ក្រុងវ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ ត្រូវបានស្គាល់ជាអ្នកនិយមអាហារហ្វាស់ហ្វូតម្នាក់ តែអាហារនៅសណ្ឋាគាររបស់លោកមួយកាន់តែល្អប្រណីតនោះ គឺភោជនីយដ្ឋាន ស៊ូស៊ី នៅសណ្ឋាគារអន្ដរជាតិត្រាំ ក្នុងទីក្រុងវ៉ាស៊ីនតោន បានទទួលផ្កាយ ១ ពី Michelin។
Michelin Guide ឆ្នាំ ២០២០ ប្រចាំនៅទីក្រុងវ៉ាស៊ីនតោន បានចុះផ្សាយកាលពីថ្ងៃអង្គារ ដោយផ្ដល់ផ្កាយមួយ Sushi Nakazawa ដែលមានន័យថា ក្រុមការីនិពន្ធជឿថា ភោជនីយដ្ឋាននេះជាទីកន្លែងគួរតែសាកភ្លក្សរសជាតិ។
យោងតាមមគ្គុទេ្ទសក៍បានឲ្យដឹងថា៖ «ភោជនីយដ្ឋានដ៏ល្បីល្បាញនោះផ្ដល់សេវាកម្មផ្ដោតចម្បងលើគុណភាព ភាពចម្រុះតាមរដូវកាល និងទិចនិក»។
មេចុងភៅ Daisuke Nakazawa បម្រើម្ហូប ២០ មុខ និងតារាងមុខម្ហូបបែបស៊ូស៊ី Edomae។ នេះបើយោងតាមវេបសាយភោជនីយដ្ឋាន ដែលបានឲ្យដឹងថា ការកក់ទុកមុនត្រូវធ្វើឡើងរយៈពេល ៣០ ថ្ងៃមុនឯនោះ។
Sushi Nakazawa ស្ថិតក្នុងទីតាំងដ៏ចម្រូងចម្រាស ខណៈលោក ត្រាំ រងនូវការរិះគន់រឿងប្រើប្រាស់តួនាទីជាប្រធានាធិបតីរកប្រាក់ចូលហោប៉ៅដោយការផ្សព្វផ្សាយសណ្ឋាគារ ដែលនៅមិនឆ្ងាយពីសេតវិមាន ដល់គណៈប្រតិភូមកទស្សនកិច្ច។
Gwendal Poullennec នាយកអន្ដរជាតិឲ្យ Michelin Guide បានឲ្យដឹងថា៖ «អ្នកត្រួតពិនិត្យរបស់យើងមានការភ្ញាក់ផ្អើលយ៉ាងខ្លាំងចំពោះការផ្ដល់ផ្កាយនេះ និងភាពសម្បូរបែបនៃម្ហូបអាហារនៅទីក្រុងវ៉ាស៊ីនតោន ដែលឆ្លុះបញ្ចាំងពីវប្បធម៌ក្រុងវ៉ាស៊ីនតោនជាទីជំនួបសម្រាប់រដ្ឋាភិបាល និងអ្នកដំណើរ»៕ AFP/HR