ភ្នំពេញ៖ ដើមឫស្សី រុក្ខជាតិតូចធំ និងទ្រើងវល្លិស្លឹកបៃតង បានធ្វើឲ្យពន្លឺសូរ្យសែងថមថយកម្ដៅ និងជួយផ្ដល់ខ្យល់អាកាសបរិសុទ្ធដល់បណ្ដាភ្ញៀវ ដែលមកទទួលទានអាហារនៅភោជនីយដ្ឋានគ្មានប្លាស្ទិក Eleven One Kitchen ក្នុងសង្កាត់បឹងកេងកង ១។
បើកដំណើរការបានកន្លះទសវត្សរ៍ ជាមួយនឹងឆន្ទៈមិនប្រើប្រាស់ប្លាស្ទិក តាំងពីថ្ងៃដំបូង ម្ចាស់ភោជនីយដ្ឋាន អ្នកស្រី ស្រ៊ុន សុខលីម បានប្រាប់ ភ្នំពេញ ប៉ុស្ដិ៍ ថា៖ «ខ្ញុំមានការប្រើប្រាស់ប្រអប់កាកអំពៅនេះតាំងពីដើមដោយមិនប្រើប្លាស្ទិកទេ ប៉ុន្តែនៅពេលភ្ញៀវខ្មែរគាត់មកទិញគាត់និយាយថា ម្ហូបឆ្ងាញ់ ប៉ុន្តែថ្លៃណាស់គាត់ក៏ឈប់ទិញ។ បន្ទាប់មកក៏មានភ្ញៀវជាជនបរទេសគាត់មកហូបអ៊ីចឹងទៅ យូរៗទៅក៏ក្លាយទៅជាភោជនីយដ្ឋានដូចសព្វថ្ងៃនេះឯង»។
ភោជនីយដ្ឋានលក់តែម្ហូបខ្មែរនេះ ទទួលបានការគាំទ្រពីភ្ញៀវបរទេសរហូតដល់ ៩០ ភាគរយ ទាំងសេវាកម្មល្អ បរិស្ថានស្អាត ការវេចខ្ចប់ដោយប្រើចានស្លាបព្រាផលិតអំពីកាកអំពៅ និងថង់ផលិតពីរុក្ខជាតិងាយរលាយ។
វិន័យដ៏សំខាន់ចំពោះបុគ្គលិក Eleven One Kitchen គឺបម្រាមនាំយកថង់ប្លាស្ទិកចូលមកក្នុងភោជនីយដ្ឋានដាច់ខាតក្នុងលក្ខខណ្ឌណាមួយ លើកលែងតែថង់ដាក់កាកសំណល់ ដែលមិនអាចមានអ្វីប្រើជំនួសបានប៉ុណ្ណោះ។
ម្ចាស់ភោជនីយដ្ឋានវ័យ ៣៧ ឆ្នាំ បានរៀបរាប់ថា៖ «ភ្ញៀវភាគច្រើនជាជនបទេស ដោយមិនសូវមានប្រជាជនខ្មែរស្គាល់នោះទេ ប៉ុន្តែបើសិនជានៅក្នុងកម្មវិធីតូចធំដែលផ្តោតទៅលើការការពារបរិស្ថាន ប្រាកដជាមានគេស្គាល់ពីភោជនីយដ្ឋាននេះស្ទើរតែ ៩៩ ភាគរយ»។
មុននឹងក្លាយជាសហគ្រិនក្នុងវិស័យភោជនីយដ្ឋាន អ្នកស្រី ស្រ៊ុន សុខលីម ដែលបានបញ្ចប់ការសិក្សាផ្នែកគណនេយ្យ និងហិរញ្ញវត្ថុ ធ្លាប់បម្រើកការក្នុងហាងបរទេសរយៈពេល ១១ ឆ្នាំ និងទទួលបានគំនិតជំនួញបែបគិតគូរបរិស្ថានពីបទពិសោធការងារនេះ។
អ្នកស្រីបានរំឭកថា៖ «មេខ្ញុំគាត់ជាជនជាតិបែលហ្ស៊ិក ហើយនៅពេលយើងដើរទៅណាជាមួយគាត់ តែហ៊ានបោះសំរាមចោលគាត់នឹងស្តីឲ្យតែម្តង គាត់ខឹងយើង ដោយសារតែកន្លែងហ្នឹងជាកន្លែងខ្ញុំធ្វើការដំបូង ហើយក៏នៅបានយូរ ក៏ធ្វើឲ្យខ្ញុំឆ្លាក់ជាប់នូវទម្លាប់ដែលគាត់តែងតែប្រាប់ នៅពេលដែលខ្ញុំបើកកន្លែងខ្លួនឯងទើបខ្ញុំយកទម្លាប់ទាំងនោះមកប្រើតែម្តងទៅ»។
ក្នុងចំណោមបញ្ជីរាយនាម ម្ហូបពិសេសប្រចាំ Eleven One Kitchen ដែលភ្ញៀវចូលចិត្តពិសាដូចជា គួងផ្លែប៊័រ ៤ ដុល្លារ ឆាសាច់មាន់ស្វាយទុំ ៤,២៥ ដុល្លារ និងអាម៉ុកត្រី ញាំាំបង្គាកំពត មឹកបំពង គាវបង្គាបំពង ៤,៥០ ដុល្លារ ថែមទាំងមានភេសជ្ជៈ និងទឹកផ្លែឈើស្រស់ជាច្រើនមុខទៀតដូចជា ទឹកម្កាក់ និងត្របែក ទឹកឪឡឹក ទឹកក្រូច ទឹកផ្លែឈើសុខភាព ទឹកផ្លែឈើបៃតងសុខភាពជាដើមមានតម្លៃចាប់ពី ២ ដុល្លារ ដល់ ២,៧៥ ដុល្លារ។
