ភ្នំពេញ : ស្ថិតនៅចន្លោះផ្លូវសុកហុក និងមហាវិថីព្រះមុនីវង្សនោះគឺជា វិថីឧកញ៉ានូកន ដែលជាបណ្ដុំនៃសមាគមប្រជាជនវៀតណាម។
នៅលើវិថីនេះដែរ ប្លុកក្បែរមន្ទីរពេទ្យ ២១៥ ត្រូវបានចាត់ទុកជាកន្លែងលក់អាហារវៀតណាមតាមចិញ្ចើមថ្នល់ដ៏ល្បីល្បាញ ជាមួយនឹងតម្លៃថោកសមរម្យ។
ជារៀងរាល់ព្រឹក ប្រសិនបើអ្នកធ្វើដំណើរកាត់ទីនោះ អ្នកប្រាកដជាឃើញផ្សែងហុយទ្រលោម ដែលមានមនុស្សម្នាជាច្រើនកំពុងចោមរោមប្រែបន្ទះសាច់ជ្រូក និងភ្លៅសាច់មាន់យ៉ាងរលើបរលោងជាមួយនឹងដង្កៀបដែកធំៗ។
នៅកាច់ជ្រុងខាងជើងមន្ទីរពេទ្យ២១៥នេះ គឺជាកន្លែងលក់អាហារពេលព្រឹកដែលគ្មានឈ្មោះយីហោក៏ពិតមែន ប៉ុន្តែមានភ្ញៀវអង្គុយចាំយ៉ាងរហង់។
ខុសប្លែកពីកន្លែងលក់បាយស្រូបទូទៅ ហាងបាយនេះមានលក់បាយពេលព្រឹកដែលមានចំណិតពងទាចៀនក្រឡុកបួនជ្រុងជាមួយនឹងសរសៃស្បែកជ្រូក ដែលភាសាវៀតណាមហៅថា ប៊ី។
ភ្ញៀវអាចកុម្ម៉ង់បាយសាច់ជ្រូកអាំងឬសាច់មាន់បំពងដោយមានភ្ជាប់មកជាមួយនូវពងទាចៀនក្រឡុករាងបួនជ្រុង និងសរសៃប៊ី ដែលស្រដៀងនឹងសរសៃគុយទាវដែរ។ សម្រាប់អ្នកដែលចូលចិត្តញ៉ាំសាច់នោះពិតជាមិនខុសបំណងឡើយ ព្រោះបាយស្រូបមួយចាននៅទីនេះមានបរិមាណសាច់លើសលប់ច្រើនជាងបាយទៅទៀត។
នៅលើចានបាយដែលមានសាច់ជ្រូក មាន់ ស្បែកជ្រូកប៊ី និងពងទានោះក៏មានស្រូបទឹកខ្លាញ់ខ្ទឹមដ៏រលើបរលោង និងជ្រក់ត្រសក់ត្រកួនផងដែរ ដូច្នេះអ្នកដែលចង់ថែរាង ឬបញ្ចុះទម្ងន់នោះគួរតែកុម្ម៉ង់ដាក់សាច់តិចបានហើយ។ សម្រាប់តម្លៃវិញគឺចាប់ពី៦ពាន់រៀលក្នុង១ចាន៕
