ភ្នំពេញ៖ ជាមួយគោលការណ៍ផ្ដល់អារម្មណ៍កក់ក្តៅ និងភាពឯកជនអតិថិជនគ្រប់រូប ភោជនីយដ្ឋានជប៉ុន រ៉ុគុ មិនត្រឹមតែល្បីម្ហូបឆ្ងាញ់ និងគុណភាពខ្ពស់ប៉ុណ្ណោះទេ ថែមទាំងជាទីធ្លាប់ស្វាគមន៍តារាហូលីវូដដ៏ល្បីល្បាញ អ្នកនាង អេនជឺលីណា ជោលី និងអ្នកចាត់ការទូទៅក្រុមជម្រើសជាតិកម្ពុជា លោក គេស៊ូកេ ហុងដា ផងដែរ។
ស្ថិតនៅលើដងវិថីត្រសក់ផ្អែម ភោជនីយដ្ឋានជប៉ុននេះ មានការរចនាប័ទ្មជញ្ជាំងឫស្សី និងអំពូលគោមភ្លឺស្រទន់។ តុមានការបិទបាំងវាំងននយ៉ាងសមរម្យ និងមានបន្ទប់ទទួលទានចំនួន ៥ នៅជាន់ខាងលើ។
ស្ថិតនៅក្នុងសាល ដែលមានដាក់តាំងរូបថតបុគ្គលល្បីៗ និងភ្ញៀវគ្រប់វ័យ អ្នកនាង ម៉ិច បញ្ញា សហស្ថានិកនៃភោជនីយដ្ឋានជប៉ុន រ៉ុគុ បានប្រាប់ ភ្នំពេញ ប៉ុស្តិ៍ ឲ្យដឹងថា កន្លែងរបស់អ្នកនាងផ្តោតសំខាន់ទៅគុណភាព អនាម័យ ការផ្តល់ភាពកក់ក្តៅ និងភាពឯកជនដល់ភ្ញៀវ ដោយទុកអតិថិជនទាំងអស់ជាភ្ញៀវវីអាយភី។
សហស្ថាបនិកដែលបញ្ចប់ការសិក្សាផ្នែកទេសចរណ៍ និងធ្លាប់សិក្សានៅប្រទេស ជប៉ុន រូបនេះបានរំឭកពីវត្តមានបុគ្គលល្បីៗមកកាន់ហាង រ៉ុគូ យ៉ាងដូច្នេះថា៖ «ដូចជា អេនជឺលីណា ជោលី គាត់អញ្ជើញមកហាងយើងនៅពេលដែលគាត់ត្រូវមកថតនៅខ្មែរយើង ពួកយើងមានការស្វាគមន៍គាត់ដូចជាភ្ញៀវទូទៅដែរ។ ចំណែក ហុងដា គាត់មកហាងយើង ភាគច្រើនមកនិយាយរឿងអាជីវកម្មរបស់គាត់។ ខ្ញុំបានផ្តិតរូបថតពួកគាត់តាំងនៅក្នុងហាង ដោយសារមានការអនុញ្ញាតពីម្ចាស់រូបថត ទើបយើងហ៊ានក្នុងការបង្ហាញជាសាធារណៈបែបនេះ»។
អ្នកនាង បញ្ញា បានបញ្ជាក់ផងដែរថា អាហារជប៉ុននៅទីនេះ សម្បូរបែបទាំង ម្ហូបឆៅ ម្ហូបឆ្អិន និងស៊ុបផងដែរ។
សម្រាប់ពេលថ្ងៃមានដូចជា Kaisen-Don (១២ ដុល្លារ) Nigiri Sushi Set (១៤ ដុល្លារ) Salmon & Ikura-Don (៩,៨ ដុល្លារ) Tonpei Yaki (៦,៨ ដុល្លារ) Salmon Yaki, Saba Yaki (៧ ដុល្លារ) ព្រមទាំងមានមុខម្ហូបជាច្រើនទៀតសម្រាប់ជ្រើសរើស។
ភោជនីយដ្ឋានជប៉ុន រ៉ុគុ ក៏មានមុខម្ហូបសម្រាប់ពេលល្ងាចជាច្រើន និងជាមុខម្ហូបពិសេសប្រចាំហាងដូចជា Tori-Karaage (៦ ដុល្លារ) Sukiyak Niku Tofu, Carifornia Roll (៨ ដុល្លារ) Tomato Salad (៤,៥ ដុល្លារ) Sashimi Mori Matoso (៤៧ ដុល្លារ) Kaki Fried (អយស្ទ័របំពង ៥ ដុល្លារ) និង Tako Yaki (នំគ្រក់ជប៉ុន ៤,៥ ដុល្លារ)។
