ភ្នំពេញ : សមាគមចុងភៅកម្ពុជាដែលដឹកនាំដោយលោក លូ ម៉េង បានរៀបចំការប្រជុំចុងភៅ៣៥នាក់ដែលមកពីភោជនីយដ្ឋាននានានៅ ទីក្រុងភ្នំពេញ និងសៀមរាបដើម្បីចែករំលែកបទពិសោធគ្នាទៅវិញទៅមកជាមួយនឹងចុងភៅមកពីប្រទេសអ៊ីតាលីនៅភោជនីយដ្ឋាន Secret Recipe វិថីកម្ពុជាក្រោមកាលពីថ្ងៃទី១៥ ខែកុម្ភៈសប្តាហ៍មុននេះ។
កម្មវិធីនេះគឺក្រុមហ៊ុនមេគង្គអូរីហ្សាត្រេឌីង សហការគ្នាជាមួយនឹងសមាគមចុងភៅកម្ពុជារៀបចំកម្មវិធី ផ្សព្វផ្សាយនូវអង្ករខ្មែរ ដែលជាប់លំដាប់ថ្នាក់ល្អនៅលើពិភពលោក។
លោក លូ ម៉េង បានឲ្យដឹងថា៖ «កម្មវិធីនេះធ្វើឡើងដើម្បីជួបជុំចុងភៅខ្មែរទាំងអស់ចែករំលែក បទពិសោធនិងជំនាញចុងភៅពីគ្នាទៅវិញទៅមក។ ជាពិសេសជាងនេះទៅទៀតគឺចង់ផ្តល់ឱកាស និងជួយជ្រោមជ្រែងចុងភៅក្មេងៗ ក៏ដូចជាបង្ហាញពីការប្រើប្រាស់គ្រឿងផ្សំធ្វើម្ហូបថ្មីៗ»។
លោក គូសបញ្ជាក់ទៀតថា៖ «យើងបានជ្រើសរើសយកអង្ករល្អមកចម្អិន ហើយយើងចង់ពន្យល់បន្ថែមដល់ចុងភៅក្មេងៗយល់ដឹងពីអង្ករខ្មែរ លំដាប់ថ្នាក់ពិភពលោក»។
ក្នុងឱកាសនោះចុងភៅល្បីមកពីប្រទេសអ៊ីតាលីលោក Gian Paolo Raschi បានបង្ហាញស្នាដៃធ្វើមុខម្ហូបអ៊ីតាលី២មុខដែលប្រើគ្រឿងផ្សំ ខ្លះរបស់ប្រទេសកម្ពុជាដូចជា ផ្កាកំប្លោក ខ្ទឹមបារាំង ការ៉ុត បង្កងខ្មែរ និងម្ហូបចម្អិនពីអង្ករផ្កាម្លិះសម្រូបលាយជាមួយផ្សិតដ៏ថ្លៃ ឈ្មោះថាម្ហូប Salad Jasmine Rice Truffle។
លោកក៏បង្ហាញពីរបៀបនៃ ការដំាអង្ករនេះដើម្បីទទួលបាននូវបាយដែលមានក្លិនឈ្ងុយប្រហើរ ងាយស្រួលក្នុងការទំពាផងដែរ។
លោក ហ៊ុន ឡាក់ អគ្គនាយកក្រុមហ៊ុនមេគង្គអូរីហ្សាត្រេឌីង បានថ្លែងថា៖ «កម្មវិធីនេះត្រូវបានធ្វើឡើងគឺជាចលនាលើកតម្កើងវិស័យ កសិកម្មផ្សារភ្ជាប់នឹងវិស័យទេសចរណ៍។ វាផ្តល់ឱកាសដល់កសិករយើងបង្ហាញពីអង្កររបស់ខ្មែរឲ្យពិភពលោកបានស្គាល់តាមរយៈការបង្ហាញកែច្នៃអង្ករនេះជាម្ហូបពិសេស និងទំនើប»។
ទន្ទឹមនឹងនោះ ចុងភៅរបស់ភោជនីយដ្ឋាន Secret Recipe ក៏បានច្នៃអង្ករខ្មែរយកមកធ្វើជានំខេកយ៉ាងពិសេសដែលមានឈ្មោះថា នំខេកសូកូឡាអង្ករខ្មែរល្អផ្ដាច់គេក្នុងលោក (World Best Rice Chocolate Cake) និងនំកាកាវស្ពុងដែលមានរសជាតិឆ្ងាញ់ពិសាផងដែរ៕
