ក្រុងសៀមរាប: ដោយផ្ដោតលើគុណភាពសាច់ក្រួចស្រស់ៗ ដែលត្រូវបានចិញ្ចឹមក្នុងស្រុក ជាពិសេសនៅខេត្ដសៀមរាបផ្ទាល់ និងពូជអង្ករបែកខ្ទិះទឹកស្អិតល្អ បបរក្រួចចិញ្ច្រាំនៅភោជនីយដ្ឋាន Urban Tree Hut អតីតភោជនីយដ្ឋាន Check-in ភាយក្លិនឈ្ងុយស្ទើរគ្រប់តុអាហារ។
លោក ថាត សុគន្ធារ៉ុង ម្ចាស់ហាង Urban Tree Hut បានឲ្យដឹងថា៖ «ភោជនីយដ្ឋានខ្ញុំយកចិត្ដទុកដាក់ចំពោះការប្រើប្រាស់សាច់ក្រួច ដែលត្រូវតែជាផលិតផលក្នុងស្រុក ពីព្រោះវានៅស្រស់ល្អរួមទាំងការរក្សាទុក និងក្លាស្សេផងដែរ»។
លោកបានឲ្យដឹងទៀតថា៖ «ទិញផលិតផលពីកសិដ្ឋានក្រួចក្នុងស្រុកមិនត្រឹមតែផ្ដល់សាច់ល្អដល់អតិថិជនប៉ុណ្ណោះទេ ប៉ុន្ដែថែមទាំងជួយគាំទ្រដល់សហគមន៍ខ្មែរផងដែរ»។
ក្រៅពីគិតគូរដល់សាច់ក្រួចសម្រាប់បបរ ម្ចាស់ភោជនីយដ្ឋានរូបនេះ ក៏ខ្វល់ខ្វាយពីប្រភេទអង្ករដែលត្រូវយកមកបបរជាមួយនឹងក្រួចថែមទៀតដោយជ្រើសរើសយកតែអង្ករដែលបែកគ្រាប់ខ្ទិះល្អប៉ុណ្ណោះ។
លោកសុគន្ធារ៉ុង បានបន្ដថា៖ «ជាទូទៅ បើសិនយើងមិនជ្រើសរើសបានល្អ អង្ករខ្លះពេលបបរ វាមិនមានគ្រាប់អង្ករស្អិតល្អ និងក្លិនឈ្ងុយទេ»។
លោកបានរៀបរាប់អំពីគ្រឿងផ្សំបបរក្រួចនេះថា វាមានក្រួចពីកសិដ្ឋាននៅខេត្ដសៀមរាបស្រស់ៗ អង្ករ ខ្ញី ផ្សិតស ឬខ្មៅ តែបើបានផ្សិតចំបើងក៏ល្អដែរ ខ្ទឹមបារាំង គល់ខ្ទឹម គល់ជីរវ៉ាន់ស៊ុយ ខ្ទឹមស សណ្ដែកបណ្ដុះ ជីររណារ ក្រូចឆ្មារ ប្រេងល្ង និងដើមខ្ទឹម ព្រមទាំងស្ករអំបិល និងខ្នរ។
ចំពោះការចម្អិន លោកបានប្រាប់ថា វាមិនខុសពីការចម្អិនបបរគ្រឿងទូទៅនោះទេ ដោយការដាំអង្ករឲ្យពុះល្អ រួចដាក់សាច់ក្រួចចូលរហូតដល់ឆ្អិន ទើបបន្ថែមគ្រឿងគ្រៅរសជាតិតាមក្រោយ។
អ្នកដែលចូលចិត្តរសជាតិមុត អាចដាក់ទឹកជ្រលក់ជាទឹកត្រី ឬម្ទេសលីងបន្ដិចសម្រាប់ជ្រលក់សាច់ក្រួច ហើយបន្ថែមសណ្ដែកបណ្ដុះ ជីរវ៉ាន់ស៊ុយ និងក្រូចឆ្មារឲ្យកាន់តែឆ្ងាញ់។
លោកបន្ដថា បបរក្រួចមួយចានធំ តម្លៃ ១២០០០ រៀលស្មើនឹងបរិមាណ ៤ ចានចង្កឹះ អាចទទួលបានគ្នា ២ នាក់។
Urban Tree Hut ស្ថិតនៅក្បែរសាកលវិទ្យាល័យបញ្ញាសាស្ដ្រសៀមរាបមានចម្ងាយប្រមាណជិត ២ គីឡូម៉ែត្រ ពីតំបន់ Pub Street។
ភោជនីយដ្ឋានបើកទ្វារស្វាគមន៍ភ្ញៀវតាំងពីម៉ោង ៦ ព្រឹករហូតដល់កណ្ដាលអាធ្រាត្រ រៀងរាល់ថ្ងៃ ឬតាមទូរស័ព្ទ ០១២ ៥៥ ៥៩ ៥៣៕