The Phnom Penh Post Search

Search form

Logo of Phnom Penh Post newspaper Phnom Penh Post - ភ្លក្ស​មុខម្ហូប​ថ្ងៃ​ត្រង់​ឆ្នាំង​ក្ដៅ​ពិសេស នៅ​បាយមាន់​ទីនហ្វី




ភ្លក្ស​មុខម្ហូប​ថ្ងៃ​ត្រង់​ឆ្នាំង​ក្ដៅ​ពិសេស នៅ​បាយមាន់​ទីនហ្វី

មុខម្ហូប​កម្ដៅ​លើ​ចង្ក្រាន​ដី​សម្រាប់​ភ្ញៀវ​ចូលចិត្ដ​អាហារ​ក្ដៅ និង​មាន​តម្លៃ​ថោកសមរម្យ​។
មុខម្ហូប​កម្ដៅ​លើ​ចង្ក្រាន​ដី​សម្រាប់​ភ្ញៀវ​ចូលចិត្ដ​អាហារ​ក្ដៅ និង​មាន​តម្លៃ​ថោកសមរម្យ​។ រូបថត Charlotte Pert

ភ្លក្ស​មុខម្ហូប​ថ្ងៃ​ត្រង់​ឆ្នាំង​ក្ដៅ​ពិសេស នៅ​បាយមាន់​ទីនហ្វី

ភ្នំពេញ: សិស្ស​និស្សិត​ និង​បុគ្គលិក​ក្រុមហ៊ុន​កំពុង​តែ​អង្គុយ​​ស្រស់​ស្រូប​ម្ហូប​ក្ដៅៗ​កម្ដៅ​​​​លើ​ចង្ក្រាន​ធ្យូង​សម្រាប់​អាហារ​ថ្ងៃត្រង់​នៅ​ភោជនីយដ្ឋាន​បាយ​មាន់​ទីនហ្វី​។

លោក តាំង បុត្រឌី អាយុ​ ៣០ ឆ្នាំ ដែល​មាន​ភាគហ៊ុន​ម្នាក់​បាន​និយាយ​ថា ភោជនីយដ្ឋាន​រចនាប័ទ្ម​ជា​ផ្ទះ​ឈើ​នេះ​កាលពី​ ២ ​សប្ដាហ៍​មុន​បាន​បើក​លក់​ម្ហូប​លើ​ចង្ក្រាន​​ដី​សម្រាប់​​ថ្ងៃ​ត្រង់​ពិសេស​ក្នុង​តម្លៃ​ត្រឹម​តែ ៦ ពាន់​រៀល​។

មិន​ខុស​ពី​ភោជនីយដ្ឋាន​នានា​នៅ​​ភ្នំពេញ​រៀងរាល់​ថ្ងៃ​ភោជនីយដ្ឋាន​បាយ​មាន់​ទីនហ្វី​បាន​រៀបចំ​ម្ហូប​ ៦ ​មុខ​ប្លែកៗ ដូចជា ស្ងោរជ្រក់ ការី ឬ​ឆាសាច់ និង​បន្លែ​។

ប៉ុន្ដែ​ជំនួស​ដោយ​ការ​ដាក់​ចាន​ត្រជាក់​ ឬ​ក្ដៅ​ឧណ្ហៗ​អតិថិជន​ប្រើ​ចង្ក្រាន​ធ្យូង​ដើម្បី​កម្ដៅ​ម្ហូប​លើ​តុ​អាហារ​របស់​ពួកគេ​តែ​ម្ដង​។ ដោយ​បាន​បន្ថែម​បង្អែម​ជា​អាហារ​លាង​មាត់​ឥត​គិត​ថ្លៃ​សេវាកម្ម​ថ្មី​ម្ហូប​ក្ដៅ​នេះ​ពិតជា​កំពុង​ទទួល​បាន​ប្រជាប្រិយភាព​។

លោក​និយាយ​ថា​៖ «​យើង​ទទួល​ភ្ញៀវ​ប្រមាណ​ពី​ ២០០ ទៅ​ ៣០០ ​នាក់​ក្នុង​មួយ​ថ្ងៃៗ​ហើយ​ពួកគេ​ភាគច្រើន​រក​កន្លែង​លក់​អាហារ​មាន​តម្លៃ​ថោកសមរម្យ​​ និង​ក្ដៅ​ហុយៗ​ជាប់​ជានិច្ច​»។

