.jpg)
ទិដ្ឋភាពភោជនីយដ្ឋានខ្មែរថាច់នៅក្បែរផ្សារចាស់ និងផាប់ស្ទ្រីត។ ហុង មិនា
សៀមរាប: ស្ថិតនៅតំបន់ប្រជុំជនក្បែរផ្សារចាស់ និងផាប់ស្ដ្រីតដ៏សម្បូរភ្ញៀវជាតិ និងអន្ដរជាតិធ្វើដំណើរឆ្លងកាត់ ខ្មែរថាច់ ជាភោជនីយដ្ឋានម្ហូបបែបប្រណីតដែលបានបន្ថែមរសជាតិបរទេសក្នុងតារាងម្ហូប ដើម្បីទាក់ទាញភ្ញៀវមកពីជុំវិញពិភពលោក។
សាច់គោជាមួយដំឡូងបារាំងបំពង ឬស្ដេកជាមុខម្ហូបបែបបស្ចឹមប្រទេសដ៏ល្បីល្បាញលើពិភពលោកត្រូវបានដាក់បញ្ចូលក្នុងតារាងម្ហូប ដើម្បីផ្គាប់ចិត្ដភ្ញៀវដែលចង់ភ្លក្សអាហារអឺរ៉ុបក្នុងភោជនីយដ្ឋានបែបខ្មែរ។
លោក កែវ វុទ្ធី មេចុងភៅនៅភោជនីយដ្ឋាន ខ្មែរថាច់ បានរៀបរាប់អំពីគ្រឿងផ្សំថាសាច់គោអូស្ដ្រាលីទម្ងន់ ១៨០ ក្រាមដែលត្រូវប្រឡាក់ជាមួយអំបិល ម្រេច និងស្លឹកតែម (រុក្ខជាតិគ្រឿងទេស) លាយស្រាក្រហមបន្ដិច ទុក ៥ នាទី រួចអាំងលើខ្ទះក្ដៅ។
មេចុងភៅមានបទពិសោធក្នុងផ្ទះបាយជាង ២០ រូបនេះបានបន្ដថា៖ «ចំពោះការចម្អិន អតិថិជនអាចជ្រើសរើសប្រភេទស្ទើរឆៅ (Rare) ដុតរយៈពេល ១ នាទីម្ខាង ឆ្អិនល្មម (Medium) រយៈពេល ៣ នាទីម្ខាង និងឆ្អិនល្អ (Well-done) រយៈពេល ៤-៥ នាទីម្ខាង។
ទឹកជ្រលក់យកឆ្អឹងគោទៅដុតរួចរម្ងាស់ជាមួយនឹងបន្លែទឹក ៣ យកទឹក ១ (Brown Stock)។ យើងត្រងយកតែទឹកធ្វើជាទឹកជ្រលក់។ ម្រេចខ្ចីសង្កត់ឲ្យសំប៉ែត ហាន់ខ្ទឹមក្រហម ខ្ទឹមបារាំងឲ្យល្អិតៗ សាតេ (ឆា) ជាមួយប៊ឺដាក់ម្រេច បន្ថែមអំបិល ស្រាក្រហម រួចយកទឹកឆ្អឹងគោចាក់ចូល។ រម្ងាស់ពី ៣ ទៅ ៤ នាទីឲ្យរាងខាប់។
បន្លែ ការ៉ុត ផ្កាខាត់ណា ផ្កាខាត់ណាបៃតង (ប្រូខូលី) សាតេជាមួយប៊័រ អំបិល និងម្រេចបន្ថែមស្រាទំពាំងបាយជូរសបន្ដិច និងដំឡូងបារាំងបំពង។ យើងនៅមានដំឡូងកិនដែលយើងប្រើប្រាស់ដំឡូងជ្វា ពីព្រោះដំឡូងជ្វាមានរសជាតិផ្អែម និងល្មួតជាងដំឡូងបារាំង។
សាច់គោអូស្ដ្រាលី ដំឡូងបារាំងបំពង ឬ Steak នៅភោជនីយដ្ឋានខ្មែរថាច់ មានតម្លៃ ១៨ ដុល្លារក្នុង ១ ចាន។ លោក វុទ្ធី បានណែនាំថា៖ «ប្រាកដណាស់ ស្ដេក ជាប្រភេទសាច់ក្រហម វាស័ក្ដិសមជាមួយស្រាទំពាំងបាយជូរក្រហម សម្រាប់អ្នកនិយមក្រេបគ្រឿងស្រវឹងតិចតួចអំឡុងពេលបាយ»។
តោះភ្លក្សសាច់គោអូស្ដ្រាលី ឬស្ដេករួមទាំង មុខម្ហូបខ្មែរ និងបរទេសជាច្រើនទៀតនៅភោជនីយដ្ឋាន ខ្មែរថាច់ស្ថិតនៅលើវិថីស៊ីវត្ថាតំបន់បរិវេណផ្សារចាស់ ក្នុងទឹកដីសៀមរាប ឬទាក់ទងទូរស័ព្ទលេខ ០៦៣ ៧៦ ៥៦ ៨៩៕
