ភ្នំពេញ : នៅអំឡុងទសវត្សរ៍៨០ និង៩០ ប្រទេសកម្ពុជាមានប្រវត្តិជិតស្និទ្ធនឹងសហភាពសូវៀត តាមរយៈប្រព័ន្ធផ្សព្វផ្សាយ សៀវភៅសិក្សា និងការបញ្ជូនសិស្សទៅសិក្សានៅប្រទេសនេះជាដើម។ ទំនាក់ទំនងពីអតីតកាលបានធ្វើឲ្យចំនួនភ្ញៀវទេសចររុស្ស៊ីមកកាន់ ប្រទេសកម្ពុជាមានចំនួនច្រើនគួរឲ្យកត់សម្គាល់។
យោងតាមស្ថិតិ របស់ក្រសួងទេសចរណ៍ នៅឆ្នាំ២០១៣ ចំនួនទេសចររុស្ស៊ីមកប្រទេសកម្ពុជាមានជិត១២ម៉ឺននាក់។ ដោយសារកត្តានេះហើយទើបលោក Vladislav Kuznetsov យល់ថាការបើកភោជនីយដ្ឋានប្រពៃណីរុស្ស៊ីមួយគឺជារឿងដ៏ចាំបាច់ នៅប្រទេសកម្ពុជា។
ម្ចាស់ភោជនីយដ្ឋានរុស្ស៊ីរូបនេះបានធ្វើដំណើរចុះ ឡើងប្រទេសកម្ពុជារយៈពេល៣ឆ្នាំដើម្បីសិក្សាពីទីផ្សារភោជនីយដ្ឋាន។ លុះនៅដើមឆ្នាំ២០១៤ លោកក៏បានរំលេចចេញនូវរូបរាងភោជនីយដ្ឋានដែលអភិរក្សនូវវប្បធម៌ ប្រពៃណីរុស្ស៊ីមួយឈ្មោះថា Samovar ម្ដុំផ្សាររាត្រីមាត់ទន្លេ។
អ្វីៗ ទាំងអស់នៅក្នុងភោជនីយដ្ឋាននេះសុទ្ធសឹងតែជារបស់នាំចូល ពីប្រទេសរុស្ស៊ីសុទ្ធសាធ។ ការរចនាខាងក្នុងប្រើដោយគ្រឿងសង្ហារិមឈើ ដែលមានកម្រាលតុ និងប៉ាន់ឆុងតែបុរាណជាអត្តសញ្ញាណរបស់ប្រទេសរុស្ស៊ីនៅលម្អលើ តុនោះតែម្ដង។
នៅតាមជញ្ជាំងក៏មានដាក់តាំងនូវផ្ទាំងគំនូរ រូបភាពឆ្លុះបញ្ចាំងពីវប្បធម៌របស់ជនជាតិនេះផងដែរ។
ដោយឡែកមុខម្ហូបនៅហាងនេះក៏មានតម្លៃថោកសមរម្យដែរ ដូចជាសាច់អាំងដោតចង្កាក់ shashlik iz govjadini មានតម្លៃ៦,៨ដុល្លារ ហើយលោកអ្នកអាចមានជម្រើសជាសាច់គោ ឬសាច់ចៀមជាមួយបន្លែខ្ទឹមបារាំង ម្ទេសហាវៃ និងប៉េងប៉ោះ។
ភោជនីយដ្ឋាន Samovar ផ្ទះលេខ១១Eo ផ្លូវ១០៨ សង្កាត់វត្តភ្នំ ខណ្ឌដូនពេញ ស្ថិតនៅជិតផ្សាររាត្រីមាត់ទន្លេ។ ទំនាក់ទំនងទូរស័ព្ទ០៧៧៨៩២៥២៥៕
