.jpg)
អាម៉ុកកង្កែប ជាមុខម្ហូបដែលលោកធ្លាប់ទទួលបានមេដាយមាស។ ហុង មិនា
សៀមរាប៖ បុកកំពឹសឆៅ ម្ជូរក្បាលត្រី ប្រហុកលីង ចេកគ្រាប់ជ្រក់ ផ្ទាប់សាច់ក្រកគោ ឬគោងៀត ញាំក្រូចត្លុង ញាំស្ដៅ អាម៉ុកកង្កែប ទឹកគ្រឿងសៀមរាប ទឹកគ្រឿងបាត់ដំបង ខ្នប់កូនត្រី និងម្ជូរក្ដាត គឺជាមុខម្ហូបពេញនិយម ដែលស្ដ្រីមេផ្ទះគ្រប់រូបចាំរូបមន្ដយ៉ាងច្បាស់។
នេះជាមូលហេតុដែលភោជនីយដ្ឋានអង្គារដី ត្រូវបានបង្កើតឡើងកាលពីដើមឆ្នាំ ដើម្បីបម្រើមុខម្ហូបបែបប្រពៃណីខ្មែរដល់ក្រុមគ្រួសារ មិត្ដភក្ដិ និងក្រុមការងារយ៉ាងរីករាយ។
លោក ឡុង ប៊ុនហោ ម្ចាស់ហាងអង្គារដី បាននិយាយថា៖ «ខ្ញុំផ្ដោតសំខាន់លើអាហារប្រចាំថ្ងៃ ដែលពលរដ្ឋខ្មែរយើងតែងតែទទួលទាននៅតាមផ្ទះសំបែងរៀងរាល់ថ្ងៃ។ ត្រឹមម្នាក់ ២ ម៉ឺនរៀល ១ ពេល។ សម្ល ១ ឆ្នាំងតូចមានតម្លៃ ១៨ ០០០ រៀល វាពិតជាសមរម្យសម្រាប់ពលរដ្ឋទូទៅ»។
នៅមានមុខម្ហូបខ្មែរបែបប្រពៃណីជាច្រើនទៀត ដែលពលរដ្ឋខ្មែរភាគច្រើនមិនធ្លាប់បានភ្លក្សរសជាតិរបស់វា ឬកម្របានឃើញនាពេលបច្ចុប្បន្ន។
លោក ប៊ុនហោ បានឲ្យដឹងថា៖ «ក្បាលត្រីបោបជាប្រភេទម្ហូបកម្រ ដែលទូទៅភោជនីយដ្ឋាននានាមិនមានលក់នោះទេ។ វាមានគ្រឿងផ្សំ ក្បាលត្រី សាច់ចិញ្ច្រាំ មីសួ សណ្ដែកបាយ រួមទាំងពោះត្រី។ ប្រហុកអាំងជ្រញ់ ក៏កម្រមានអ្នកជួបប្រទះដែរ ពីព្រោះប្រហុក សាច់ជ្រូក ក្រសាំង ម្អម ចិញ្ច្រាំចូលគ្នា រួចអាំងលើជ្រញ់។ ចេកគ្រាប់ជ្រក់ ទទួលទានជាមួយសាច់ក្រកគោ ឬគោងៀត រួមទាំងញាំត្របែក ញាំជម្ពូ ញាំបំពេញរាជ្យ និងឆាជូរអែមត្របែកជាដើម»។
អាម៉ុកកង្កែបជាមុខម្ហូបខ្មែរ ដែលលោក ប៊ុនហោ ធ្លាប់ទទួលបានជយលាភីមេដាយមាស និងពានមាសក្នុងឆ្នាំ ២០១៤ និងញាំត្របែកឈ្នះលេខ ២ មេដាយប្រាក់ នៅឆ្នាំដដែល។
ក្បាលត្រីបោប និងបុកកំពឹសឆៅ មាននៅភោជនីយដ្ឋាន អង្គារដី។ហុង មិនា
នៅមានមុខម្ហូបខ្មែរបែបប្រពៃណីជាច្រើនទៀត ដែលមេចុងភៅខ្មែររូបនេះជីកកកាយដើម្បីឲ្យពលរដ្ឋខ្មែររំឭកដល់អតីតកាលគ្រាស្ទើរតែគ្មានអ្វីទទួលទាន និងបន្ដថែរក្សាអត្ដសញ្ញាណម្ហូបខ្មែរដល់ក្មេងជំនាន់ក្រោយផងដែរ។
លោក ឡុង ប៊ុនហោ បាននិយាយថា៖ «មុខម្ហូបមួយចំនួន ដែលជីកកប់ ឬមិនសូវមានការចម្អិនស្លជាប្រចាំនាពេលបច្ចុប្បន្ន បានរំឭកអំពីរឿងអតីតកាលរបស់អតិថិជនខ្លះជាមួយនឹងរឿងរ៉ាវធ្លាប់ឆ្លងកាត់»។
លោកនិយាយសំដៅលើសម្លម្ហូរក្ដាត និងស្អុះកូនត្រី ដែលស្រដៀងខ្នប់កូនត្រី ថា៖ «អតិថិជនខ្លះប្រាប់ពួកយើងថា ក្រោយបែកអាពតមក ហូបតែអាហ្នឹង កាលមុនគ្មានអ្វីស៊ីទេ»។
