ភ្នំពេញ : គ្រាន់តែចូលដល់ភោជនីយដ្ឋាន Fish & Co ភ្លាម ការរចនាខាងក្នុងបានធ្វើឲ្យខ្ញុំមានអារម្មណ៍ហាក់បីដូចជាបានចូលទៅក្រោមបាតសមុទ្រ។ផ្កាយសមុទ្រ ខ្យងនិងត្រីសមុទ្រធំមួយត្រូវបានព្យួរតាមជញ្ជាំងហាង ដែលមានលាបពណ៌ទឹកសមុទ្រលើពិតាន មើលទៅខៀវស្រងាត់ដូចផ្ទៃសាគរអ៊ីចឹង។
ថ្វីដ្បិតតែយីហោហាងសរសេរ ថា «ត្រី» ក៏ពិតមែន ប៉ុន្តែភោជនីយដ្ឋានល្បីនៅសិង្ហបុរីមួយនេះមានបម្រើនូវជម្រើសគ្រឿងសមុទ្រដទៃទៀតរួមទាំងប្រភេទសាច់ផ្សេងៗជាច្រើន។
សម្រាប់ថ្ងៃនេះ ខ្ញុំបានជ្រើសរើសយកម្ហូបប៊ីស្តឹក ទឹកជ្រលក់បែបជប៉ុនដ៏ល្បីល្បាញឈ្មោះថា ថឺរីយ៉ាគី (Rib-eye Steak with spicy Teriyaki Sauce។ ប៊ីស្តឹកនេះមានរសជាតិបែបអាស៊ីកាត់អឺរ៉ុបធ្វើឲ្យលោកអ្នកញ៉ាំហើយចង់ញ៉ាំទៀតមិនសូវរងាន់។ សូមរីករាយពីវិធីចម្អិនជាមួយខ្ញុំដូចតទៅ ៖
គ្រឿងផ្សំ: សាច់គោអូស្ត្រាលី ការ៉ុត ផ្កាខាត់ណា ស្ពៃតឿ ដំឡូងបារាំង ស្លឹកផាស្លី (parsley) ទឹកដោះគោ ទឹកក្រែម (cream sauce) ទឹកជ្រលក់រសជាតិដើម (original sauce) និងទឹកជ្រលក់រសជាតិបែបជប៉ុន ថឺរីយ៉ាគី (Teriyaki Sauce)។
វិធីធ្វើ : មុនដំបូងត្រូវយកបន្លែការ៉ុត ផ្កាខាត់ណា ស្ពៃតឿ និងដំឡូងបារាំង ទៅកាត់ជាដុំតូចល្មម មុននឹងដាក់ចំហុយដោយលាយអំបិលបន្តិចបន្តួច។ យកដំឡូងបារាំងដែលចំហុយរួចទៅកិនឲ្យម៉ដ្ឋ ដោយប្រើស្លាបព្រាសង្កត់វា។ សាច់គោត្រូវយកទៅលាងទឹកឲ្យស្អាត រួចហាន់ជាបន្ទះប៉ុនបាតដៃ មុននឹងអាំងត្រឡប់ឲ្យឆ្អិនល្មម។ រៀបចំសាច់និងបន្លែ ហើយស្រូបទឹកជ្រលក់រីឯដំឡូងបារាំងម៉ដ្ឋត្រូវសូនឲ្យរាងដូចកូនចាន មុននឹងចាក់ទឹកដោះគោពីលើជាការស្រេច។
ប្រសិនបើលោកអ្នកចង់ភ្លក្សរសជាតិដើមនៃប៊ីស្តឹកនេះ សូមទៅកាន់ភោជនីយដ្ឋាន Fish & Co នៅផ្ទះលេខ១៣៩-១៤១ វិថីស៊ីសុវត្ថិ សង្កាត់វត្តភ្នំ ខណ្ឌដូនពេញ រាជធានីភ្នំពេញ។ ទាក់ទងទូរស័ព្ទលេខ ០២៣ ៩៦៦ ៩៦៩ សម្រាប់ការកក់កន្លែង៕
