ភ្នំពេញៈ ស្ថិតនៅផ្លូវលេខ ៤០២ ម្ដុំក្រោយសាលាវ៉ាន់ដា ហាងបុកល្ហុង អ្នកជំនាញយ៉ាងចំណាប់កំពុងដាក់គ្រឿងបុកល្ហុងចូលក្នុងត្បាល់ ខណៈបុគ្គលិកជាច្រើនកំពុងញាប់ដៃបម្រើអតិថិជនដែលរង់ចាំញ៉ាំបុកល្ហុងរសជាតិទឹកកាពិ ឬទឹកប្រហុក។
ថាសពោរពេញទៅដោយបន្លែជាច្រើនមុខមាន សាលាដ ត្រសក់ ការ៉ុត នៅជាយថាស និងមានបុកល្ហុងបុកលាយជាមួយនំបញ្ចុក បង្គាស្រស់នៅចំកណ្តាល បន្ថែមដោយចង្កាក់មឹក បង្គា ក្ដាម និងងាវស្រុសស្ទើរឆ្អិន។
បុកល្ហុងផ្ទះបុរាណមានលក់ដូចជាបុកល្ហុងក្តាមប្រៃ (៥០០០៛) បុកល្ហុងខ្យង បុកល្ហុងជើងមាន់ បុកល្ហុងក្តាមសេះ បុកងាវ បុកល្ហុងប៉ាតេ បុកពោត បុកល្ហុងបង្គា (៨០០០៛) បុកពោតបង្គា (១២០០០៛) និងបុកមី (៦០០០៛)។ សម្រាប់ឈុតធំដែលភ្ញៀវនិយមកុម្ម៉ង់ក្នុង ១ ថ្ងៃជាង ១០០ ឈុត មានដូចជាបុកពោតឈុតគ្រឿងសមុទ្រ បុកល្ហុងឈុតគ្រឿងសមុទ្រ (៣៥០០០៛) បុកល្ហុងក្តាមប្រៃ ឈុតសាច់អាំង (២៥០០០៛) និងបុកល្ហុងតាំប៉ា (២០០០០៛) ព្រមទាំងមានភេសជ្ជៈជាច្រើនមុខថែមទៀតផង។
អ្នកនាង ឃឹម ស៊ីណា វ័យ ៣២ ឆ្នាំមកពីក្រុងប៉ោយប៉ែតជាម្ចាស់ហាងផ្ទះបុកល្ហុងបុរាណបានប្រាប់ ភ្នំពេញ ប៉ុស្ដិ៍ ឲ្យដឹងថា៖ «កាលមុនខ្ញុំគ្រាន់តែជាអ្នកធ្វើការធម្មតាទេ កាលហ្នឹងខ្ញុំពិតជាចង់រកស៊ីណាស់ ប៉ុន្តែលុយមិនគ្រប់ហើយណាមួយគ្មានពេលគ្រប់គ្រាន់ រហូតដល់ខ្ញុំបានរៀបការរួចក៏សម្រេចចិត្តថា រកស៊ី ក្នុងចិត្តគឺដឹងតែលក់បុកល្ហុងហើយ ព្រោះថាខ្ញុំផ្ទាល់ចូលចិត្តញ៉ាំបុកល្ហុងជាងគេ ខ្ញុំបើកហាងនេះដោយមិនធ្លាប់មានបទពិសោធពីមុនមកអ៊ីចឹងហើយខ្ញុំក៏ជួបរឿងលំបាកច្រើនទម្រាំមកដល់ថ្ងៃនេះ»។
ក្រៅពីប្រភេទបុកល្ហុង ផ្ទះបុកល្ហុងបុរាណក៏មានលក់ជាប្រភេទសាច់អាំងអំបិលម្ទេសស្លាបមាន់ កណ្តាលស្លាបមាន់ កង្កែបជាដើម បាយឆា ភ្លាគ្រឿងសមុទ្រ គ្រឿងសមុទ្រអាំងអំបិលម្ទេស មឹក បង្គា រួមទាំងមាននំបញ្ចុកសម្លខ្មែរ និងសម្លការីផងដែរ។
អ្នកនាងបញ្ជាក់ថាក្នុង ១ ថ្ងៃហាងបុកល្ហុងផ្ទះបុរាណទទួលបានភ្ញៀវចាប់ពី ៤០០ ទៅ ៥០០ នាក់ចាប់ពីបើកហាងម៉ោង ២ រសៀលដល់ម៉ោង ១០ យប់។
ម្ចាស់ហាងដ៏រួសរាយរូបនេះក៏បានប្រាប់ពីបំណងថ្ងៃខាងមុខថា៖ «ក្នុងក្តីស្រមៃរបស់ខ្ញុំនៅពេលខាងមុខខ្ញុំចង់ពង្រីកហាងមួយទៀតដែលមានស្តង់ដាជាងនេះ ដែលតម្រូវឲ្យបុគ្គលិកទាំងអស់ស្លៀកពាក់បុរាណនៅសម័យលង្វែក និងរើសយកបុគ្គលិកមានរូបសម្បត្តិសមរម្យឲ្យសមជាមួយឈុតត្រូវស្លៀកដូចគ្នា ប៉ុន្តែទាក់ទងនឹងការចំណាយគឺពិតជាច្រើន ប៉ុន្តែគោលគំនិតមួយនេះខ្ញុំបានគិតយូរហើយ ហើយក៏មិនបោះបង់ដាច់ខាត»៕
វីដេអូ៖