មេចុងភៅដែលជាប្រធានសមាគមចុងភៅកម្ពុជា (CCA) ផងនោះ បានប្រាប់ ភ្នំពេញ ប៉ុស្ដិ៍ ថា៖ «បើយើងមិនជួយជីកកកាយមុខម្ហូបខ្មែរបុរាណជាច្រើននោះទេ យើងនឹងភ្លេចរួចបាត់បង់អត្ដសញ្ញាណ។ ជាក់ស្ដែងចំពោះមុខម្ហូបអាម៉ុក សាសន៍គេ ទាមទារ និងប្រទាញប្រទង់គ្នារហូតដល់មានការប្រកួតលក្ខណៈអន្ដរជាតិ រួមមាន អាមេរិក កាណាដា ស្វ៊ីស និងថៃ ហើយខ្មែរយើងឈ្នះមេដាយលេខ ១ ទើបបណ្ដាប្រទេសដទៃទទួលស្គាល់មុខម្ហូបខ្មែរ»។
ក្នុងបរិវេណដ៏ធំទូលាយនៃភោជនីយដ្ឋាន ដើមអង្គាដីត្រូវបានដាំសម្រាប់លម្អភោជនីយដ្ឋានផង និងផ្គត់ផ្គង់ផ្ទះបាយ។ អង្គាដីជារុក្ខជាតិដែលលោក ប៊ុនហោ ចូលចិត្ដ ខណៈអ្នកម្ដាយរបស់លោកស្លជាសម្លសម្រាប់ព្យាបាលជំងឺផ្ដាសាយ។
លោករំឭកថា៖ «កាលពីខ្ញុំអាយុ ១៤ ឆ្នាំ ខ្ញុំកើតជំងឺផ្ដាសាយធំ។ អ្នកម្ដាយខ្ញុំស្លប្រាប់ថា ខ្ញុំញ៉ាំវាឲ្យច្រើនទៅ វាជាជួយកែអាការរោគផ្ដាសាយ។ ដល់ពេលខ្ញុំញ៉ាំរួចគេងពេលថ្ងៃត្រង់ ហើយពេលភ្ញាក់ឡើង អាការផ្ដាសាយហាក់បានធូរស្បើយច្រើន។ ខ្ញុំទទួលស្គាល់ថា អង្គាដី មានអត្ថប្រយោជន៍លើសពីអាហារប្រចាំថ្ងៃ»។
អង្គុយទទួលទានអាហារថ្ងៃត្រង់នៅភោជនីយដ្ឋានក្រោយដើរកម្សាន្ដតាមប្រាង្គប្រាសាទនាចុងសប្ដាហ៍ លោក ខុង រីដា ជាមួយភរិយា និងកូនស្រី ពេញចិត្តនឹងម្ហូបឆ្ងាញ់ៗដូចជាអាហារចម្អិននៅផ្ទះប្រចាំថ្ងៃ។
លោកនិយាយអំឡុងពេលរង់ចាំមុខម្ហូបសម្លកកូរ និងត្រីអណ្ដែងអាំងថា៖ «មិនខុសពីនៅស្រុកស្រែ ម្ហូបនៅទីនេះមានការរចនាស្រស់ស្អាតជាងបន្ដិច។ បរិស្ថានស្អាត ហើយមុខម្ហូបឆ្ងាញ់ និងមានអនាម័យ គួរឲ្យចង់ញ៉ាំ ថ្ងៃក្រោយយើងមកទៀត»។
ភោជនីយដ្ឋានអង្គារដី មានដាំរុក្ខជាតិអង្គាដី ដែលលោក ប៊ុនហោ ជ្រួតជ្រាបពីអត្ថប្រយោជន៍របស់វា។ហុង មិនា
ការបើកទ្វារឡើងរបស់ភោជនីយដ្ឋាន ក្រោយរយៈពេលជាង ២ ខែកន្លងមកនេះ ម្ចាស់ហាង និងរីសតមួយចំនួន ត្រូវបន្ដរស់នៅធម្មតាក្នុងគន្លងថ្មី តាមរយៈការប្រកាន់ខ្ជាប់នូវអនាម័យខ្ពស់ រក្សាគម្លាតសុវត្ថិភាពទាំងសង្គម និងបុគ្គល។
អ្នកស្រី ជា វីរ៉ាវណ្ណ ភរិយាម្ចាស់ហាងអង្គារដី បានឲ្យដឹងថា៖ «យើងមានអាល់កុលសម្រាប់លាងដៃពេលភ្ញៀវអញ្ជើញចូលទទួលទានអាហារ ហើយរៀងរាល់ថ្ងៃ យើងរៀបចំសម្អាតជូតអាល់កុលនៅពេលបើក និងពេលថ្ងៃត្រង់ ហើយនៅពេលភ្ញៀវចេញអស់ យើងរៀបចំជូតអាល់កុលម្ដងទៀត»។
អ្នកស្រីបន្ដថា៖ «ខាងចុងភៅ យើងមានស្រោមដៃ និងឲ្យពួកគាត់លាងដៃជាប្រចាំ។ ចំពោះបុគ្គលិក យើងនឹងពិគ្រោះគ្នាសិនថា តើយើងគួរឲ្យពួកគាត់ពាក់ម៉ាស់បម្រើភ្ញៀវឬយ៉ាងណា»។
ភោជនីយដ្ឋានអង្គារដី ស្ថិតនៅលើផ្លូវតុលាការ ភូមិជន្លង់ សង្កាត់សាលាកំរើក ក្រុងសៀមរាប និងបើកពីម៉ោង ១១ ព្រឹកដល់ម៉ោង ៩ យប់។
ព័ត៌មានបន្ថែមមាននៅទំព័រហ្វេសប៊ុកភោជនីយដ្ឋានអង្គារដី ឬទូរស័ព្ទលេខ ០១២ ៥៧៦ ៨០៥៕
វីដេអូ៖
