ភ្នំពេញ : ស្ថិតនៅផ្លូវលេខ៣៦០ សង្កាត់បឹងកេងកង១ អគារពណ៌សក្បុសដែលហ៊ុមព័ទ្ធដោយរុក្ខជាតិតូចធំគឺជាភោជនីយដ្ឋាន បម្រើអាហារអាស៊ីដ៏សែនមនោរម្យមានឈ្មោះថា «បៃតង»។ ថ្ងៃនេះយើងនឹងលើកយកម្ហូប «បាយក្ដាំងជ្រលក់ទឹកសាច់ជ្រូកចិញ្ច្រាំ» ពីហាងនេះមកបង្ហាញជូនប្រិយមិត្តអ្នកអាន។
គឿងផ្សំ : អង្ករផ្កាម្លិះ សាច់ជ្រូក បង្គាស្រស់ ខ្ទឹមស ខ្ទឹមក្រហម ជីរវ៉ាន់ស៊ុយ ម្ទេស អំបិល ម្សៅស៊ុប ស្ករស ទឹកត្រី អំពិលទុំ និងប្រេងឆា។
របៀបចម្អិន : យកអង្ករផ្កាម្លិះទៅដាំដោយបន្ថយបរិមាណទឹកបន្តិច ដើម្បីឲ្យបាយមានលក្ខណៈស្រួយ។ នៅពេលដែលបាយឆ្អិន ត្រូវយកវាទៅហាលថ្ងៃឲ្យស្ងួតរួចទើបយកទៅបំពងជាមួយប្រេងឆាឲ្យ ឡើងស្រួយ។ បាយដែលបំពងរួចត្រូវតែទទួលទានភ្លាមៗដើម្បីទទួលបានភាពស្រួយ នៅពេលជ្រលក់ជាមួយទឹកសាច់ជ្រូកចិញ្ច្រាំ។
ចំពោះវិធីធ្វើទឹក ជ្រលក់វិញ ដំបូងត្រូវយកសាច់ជ្រូកទៅចិញ្ច្រាំជាមួយសាច់បង្គាស្រស់រួចទុកមួយ អន្លើសិន។ ខ្ទឹមស ខ្ទឹមក្រហម និងជីរវ៉ាន់ស៊ុយត្រូវចិញ្ច្រាំចូលគ្នារួចរំលីងជាមួយប្រេងឆា មុននឹងដាក់សាច់ចិញ្ច្រាំខាងលើចូល។
ចាប់ផ្ដើមដាក់គ្រឿងផ្សំ រសជាតិរួមមាន អំបិល ម្សៅស៊ុប ស្ករស ទឹកត្រី និងទឹកអំពិលទុំចូលហើយរំងាស់មួយសន្ទុះដោយបន្ថែមទឹកបន្តិចជាការ ស្រេច។
ភោជនីយដ្ឋានបៃតង ស្ថិតនៅផ្ទះលេខ៧ ផ្លូវលេខ៣៦០ ទូរស័ព្ទ០២៣៦៣០៣០០៥ និង០៩២៥០០៤០០៕
