.jpg)
ភ្នំពេញ៖ ជើងផ្សិតពងទាប្រៃ ឆានំបញ្ចុកក្រៀម ផាក់ឡូវពិសេស ត្រីចៀនជូរអែម បាយឆាម៉ាឡេ នំត្រាវបំពងស្នូលជ្រូកខ្វៃ ភីហ្សាអ៊ីតាលី ស្ថិតក្នុងបញ្ជីម្ហូបភោជនីយដ្ឋានអាហារបួស ជេស៊ី ដែលគ្រាន់តែឮឈ្មោះក៏ធ្វើឲ្យអ្នកអានចង់ភ្លក្សម្ហូបបួសដ៏ប្លែកៗទាំងនោះដែរ។
ម្ចាស់ហាងរូបស្រស់សម្ដីរួសរាយរាក់ទាក់ អ្នកស្រី ជា សុវណ្ណារី ដែលភាគច្រើនគេហៅ ជេស៊ី លីវ (Jessy Liv) បានប្រាប់ថា ភោជនីយដ្ឋានដែលបើកដំណើរការមិនដល់ ១ ខែនេះ បានទទួលអតិថិជនចម្រុះជាតិសាសន៍។
ម្ចាស់ហាងវ័យ ៣៦ ឆ្នាំ រូបនេះបាននិយាយថា៖ «ខ្ញុំទើបនឹងបើកសម្ពោធហាងកាលពីថ្ងៃទី ២៨ ខែមិថុនា ប៉ុន្តែមូលហេតុដែលធ្វើឲ្យខ្ញុំមានភ្ញៀវច្រើន និងភ្ញៀវប្រចាំទៀតនោះ ព្រោះខ្ញុំពីមុនមកធ្លាប់ជាប្រធានក្រុមហ៊ុនទេសចរណ៍ ហេតុនេះខ្ញុំស្គាល់មនុស្សច្រើន»។
អ្នកស្រីបញ្ជាក់ថា៖ «តែភ្ញៀវភាគច្រើន គឺមកពីអាស៊ី បើនិយាយពីអតិថិជនខ្មែរវិញយើងមានតែ ២០ ទៅ ៣០ ភាគរយប៉ុណ្ណោះ»។
ឈ្មោះភោជនីយដ្ឋាន ជេស៊ី មកពីអក្សរចិន ដែលមានន័យថា ភ្ជាប់និស្ស័យ ភ្ជាប់គ្នាជាមិត្ត ដោយអ្នកស្រីចង់សំដៅលើមិត្តភាពជាមួយដៃគូជំនួញទាំង ៤ នាក់ទៀត ដែលមកពីប្រទេសម៉ាឡេស៊ី សិង្ហបុរី ចិន និងហុងកុង។
អ្នកស្រីម្ចាស់ហាងបញ្ជាក់ថា ហាង ជេស៊ី គួរចាត់ទុកជាហាងលក់អាហារសុខភាព ជាជាងអាហារបួស ព្រោះការរៀបចំម្ហូបមិនគោរពតាមក្បួនច្បាប់អ្នកបួសដ៏តឹងរ៊ឹងទាំងស្រុងទេ។
នេះក៏ជាចំណុចពិសេសមួយរបស់ហាង ដែលទាក់ទាញទាំងភ្ញៀវទទួលទានបួស និងអ្នកមិនហូបបួស។
ភោជនីយដ្ឋានមានបម្រើអាហារជាច្រើនមុខ រួមទាំងភីហ្សា និងប៊ឺហ្គឺរបួសផងដែរ។ ហុង មិនា
អ្នកស្រីនិយាយថា៖ «ហាងយើងក៏តម្រូវតាមចិត្តអតិថិជន បើគាត់ជាអ្នកបួសចំ មិនហូបទាំងខ្ទឹម និងពងមាន់ពងទា ពួកយើងនឹងរៀបចំតាមគាត់ ឬសូម្បីតែប៊ូហ្វេ ដែលមានម្ហូបប្រហែល ពី ៧ ទៅ ៨ មុខនោះ បើយើងអាចជំនួសឲ្យគាត់បាន យើងនឹងធ្វើភ្លាម»។
ទន្ទឹមនឹងវត្តមានអតិថិជនចម្រុះជាតិសាសន៍ និងគ្រប់វ័យ អ្នកស្រីបានរៀបរាប់ទៀតថា៖ «យើងមានទាំងអាហារ ចិន ខ្មែរ និងអឺរ៉ុប ក្មេងៗដែលពួកគាត់ស៊ាំនឹងបន្លែ យើងក៏មានរបៀបជាភីហ្សា ប៊ឺហ្គឺរ ដល់គាត់ផងដែរ ដែលសាច់ភាគច្រើនយើងធ្វើពីតៅហ៊ូ និងពពុះសណ្ដែកដាក់លើនោះ»។
