ភ្នំពេញៈ បុកល្ហុងក្តាមប្រៃរៀបដាក់ក្នុងចានពណ៌ឈើអមដោយពងទាប្រៃ ២-៣ ចំណិតរួមជាមួយនំបញ្ចុកមូរជាបីដុំដាក់តម្រៀបគ្នាយ៉ាងរៀបរយជាភាពទាក់ទាញភ្ញៀវឲ្យជាប់ចិត្តនឹងរសជាតិ ហើយចូលមកទទួលទានជាប្រចាំ។
តេងតង់ កង់ទីន ស្ថិតនៅក្នុងសាកលវិទ្យាល័យអិលអេសអាយ (LSI) មានលក់អាហារចម្អិនមានអនាម័យដូចជាបុកល្ហុងបែបថៃ បុកពោត បុកមី ញាំមី ញាំមីសួរ (៥០០០៛) បាញ់ស្រ៊ុង (៤០០០៛) នំប៉័ងដាក់សាច់ (៣០០០៛) និងសាច់អាំងទៀតផង។
កញ្ញា ឈឹម ស្រីនាថ វ័យ ២៣ ឆ្នាំ ជានិស្សិតផ្នែកឌីហ្សាញ និងជាម្ចាស់ហាង បានឲ្យដឹងថា៖ «ដោយសារតែខ្ញុំគឺជាសិស្ស ហើយពិបាកនឹងរកអីញ៉ាំណាស់ ដោយសារតែជួនកាលកន្លែងខ្លះមានតម្លៃខ្ពស់ពេកដែលពួកខ្ញុំជាសិស្សគ្មានលទ្ធភាពនឹងទទួលយក ហើយកន្លែងខ្លះទៀតតម្លៃអាចទទួលយកបានហើយ ប៉ុន្តែខ្វះអនាម័យអ៊ីចឹងហើយទើបខ្ញុំសម្រេចចិត្តបើកហាងនេះឡើង ដើម្បីសម្រួលដល់សិស្សនិស្សិតគ្រប់គ្នាព្រមទាំងអ្នកធ្វើការមួយចំនួនអាចទទួលយកតម្លៃនេះបាន ហើយថែមទាំងមានអនាម័យទៀតផង»។
តេងតង់ កង់ទីន ទើបតែបើកបានរយៈពេលជិត ១ ខែចាប់ពីថ្ងៃទី ១០ ខែមករា ប៉ុន្តែមិនត្រឹមតែមានភ្ញៀវមកពិសាដល់កន្លែងនោះទេថែមទាំងមានការកុម្ម៉ង់តាមគេហដ្ឋានផងដែរដោយគ្រាន់តែអ្នកកុម្ម៉ង់ចេញថ្លៃដឹកជញ្ជូនខ្លួនឯងប៉ុណ្ណោះ។
ម្ចាស់ហាង តេងតង់ កង់ទីន បានបន្តទៀតថា៖ «កង់ទីន ជាកន្លែងដែលគេគិតថា សាមញ្ញ តែពួកយើងបានរៀបចំលក្ខណៈហាងដូចទៅនឹងភោជនីយដ្ឋាន ១ កន្លែងអ៊ីចឹង ហើយចំពោះតម្លៃវិញសមរម្យមែនទែន ដែលអាចឲ្យនិស្សិតក៏ទទួលយកតម្លៃនេះបាន»។
ក្នុង ១ ថ្ងៃ តេងតង់ កង់ទីន ទទួលភ្ញៀវបានចាប់ពី ១៥០ នាក់ឡើងទៅដល់ ២០០ នាក់ដោយពួកគាត់ចូលចិត្តញ៉ាំជាងគេគឺ បុកល្ហុង ព្រោះទាំងរសជាតិ និងការតុបតែងបែបថៃ។ ចុងភៅក៏មកពីប្រទេសថៃដោយនាំមកជាមួយគ្រឿងទេសពីប្រទេសថៃដូចគ្នាដើម្បីរក្សានូវរសជាតិដើម។
គោលដៅសំខាន់របស់ តេងតង់ កង់ទីន គឺអនាម័យខ្ពស់ និងរសជាតិឆ្ងាញ់ ដើម្បីឲ្យសិស្សនិស្សិតក៏ដូចជាអ្នកធ្វើការមិនដែលនៅក្នុងសាលាអិលអេសអាយ មិនបាច់ពិបាកទៅរកកន្លែងទទួលទានពេលថ្ងៃត្រង់ និងពេលល្ងាចឆ្ងាយនោះទេ ថែមទាំងទទួលបានទីតាំងស្អាតរួមជាមួយរបស់ប្រើប្រាស់ស្អាតៗគុណភាពខ្ពស់។
មិនត្រឹមតែជាកន្លែងបម្រើអាហារដល់គ្រូបង្រៀន និងសិស្សខាងក្នុងសាលានោះទេ តេងតង់ កង់ទីន ក៏តែងតែស្វាគមន៍វត្តមានអតិថិជននៅខាងក្រៅ ចូលមកភ្លក្សរសជាតិបុកល្ហុងរសជាតិប្លែកបែបថៃ និងកុម្ម៉ង់អាហារដឹកជញ្ជូនដល់កន្លែងផងដែរ៕
វីដេអូ៖