសាទបាខែងរួច ភ្ញៀវទេសចរជាច្រើនមានអារម្មណ៍ចង់ផ្សើមបំពង់កជាមួយនឹងភេសជ្ជៈត្រជាក់ៗ ហើយខ្លះទៀតក៏កូរពោះចង់ញ៉ាំអាហារសម្រន់ដែរ។
ក្រឡេកមើលទៅចំហៀងប្រាសាទតូបតូចៗពីរបីមានលក់ស្លាបមាន់អាំង សាច់គោអំាង និងបបរគ្រឿងដែលឈរចាំទទួលភ្ញៀវ។ ក្លិនឈ្ងុយនៃបបរ សាច់មាន់ស្ងោរក្តៅៗ និងចាខ្វៃមិនត្រឹមតែទាក់ទាញភ្ញៀវក្នុងស្រុកឲ្យចោមរោមចាំញ៉ាំទេ សូម្បីតែភ្ញៀវចិន ថៃ ឡាវ ក៏នំាគ្នាភ្លក្សដែរ។
បបរមាន់នៅទីនេះមានរសជាតិល្មមឆ្ងាញ់ដោយមិនចំាបាច់បន្ថែម គ្រឿងអ្វីទៀត។ បបរមាន់សភាពមិនរាវមិនខាប់លាយជាមួយសាច់មាន់ហែកជាសរសៃស្តើងៗ គ្រឿងក្នុងមាន់ដូចជា កន្សោមពងមាន់ កោះ និងថ្លើម ដែលចម្អិនយ៉ាងឆ្អិនល្អ។ បបរមួយចានមានតម្លៃ៦ពាន់រៀល។ នារដូវចូលឆ្នាំថ្មីច្បាស់ជាមានមនុស្សម្នាតម្រង់ជួរមុខតូបបបរ ជាមិនខាន៕
