.jpg)
ការតុបតែងភោជនីយដ្ឋានតាមប្រពៃណីរុស្ស៊ីផ្ដល់នូវបរិយាកាសស្រស់ស្រាយប្លែកម្យ៉ាងដែរ។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ ដោយសារប្រទេសកំណើតមានការបែកចែកជាតិសាសន៍ជាច្រើន និងមានការណែនាំពីមិត្តភក្តិជាជនជាតិខ្មែរអំពីប្រទេសកម្ពុជាមានភាពងាយស្រួលក្នុងការរស់នៅ និងសម្បូរឱកាសប្រកបអាជីវកម្ម គ្រួសាររុស្ស៊ីមួយបានមករស់នៅលើទឹកដីកម្ពុជាដោយនាំយករសជាតិអាហារកំណើតខ្លួនធ្វើជាទុនបើកអាជីវកម្ម។
Irina''s Russian Restaurant បានចាប់ផ្តើមដំណើរការតាំងពីឆ្នាំ ១៩៩០ ដោយយកឈ្មោះហាងតាមអ្នកស្រី Irina Godlevskaya ជាម្ដាយរបស់អ្នកនាង សុខ អាលីហ្សា មកពីប្រទេសអ៊ូសបេគីស្ថាន។
គាវរុស្ស៊ី pelmeni មានរសជាតិប្លែកពីគាវបែបអាស៊ី។ រូបថត យូសុះ អាប់ឌុលរ៉ាស់ហ៊ីម
អ្នកនាង សុខ អាលីហ្សា ដែលមកមើលការខុសត្រូវភោជនីយដ្ឋានជំនួសម្ដាយជរាបានថ្លែងប្រាប់ ភ្នំពេញ ប៉ុស្តិ៍ ថា៖ «ពួកយើងមានមុខរបរជាច្រើនកាលនៅស្រុកកំណើត ប៉ុន្តែពួកយើងបានលក់គ្រប់យ៉ាងទាំងអស់ ដើម្បីមកចាប់ផ្តើមជីវិតថ្មីនៅទីនេះ (ប្រទេសកម្ពុជា) ហើយក៏បានបើកហាងអាហារនេះតិចតួចដោយចាប់ផ្តើមត្រឹមតែ ៤ តុប៉ុណ្ណោះ»។
ភោជនីយដ្ឋានរុស្ស៊ី Irina''s មានបម្រើអាហារ បន្លែ Olivier salad, vinegrets, beetroot walnuts salad (៤,៩ ដុល្លារ) Shuba salmon tsar pelmeni (៧,៥ ដុល្លារ) vareniki with potatoes or cabbage (៥,៥ ដុល្លារ) និង Golubtsy red sauce ឬ cream sauce (៥,៩ ដុល្លារ)។
សាច់ និងគ្រឿងផ្សំត្រូវបាននាំចូលពីប្រទេសរុស្ស៊ី ចំណែកឯបន្លែជាផលិតផលក្នុងស្រុកដោយត្រូវបានចម្អិនក្រោមស្នាដៃចុងភៅជាជនជាតិខ្មែរ។ ជារៀងរាល់ ៥ ឆ្នាំម្តងអ្នកនាង សុខ អាលីហ្សា តែងតែនាំចុងភៅពីប្រទេសរុស្ស៊ីមកបណ្ដុះបណ្ដាលចុងភៅខ្មែរបន្ថែមផងដែរ។
អាហារប្រពៃណីរុស្ស៊ីបន្ថែមដោយស្រាសប្រពៃណី។ រូបថត យូសុះ អាប់ឌុលរ៉ាស់ហ៊ីម
អ្នកនាង សុខ អាលីហ្សា ដែលមានសញ្ជាតិខ្មែរ និងប្រាថ្នារស់នៅកម្ពុជាជាអចិន្រៃ្តយ៍ បានឲ្យដឹងថា៖ «ខ្ញុំចង់ពង្រីកហាងនេះឲ្យកាន់តែធំ បន្ថែមជម្រើសម្ហូប និងការតុបតែងបែបរុស្ស៊ីមាននាំចូលវត្ថុមានតម្លៃជាច្រើនមុខមកតាំងនៅក្នុងហាង ហើយក៏ចង់បើកហាងលក់ស្រាបៀរស្រស់ផលិតភ្លាម ញ៉ាំភ្លាមៗតាមបែបរុស្ស៊ី»។
Irina''s Russian Restaurant ស្ថិតនៅផ្ទះលេខ ២២ ផ្លូវលេខ ២៩ ខាងក្រោយភោជនីយដ្ឋានម្លិះ មហាវិថីព្រះនរោត្តម៕
