ក្រុងបាងកក : ពងមាន់អាំងគឺជាអាហារលក់តាមចិញ្ចើមថ្នល់ដ៏ពេញនិយមនៅប្រទេសថៃ និងបណ្ដាប្រទេសមួយចំនួនទៀតនៅអាស៊ី។
បើទោះជាគេអាំងវាដោតចង្កាក់ទាំងសម្បកក្ដី ក៏ជាក់ស្ដែងស៊ុតត្រូវបានគេចោះប្រហោងយកចេញទៅលាយគ្រឿងគ្រៅឲ្យឆ្ងាញ់ មុននឹងចាក់បញ្ចូលទៅក្នុងសម្បកស៊ុតនោះវិញ ហើយអាំងលើចម្រឹងដែកជាមួយនឹងរងើកភ្លើង។
ដើម្បីចម្អិនពងមាន់អាំងបែបថៃយើងត្រូវការគ្រឿងផ្សំសាមញ្ញៗដូចជា ពងមាន់១០គ្រាប់ទឹកស៊ីអ៊ីវ២ស្លាបព្រា ម្រេចកន្លះស្លាបព្រា ទឹកត្រី១ស្លាបព្រា ស្លឹកខ្ទឹមចិញ្ច្រាំ១ស្លាបព្រា និងចង្កាក់ឫស្សីសម្រាប់ដោតអាំង១ដុំ។
ប្រសិនបើលោកអ្នកចង់បន្ថែមរសជាតិឲ្យកាន់តែឆ្ងាញ់នោះ សូមសាកល្បងប្រើម្សៅស៊ុបជំនួសទឹកត្រីវិញក៏បាន។
ការរៀបចំចម្អិន ដំបូងត្រូវលាងស៊ុតទាំងសម្បកឲ្យស្អាត រួចយកចុងកាំបិតឬឈើចាក់ផ្នែកស្រួចនៃស៊ុត ឲ្យបែកប៉ុនចុងម្រាមដៃ។ ចាប់ផ្ដើមចាក់ស៊ុតចេញពីសម្បកវាហើយទុកក្នុងចានសិន។
នៅពេលដែលរួចរាល់ហើយ ចាប់ផ្ដើមលាយវាជាមួយទឹកស៊ីអ៊ីវ ម្រេច ម្សៅស៊ុប និងស្លឹកខ្ទឹមចិញ្ច្រាំ ហើយប្រើជីឡៅចាក់បង្ហូរចូលក្នុងសម្បកស៊ុតវិញ។
យកពងមាន់ទៅអាំងលើចង្អើរក្ដៅ ដោយដាក់វាបញ្ឈរដើម្បីកុំឲ្យស៊ុតហៀរចេញពីសម្បករយៈពេល៨នាទី។
នៅពេលដែលស៊ុតចាប់ផ្ដើមឆ្អិនរឹងបន្តិចហើយ យកចង្កាក់ឈើមកដោតបញ្ឈរ ដោយ១ចង្កាក់មានពងមាន់៣ បន្ទាប់មកបន្តអាំងវាទៀតឲ្យបាន១០នាទីនោះជាការស្រេច៕