លោក តាំងបុត្រឌី ជា​ម្ចាស់​ភោជនីយដ្ឋាន​បាយ​មាន់​ទីនហ្វី​ម្នាក់​ដែល​បង្កើត​គំនិត​ច្នៃប្រឌិត​។
លោក តាំងបុត្រឌី ជា​ម្ចាស់​ភោជនីយដ្ឋាន​បាយ​មាន់​ទីនហ្វី​ម្នាក់​ដែល​បង្កើត​គំនិត​ច្នៃប្រឌិត​។ Charlotte Pert

មិន​ត្រឹម​តែ​អាហារ​ក្ដៅៗ​ដែល​ជះ​ក្លិន​ប្រសើរ​ប៉ុណ្ណោះ​ទេ​ ប៉ុន្ដែ​ការ​រចនា​ភោជនីយដ្ឋាន​ក៏​ទិដ្ឋភាព​គួរ​ទាក់ទាញ​ចំណាប់​អារម្មណ៍​ផង​ដែរ​។

លោក បុត្រឌី បាន​បន្ដ​ថា​៖ «​ភ្ញៀវ​ភាគច្រើន​ពិតជា​ចូលចិត្ដ​ការ​រចនា​របស់​យើង​ណាស់​ ពីព្រោះ​វា​មាន​លក្ខណៈ​ធម្មជាតិ និង​ផាសុកភាព​ដូច​នៅក្នុង​ព្រៃ​អ៊ីចឹង​។ ដោយសារ​តែ​ពេល​រសៀល​មាន​សីតុណ្ហភាព​ក្ដៅ​យើង​ក៏​បាន​បំពាក់​ប្រព័ន្ធ​ទឹក​លើ​ដំបូល​ដើម្បី​កាត់​បន្ថយ​ការ​ភាយ​កម្ដៅ​ដល់​ភ្ញៀវ​កំពុង​ទទួលទាន​»។

លោក បុត្រឌី ថា មាន​ភោជនីយដ្ឋាន​យីហោ​បរទេស​ជាច្រើន​បើក​លក់​ក្នុង​រាជធានី​ភ្នំពេញ​ម្ចាស់​ភោជនីយដ្ឋាន​ក្នុង​ស្រុក​ត្រូវ​តែ​ចេះ​មាន​គំនិត​ច្នៃប្រឌិត​ខ្ពស់​ដើម្បី​ធ្វើការ​ប្រកួត​ប្រជែង​។

លោក​បាន​អះអាង​ថា តម្លៃ​ថោក​គឺជា​ទិសដៅ​សម្រាប់​អ្នក​មាន​ចំណូល​ទាប​ដែល​ចង់​ស្គាល់​របស់​ថ្មីៗ​។ «​យើង​ចង់​បង្កើត​អ្វី​ដែល​​ប្លែក​ពី​គេ​ និង​​ជំនួយ​សុខភាព​ដែល​មនុស្ស​សាមញ្ញា​អាច​មាន​លទ្ធភាព​។ មិន​អាច​និយាយ​ថា​យើង​បង្កើត​វា​មក​ដោយ​ចេញ​ពី​គំនិត​ខ្លួនឯង​ទាំង​ស្រុង​ទេ​។ ប៉ុន្ដែ​យើង​ព្យាយាម​ច្នៃប្រឌិត​ទាំង​ការ​តុបតែង និង​​សេវាកម្ម​បែប​ស្ទីល​ម្ហូបក្ដៅ​»។

ភោជនីយដ្ឋាន​បាយ​មាន់​ទីនហ្វី​មាន​ទីតាំង​នៅ​ផ្ទះ​ ៧៥ ផ្លូវ​ ៣១០ ដែល​ចាប់ផ្ដើម​ទ្វារ​ពី​ម៉ោង​ ៦ ​ព្រឹក​ដល់​ម៉ោង​ ៨ ​យប់ រៀងរាល់​ថ្ងៃ​៕ HR

អត្ថបទគួរចាប់អារម្មណ៍