ភ្នំពេញ: បន្ទាប់ពីល្បីឈ្មោះថាជាហាងលក់ម្ហូបខ្មែរឆ្ងាញ់ បន្លែគ្មានជាតិគីមីហើយនោះ ហាង មាតុភូមិ បានពង្រីកសាខារបស់ខ្លួនរហូតដល់ទៅ ៤ កន្លែង បំពេញតម្រូវការអតិថិជនខ្លួន។
ទន្ទឹមនឹងនោះ មាតុភូមិនៅតែរក្សារសជាតិ អនាម័យ សេវាកម្ម និងម្ហូបបែបខ្មែរពិតៗនៅដដែល។
លោក មាស ម៉ែន បានអះអាងថា៖ «គ្រួសាររបស់ខ្ញុំចង់រក្សាទុកនូវម្ហូបបែបខ្មែរ រសជាតិខ្មែរនេះឲ្យនៅដដែល ជាពិសេសចង់ឲ្យម្ហូបខ្មែរមានឈ្មោះល្បីដូចម្ហូបប្រទេសដទៃអ៊ីចឹង ទើបបានជាខ្ញុំសម្រេចចិត្តបើកហាងលក់តែម្ហូបខ្មែរនេះឡើង គឺយើងមិនលក់ម្ហូបអីផ្សេងនោះទេ»។
លោកបន្តថា៖ «ជាពិសេសជាងនេះទៅទៀតគឺយើងស្វែងរកម្ហូបខ្មែរចាស់ៗ តាមខេត្តនានាដែលមិនសូវមានអ្នកធ្វើយកមកចម្អិនឡើងវិញ ដើម្បីឲ្យភ្ញៀវខ្មែរយើងក្មេងៗសម័យថ្មីបានស្គាល់រសជាតិសម្លព្រោង ម្ហូបជនជាតិភាគតិច ម្ជូរខ្ជិល នៅរតនគិរី ជាដើម។ យើងក៏មានម្ហូបទូទៅញាំស្ដៅ ម្ជូរស្លឹកអម្ពិលកូនត្រីចង្វា កង្កែបបោបអាំងជ្រលក់ទឹកក្រសាំង និងសៀងផងដែរ»។
ទន្ទឹមនឹងនោះសប្តាហ៍នេះហាងមាតុភូមិ បានបង្ហាញម្ហូបឆ្ងាញ់មាត់មួយមុខគឺ ប្រហុកចិញ្ច្រាំក្រសាំងចំហុយ គ្រាន់តែឃើញរូបភាពគឺស្រក់ទឹកមាត់បាត់ទៅហើយ។ ចំពោះមុខម្ហូបនេះ កម្រមានអ្នកចេះធ្វើឲ្យបានរសជាតិឆ្ងាញ់ណាស់។
ចង់ញ៉ាំប្រហុកចិញ្ច្រាំក្រសាំងចំហុយ ថែមពងមាន់ និងអន្លក់ នៅហាងមាតុភូមិ អាចទាក់ទងលេខទូរស័ព្ទ ០១១ ៨៦៨ ០១០៕