ក្រុងប៉ារីស: ជារៀងរាល់ចុងសប្ដាហ៍ ការតម្រង់ជួរដ៏វែងត្រូវបានធ្វើឡើងនៅជិតតំបន់របាំ Moulin Rouge ឯទីក្រុងប៉ារីស។
ភ្ញៀវទេសចរដែលមកតម្រង់ជួរនៅទីនេះគឺដើម្បីទទួលបានឱកាសអង្គុយញ៉ាំអាហារលំដាប់ខ្ពស់បែបបារាំងជាមួយនឹងការចំណាយដ៏ថោកសមរម្យជាទីបំផុត។
កាលពីដើមខែមិថុនានេះ ម្ហូបស៊ុតម៉ាយូណេសរបស់ភោជនីយដ្ឋាន Bouillon Julien ត្រូវបានបោះឆ្នោតជាអាហារដ៏ឆ្ងាញ់បំផុតក្នុងលោកដោយចៅក្រមបារាំងល្បីៗធ្វើឲ្យហាង Bouillon Pigalle កាន់តែមានឈ្មោះបោះសំឡេងជាងឈ្នះពានផ្កាយ Michelin ទៅទៀត។
សម្រាប់ការចំណាយអ្វីគឺចាប់ពី ១,៨០ អឺរ៉ូ (ប្រមាណ ២ ដុល្លារ) ភ្ញៀវអាចភ្លក្សរសជាតិអាហារសាមញ្ញ ប៉ុន្តែត្រូវបានចម្អិនដោយសិល្បៈផ្ទះបាយបែបបារាំងលំដាប់ខ្ពស់។
ដូច្នេះហើយទើបវាមិនមានអ្វីចម្លែកទេ ដែលភ្ញៀវទេសចរជាច្រើនសុខចិត្តចំណាយពេលឈរតម្រង់ជួរ ដើម្បីទទួលយកបទពិសោធទទួលទានលំដាប់ខ្ពស់ក្នុងតម្លៃដ៏ទាប។
នៅភោជនីយដ្ឋាននេះផងដែរភ្ញៀវអាចជាវកញ្ចប់អាហារ ៣ មុខក្នុងតម្លៃតែ ២០ អឺរ៉ូប៉ុណ្ណោះ។
លោក Edouard ជាម៉ូយប្រចាំនៅភោជនីយដ្ឋានបានលាន់មាត់ថា៖ «នៅកន្លែងនេះគ្មានអ្វីដែលធ្វើឲ្យយើងមិនចូលចិត្តនោះទេ»។
Bouillons ត្រូវបានបង្កើតឡើងក្នុងការបម្រើអាហារស៊ុប និងចំហុយតម្លៃថោក ដល់អ្នករស់នៅទីក្រុងប៉ារីសនៅសតវត្សរ៍ទី ១៩។ ហាង Bouillon Julien ដែលមានការតុបតែងសល់ពីសម័យ ១១៣ ឆ្នាំមុនបានចាប់ផ្ដើមផ្ដល់សេវាអាហារធូរថ្លៃ តែគុណភាពខ្ពស់កាលពីឆ្នាំមុន៕