ក្រុងហាណូយ៖ ដោយដាក់ឈ្មោះវាថា «កូរ៉ូណាប៊ើហ្គឺរ» នំប៉័ងរាងមូលមានបន្លាពណ៌បៃតងកៀបស្នូលសាច់បន្លែនៅចំកណ្ដាល គឺជាគំនិតច្នៃប្រឌិតថ្មីរបស់ហាង ភីហ្សា និងប៊ើហ្គឺរមួយ ក្នុងក្រុងហាណូយ ដើម្បីទាក់ទាញចំណាប់អារម្មណ៍អតិថិជន និងស្ដារចំណូលពីវិបត្តិសកល បង្កដោយវីរុសកូរ៉ូណា។
ម្ចាស់ហាង និងជាមេចុងភៅ លោក ហ័ង ទុង (Hoang Tung) រំពឹងថា ប៊ើហ្គឺររាងដូចមកុដនេះ មិនត្រឹមតែធ្វើឲ្យអ្នកញ៉ាំឆ្អែតទេ ថែមទាំងឲ្យពួកគេមិនសូវតានតឹងនឹងព័ត៌មាន ២៤ ម៉ោងនៃវីរុសកូរ៉ូណាក្នុងពិភពលោក។
លោក ហ័ង ប្រាប់ AFP ថា៖ «ខ្ញុំឮតែព័ត៌មានអវិជ្ជមាន និងរឿងគួរឲ្យតក់ស្លុតពីវីរុសកូរ៉ូណា ហើយខ្ញុំគិតថា ខ្ញុំគួរតែធ្វើអ្វីមួយឲ្យមនុស្សសប្បាយចិត្តបន្តិច»។
លោកថា៖ «គំនិតធ្វើប៊ើហ្គឺរនេះ បានផុសឡើង ក្រោយពេលខ្ញុំបានមើលរឿងតុក្កតា Toy Story មានតួអង្គពណ៌បៃតងដូចមនុស្សភពផ្កាយ ហើយវាមានអង់តែនលើក្បាល ស្រដៀងនឹងរូបរាងវីរុសកូរ៉ូណា»។
លោក ហ័ង រៀបរាប់ថា៖ «ពេលខ្ញុំច្នៃប៊ើហ្គឺរកូរ៉ូណា ខ្ញុំចង់ផ្ដល់អារម្មណ៍ល្អដល់អ្នកញ៉ាំ កុំឲ្យមានការភិតភ័យក្រោយពីស្ដាប់ព័ត៌មានជំងឺឆ្លងឥតឈប់ឈរ។ ដូច្នេះខ្ញុំសម្រេចចិត្តច្នៃរូបរាងប៊ើហ្គឺរឲ្យមានរូបរាងឃ្យូត គួរឲ្យស្រឡាញ់ និងគួរឲ្យចង់ញ៉ាំ»។
បុគ្គលិកលោកចាប់ផ្ដើមពិសោធធ្វើនំប៉័ងប៊ើហ្គឺរ ដោយលាយជាមួយម្សៅតែម៉ាត់ឆា និងសារធាតុចម្រាញ់ពីស្លឹកម្នាស់ និងបន្លែស្លឹកផ្អែម។
ម្ចាស់ហាងភីហ្សា និងប៊ើហ្គឺរ រូបនេះថា៖ «យើងប្រើគ្រឿងផ្សំដូចប៊ើហ្គឺរដទៃទៀតដែរ ប៉ុន្តែដើម្បីឲ្យនំប៉័ងមានពណ៌បៃតង យើងប្រើគ្រឿងផ្សំធម្មជាតិ ជាស្លឹកបន្លែ ជំនួសឲ្យការប្រើល័ក្ត»។
ទំរាំតែស្វែងរកគ្រឿងផ្សំ និងរូបមន្តត្រូវ លោកត្រូវចំណាយ ២-៣ សប្ដាហ៍មុនពេល ប៊ើហ្គឺរកូរ៉ូណា ប្រចាំហាងលោកបានរំលេចរូបរាង និងដាក់ឲ្យអតិថិជនធ្វើការកុម្ម៉ង់ទទួលទាន។
ចាប់តាំងពីបើកលក់ដើមសប្ដាហ៍មុន ហាងដ៏តូចរបស់លោក ហ័ង មានកំណើនអតិថិជន ដោយ ១ ថ្ងៃលក់ប៊ើហ្គឺរកូរ៉ូណាយ៉ាងតិចក៏ ៥០ នំដែរ។
លោករីករាយនឹងប្រជាប្រិយភាពដ៏ឆាប់រហ័សនៃប៊ើហ្គឺរកូរ៉ូណា ហើយអ្នកចូលចិត្តវាខ្លាំងបំផុត គឺកូនប្រុសរបស់លោកតែម្ដង។
លោកនិយាយថា៖ «កូនប្រុសខ្ញុំថា ប៊ើហ្គឺរនេះពិតជាអស្ចារ្យហើយគាត់លែងសូវយំខ្លាចមេរោគហើយ»។
មិនខុសពីហាងលក់អាហារនានានៅក្រុងហាណូយ ហាងភីហ្សា Pizza Home របស់លោកមានចំនួនអតិថិជនធ្លាក់ចុះយ៉ាងគំហុក ដោយសារតែវៀតណាមបានប្រកាសបិទកន្លែងស៊ីផឹកស្រាបៀរ និងភោជនីយដ្ឋានតាំងពីចុងខែមិនា ដោយអនុញ្ញាតត្រឹមតែមានការកុម្ម៉ង់អាហារដឹកជញ្ជូនដល់ផ្ទះ។
ប្រទេស វៀតណាម មានករណីឆ្លងវីរុសកូរ៉ូណាជាង ២៤១ នាក់ ហើយអាជ្ញាធររឹតបន្តឹងការដើរហើររបស់ពលរដ្ឋ និងហាមការជួបជុំមនុស្សច្រើន ដើម្បីកាត់បន្ថយការរីករាលដាលនៃជំងឺកូវីដ ១៩៕ AFP