ម្ហូបដែលពេញនិយមជាងគេក្នុងហាងសម្រាប់ទាំងភ្ញៀវក្នុងស្រុក និងក្រៅស្រុកនោះ គឺបាយឆាម៉ាឡេ ប៉ុន្តែអ្នកស្រី ជេស៊ី ថ្លែងពីជម្រើសអាហារយ៉ាងដូច្នេះថា៖ «ខ្ញុំចង់ណែនាំដល់ភ្ញៀវនោះគឺ ផាក់ឡូវពិសេសដែលមានគ្រឿងផ្សំដូចជា ពងទា ផ្សិត និងតៅហ៊ូ ហេតុផលដែលខ្ញុំណែនាំម្ហូបនេះ ព្រោះអ្នកដែលមិនញ៉ាំសាច់យ៉ាងណាក៏គាត់មានពងទា ហើយរសជាតិវាញ៉ាំជាមួយបាយក៏បាន ទទេក៏បាន»។
អាហារប៊ូហ្វេសមានតម្លៃ ៥ ដុល្លារក្នុងម្នាក់ រីឯម្ហូបកុម្ម៉ង់ចានតូចមានតម្លៃចាប់ពី ៣ ដុល្លារ និងចានធំតម្លៃពី ៨ ទៅ ២០ ដុល្លារ ខ្ពស់បំផុត។
ក្រៅពីមានមោទនភាពនឹងមតិភ្ញៀវ ម៉ាឡេស៊ី សិង្ហបុរី និងចិន ដែលសរសើរថា ម្ហូបនៅភោជនីយដ្ឋាន ជេស៊ី ធ្វើឲ្យពួកគាត់មានអារម្មណ៍ដូចនៅផ្ទះប្រទេសកំណើត អ្នកស្រីក៏បានលើកពីបញ្ហាកង្វះចំណតទទួលភ្ញៀវផងដែរ។
ទន្ទឹមនឹងការព្យាយាមរកដំណោះស្រាយដល់អ្នកនិយមម្ហូបបួស អ្នកស្រីលើកឡើងថា៖ «សព្វថ្ងៃនេះខ្ញុំកំពុងចុះកុងត្រា ជាមួយ Food Panda និង Nham 24 សម្រាប់សេវាដឹកជញ្ជូនដល់ផ្ទះ»។
អ្នកស្រី ជេស៊ី លើកឡើងថា ម្ហូបតម្រូវសម្រាប់ភ្ញៀវទូទៅ និងអ្នកទទួលទានបួសតឹងរឹុង។ហុង មិនា
ក្រៅពីបម្រើអាហារបួស ភោជនីយដ្ឋានក៏មានទម្លាប់ធ្វើសកម្មភាពមនុស្សធម៌ដោយការចែកទានជាអាហារផងដែរ។
អ្នកស្រី ជេស៊ី បាននិយាយថា៖ «១ អាទិត្យម្ដង យើងនឹងមានការចុះចែកបាយដល់អ្នកក្រីក្រដោយមានការចូលរួមពីអតិថិជនកុម៉្មងអាហារពីហាងផ្ទាល់។ ហេតុនេះបើមានចំណាប់អារម្មណ៍ ពួកយើងស្វាគមន៍គ្រប់គ្នា។ រៀងរាល់ថ្ងៃសៅរ៍ នៅខាងមុខហាងក៏មានម្ហូបហ្វ្រ៊ី ប្រហែល ២០ ប្រអប់ អ្នកត្រូវការអាហារ អាចមកយកបាន»។
ភោជនីយដ្ឋានអាហារបួស ជេស៊ី មានទីតាំងនៅផ្លូវ ១៣៦ សង្កាត់ផ្សារកណ្ដាល ២ ខណ្ឌដូនពេញ ដោយបើកដំណើរការពីម៉ោង ៧ ព្រឹក ដល់ ៩ យប់ ជាមួយការបញ្ចុះតម្លៃ ១០ ភាគរយ ជារៀងរាល់ថ្ងៃសីលចិន។ ទំនាក់ទំនងទូរស័ព្ទលេខ ០៩៩ ៥១៩ ២៣៤៕
អតិថិជនរបស់ ភោជនីយដ្ឋាន ជេស៊ី អាហារបួស ភាគច្រើនជាភ្ញៀវបរទេស។ហុង មិនា
វីដេអូ៖
