.jpg)
ភ្នំពេញ៖ នារសៀលថ្ងៃអង្គារនៅហាង ភីហ្សា ឃ្យូត (Pizza CUTe) អតិថិជនចម្រុះជាតិសាសន៍កំពុងអង្គុយក្រេបស្រាបៀរត្រជាក់ស្រេង និងស្រាក្រហមបែបក្លាស៊ិក រង់ចាំភីហ្សាដ៏ឈ្ងុយឆ្ងាញ់របស់ពួកគេចេញពីផ្ទះបាយ។
ស្ថិតនៅម្ដុំទួលទំពូង ហាង ភីហ្សា ឃ្យូត ដែលមានថៅកែ ២ រូប សុទ្ធតែជាជនជាតិអ៊ីតាលី បានទាក់ទាញភ្ញៀវគ្រប់ទិសទីមកញ៉ាំភីហ្សា ដែលឆ្ងាញ់ដូចទៅនឹងរសជាតិនៅទឹកដីកំណើតរបស់អាហារនេះផងដែរ។
អង្គុយក្នុងហាង អ្នកនាង វេណេសា អ៊ីរីននីគ្លីយ៉ា ជាអ្នកទេសចរអ៊ីតាលីម្នាក់ បានប្រាប់ ភ្នំពេញ ប៉ុស្ដិ៍ ថា៖ «ក្រោយពីធ្វើដំណើរឆ្លងកាត់ថៃ វៀតណាម និងប្រទេសឯទៀតនៅអាស៊ីមក ខ្ញុំហ៊ានថា ភីហ្សានៅទីនេះឆ្ងាញ់ជាងគេនៅអាស៊ី។ រសជាតិវាឆ្ងាញ់ដូចនៅអ៊ីតាលី អ៊ីចឹង»។
រីឯកញ្ញា ជិន ណាណា ជានារីខ្មែរដែលកំពុងអង្គុយជុំតុជជែកគ្នាលេងជាមួយមិត្តភក្ដិ បាននិយាយថា៖ «អាហារអ៊ីតាលីវាល្អចំពោះសុខភាព ព្រោះគ្រឿងផ្សំ ជាពិសេសប្រេងរបស់គេ ប្រេងអូលីវ ហ្នឹងវាល្អចំពោះសុខភាព។ ដូច្នេះតម្លៃមិនថ្លៃទេ ព្រោះគេប្រើរបស់ល្អៗមកចម្អិន»។
លោក អេនឌ្រា ជនជាតិអីុតាលីម្ចាស់ហាង ភីហ្សា ឃ្យូត ដែលល្បីរសជាតិឆ្ងាញ់ដូចនៅប្រទេសកំណើតលោក។ហុង មិនា
ភីហ្សា ឃ្យូត ត្រូវបានបើកដំណើរការកាលពីខែតុលា ឆ្នាំ ២០១៩ ដោយការសហការរវាងបុរសអ៊ីតាលី ២ រូប គឺលោក អេនឌ្រា សាល់វ៉ាទីកូ និង អាឡេសាន់ដ្រូ ប៉ាសាណានតេ ដែលជាអ្នកមានបទពិសោធក្នុងវិស័យម្ហូបអាហារជាច្រើនឆ្នាំ។
លោក អេនឌ្រា មកពីតំបន់ ជេណូវ៉ា នៅអ៊ីតាលី បានជួបលោក អាឡេសាន់ដ្រូ ជាអ្នកចេះធ្វើភីហ្សាស្រាប់នៅឆ្នេរអូរត្រេះ។
ម្ចាស់ហាងវ័យ ៥៤ ឆ្នាំ រូបនេះបានឲ្យដឹងថា៖ «ខ្ញុំជួប អាឡេសាន់ដ្រូ ដែលជាអ្នកជំនាញធ្វើភីហ្សា មិនថាប្រភេទប្រពៃណីរាងមូល ឬភីហ្សាប្រភេទមួយដុំៗនោះទេ»។
លោក អាឡេសាន់ដ្រូ អាយុ ៤០ ឆ្នាំមកពីតំបន់ តូរីណូ បានមកប្រកបអាជីវកម្មនៅឆ្នេរអូរត្រេះ និងមានជំនាញអាហារអ៊ីតាលី។
លោក អាឡេសាន់ដ្រូ ចុងភៅអីុតាលី និងលោក អេនឌ្រា។ ហុង មិនា
ជាមួយតម្លៃពី ៥ ទៅ ២០ ដុល្លារ ក្នុងបញ្ជីរាយនាមមុខម្ហូប ហាង ភីហ្សាឃ្យូត មានបម្រើ ភីហ្សាមូល ភីហ្សាចៀន (panzerotti) សាំងវិច (Panini) ស្ប៉ាយហ្គើធី (Spaghetti) ប៉ាស្តាមានខ្ចប់ស្នូល (Ravioli) ឈីសទឹកដោះគោ (burrata cheese) និងសាច់ចំណិត (Cold Cuts)។
លោក អេនឌ្រា បានបញ្ជាក់ថា៖ «យើងផ្ដល់រសជាតិអ៊ីតាលីពិតៗ ព្រោះម្សៅដែលយើងប្រើចម្អិនភីហ្សាសំខាន់ណាស់ ក្រៅពីគ្រឿងផ្សំនៅលើសម្បក។ ម្សៅរបស់យើងឆ្ងាញ់ និងងាយស្រួលរំលាយ នេះជារូបមន្តអាថ៌កំបាំងប្រចាំហាងយើង»។
ក្រៅពីស្រាបៀរត្រជាក់ៗ ភ្ញៀវក៏មានជម្រើសក្រេបស្រាអ៊ីតាលី ១០ ប្រភេទផងដែរ។
ភីហ្សា ឃ្យូត ស្ថិតនៅផ្ទះលេខ ១៧០ ផ្លូវលេខ ៤៥០ ចាប់បើកពីម៉ោង ១១ ព្រឹក ដល់ ១០ យប់។ ទូរស័ព្ទ លេខ ០៧៨ ៧៩ ០៦ ៧៩៕
វីដេអូ៖