អ្នកស្រីក៏សម្គាល់ផងដែរថា ភ្ញៀវបរទេសចង់សាកម្ហូបខ្មែរឆ្ងាញ់ៗ ដោយមានទំនុកចិត្តលើអនាម័យ។
អ្នកស្រីលើកឡើងថា៖ «បើតាមខ្ញុំគិត មូលហេតុដែលភ្ញៀវខ្ញុំភាគច្រើនជាបរទេស គឺមកពីទីនេះបរិយាកាសល្អខ្យល់បរិសុទ្ធ របស់ប្រើប្រាស់ជួយដល់បរិស្ថាន រឿងអនាម័យជាចម្បង។ កន្លែងខ្ញុំ គឺបើកផ្ទះបាយ (កន្លែងចម្អិន) ឲ្យភ្ញៀវមើល ឬចង់ចូលមើលក៏បាន សូម្បីតែធុងសំរាមក៏មិនមាននៅជិតកន្លែងចម្អិនដែរ វាអាចប៉ះពាល់ដល់អារម្មណ៍អ្នកញ៉ាំនៅពេលដែលឃើញកាកសំណល់ទាំងនោះ ពួកយើងព្យាយាមថែរក្សាបរិស្ថានទៅតាមអ្វីដែលអាចធ្វើទៅបាន បើសិនជាមិនចាំបាច់»។
ក្រៅពីមានរុក្ខជាតិហ៊ុមព័ទ្ធហាង នៅលើដំបូលក៏មានសួនបន្លែធម្មជាតិដែលបានទាក់ទាញភ្ញៀវចម្រុះជាតិសាសន៍ចូលមកទស្សនា និងស្តាប់អ្នកជំនាញផ្នែកកសិកម្មនៃការដាំបន្លែស្នេហាសុខភាព ដោយគ្មានជាតិគីមី។
បន្លែដែលបានដាំទុកសម្រាប់ផ្គត់ផ្គង់ផ្ទះបាយ ត្រូវបានអ្នកស្រី សុខលីម បញ្ជាក់ថា៖ «ការដាំបន្លែនេះខ្ញុំប្រគល់ការរ៉ាប់រងឲ្យជនជាតិខ្មែរ និងបរទេសជាអ្នកជំនាញ។ ចំណែកឯដីវិញ យើងបានទិញដីធម្មជាតិគេមកពីកោះដាច់ និងមានចិញ្ចឹមជន្លេនសម្រាប់យកដីផងដែរ។ ការដាំបន្លែនេះយើងមិនមានការប្រើប្រាស់ជីនោះទេ ហើយយើងបណ្តុះពូជដោយខ្លួនឯង ព្រោះបើទិញពីផ្សាររុក្ខជាតិនោះវាត្រូវការជីទើបអាចលូតលាស់បាន»។
ប៉ុន្តែដោយសារតែទំហំនៃទីតាំងដាំបន្លែមានទីធ្លាតូចពេក ទើបបន្លែលូតលាស់លើដំបូលទាំងនោះមិនគ្រប់គ្រាន់ក្នុងការផ្គត់ផ្គង់ក្នុងភោជនីយដ្ឋាន ដែលតម្រូវឲ្យអ្នកស្រីត្រូវជាវពីទីផ្សារបន្លែធម្មជាតិមកបំពេញបន្ថែម។ ចំណែកឯប្រភេទសត្វសមុទ្រដូចជាមឹក បង្គា ក្តាម ត្រូវបានទិញផ្ទាល់មកពីក្រុងព្រះសីហនុ។
ដោយសារកង្វះខាតនៃបន្លែធម្មជាតិផ្គត់ផ្គង់នៅក្នុងភោជនីយដ្ឋានអ្នកស្រី ស្រ៊ុន សុខលីម ក៏បានបង្ហើបឲ្យដឹងដែរថា៖ «នៅពេលខាងមុខនេះខ្ញុំនឹងធ្វើសួនបន្លែធម្មជាតិមួយដែលមិនប្រើប្រាស់ជីដាច់ខាត ខ្ញុំក៏បានទិញដីសម្រាប់ធ្វើវារួចហើយនៅឯខាងកោះដាច់ ហើយក៏មានគម្រោងធ្វើជាផ្ទះតូចៗនៅជិតមាត់ទឹកសម្រាប់ភ្ញៀវទៅលម្ហែ។ ក្នុងសួនបន្លែនេះ មិនត្រឹមតែដាំបន្លែនោះទេ ខ្ញុំក៏ចង់ចិញ្ចឹមមាន់ ជ្រូក សម្រាប់ផ្គត់ផ្គង់សាច់នៅក្នុងភោជនីយដ្ឋានខ្ញុំផងដែរ»។
Eleven One Kitchen បើកចាប់ពីម៉ោង ៧ ព្រឹក រហូតដល់ម៉ោង ៩:៣០ យប់ មាន ២ សាខា គឺ ស្ថិតនៅសង្កាត់បឹងកេងកង ១ (បម្រើតែម្ហូបខ្មែរ) ផ្លូវលេខ ៣៣៤ និង ស្ថិតនៅសង្កាត់ទួលទំពូង (មានម្ហូបបរទេស) ផ្លូវលេខ ៤៦០ ឬក៏ទាក់ទងទូរស័ព្ទលេខ ០៨៦ ៥១៦ ១១១៕