ទោះបីជាចុងភៅនៃភោជនីយដ្ឋានជប៉ុន រ៉ុគុ ជាជនជាតិកម្ពុជាក៏ពិតមែន ប៉ុន្តែអ្នកនាង ម៉ិច បញ្ញា បញ្ជាក់ពីការរក្សារសជាតិដើមថា៖ «ហាងយើង គឺមានភាគហ៊ុនរវាងខ្មែរ និងជប៉ុន អ៊ីចឹងហើយនៅក្នុង ១ ខែ យ៉ាងហោចណាស់ក៏មានមេចុងភៅនៅជប៉ុនមកបង្រៀន ២ ដងដែរ។ ចំណែកឯដៃគូជំនួយខ្ញុំជាជនជាតិជប៉ុន គាត់មកតេស្តរហូត ព្រោះថាយើងជាជនជាតិខ្មែរ បើសិនជាម្ហូបហ្នឹងខុសរសជាតិបន្តិចក៏យើងមិនដឹងដែរ ប៉ុន្តែបើសិនជាជនជាតិម្ចាស់ដើមរសជាតិគេតែម្តងគេប្រាកដជាដឹង»។
សហស្ថាបនិករូបនេះ បានឲ្យដឹងទៀតថា គ្រឿងផ្សំមួយភាគធំត្រូវបាននាំយកពីជប៉ុន ខណៈសាច់គោ សាច់មាន់ សាច់ជ្រូក ភាគច្រើនជាផលិតផលអាមេរិក។
យ៉ាងណាមិញ អ្នកនាង ម៉ិច បញ្ញា បញ្ជាក់ថា៖ «ក្រៅពីនោះយើងព្យាយាមប្រើរបស់នៅក្នុងស្រុក ដោយមិនប្រើពាក្យថា របស់ធម្មជាតិសុទ្ធនោះទេ ដូចដឹងស្រាប់ហើយថា នៅយើងមិនទាន់មានការបញ្ជាក់ថារបស់ណាធម្មជាតិ របស់ណាមិនធម្មជាតិនៅឡើយ ដូចជាស្ពៃក្តោបយើងព្យាយាមទិញពីកសិករខ្មែរយើង ទោះបីជាមានតម្លៃថ្លៃជាងរបស់នាំចូលពីប្រទេសជិតខាងក៏ដោយ»។
បើកដំណើរការអស់រយៈពេល ៤ ឆ្នាំ ភោជនីយដ្ឋានជប៉ុន រ៉ុគូ ទទួលបានភ្ញៀវគ្រប់ជាតិសាសន៍ ជាពិសេសជនជាតិខ្មែរ និងជប៉ុន។
ជាមួយកាតសមាជិកតម្លៃ ៦ ដុល្លារ ភ្ញៀវអាចទទួលបានការបញ្ចុះតម្លៃ ២០ ភាគរយ ពេញ ១ ឆ្នាំ។ លើសពីនេះទៅទៀតជារៀងរាល់ខែ ក៏មានការបញ្ចុះតម្លៃរហូតដល់ ៥០ ភាគរយ ចំនួន ៦ ថ្ងៃ សម្រាប់ភ្ញៀវជាសមាជិកដោយសហស្ថាបនិករូបនេះបញ្ជាក់ថា កម្មវិធីបញ្ចុះតម្លៃនេះពាក់ព័ន្ធជាមួយឈ្មោះហាងផងដែរ។
អ្នកនាង ម៉ិច បញ្ញា បានឲ្យដឹងថា៖ «ដោយ រ៉ុគុ ក្នុងភាសាជប៉ុនប្រែថា សុភមង្គល ប៉ុន្តែលំនាំសូរសៀងរបស់វាស្មើនឹងលេខ ៦ និងលេខ ៩ ពេលយើងរាប់កាត់។ ក្នុងភាសាជប៉ុន រ៉ុ គឺលេខ ៦ ចំណែក គុ គឺលេខ ៩ អ៊ីចឹងហើយយើងក៏ជ្រើសថ្ងៃដែលមានលេខ ៦ និងលេខ ៩ ជាថ្ងៃពិសេសសម្រាប់ហាងយើង ដូចជាថ្ងៃ ៦, ៩, ១៦, ១៩, ២៦ និង ២៩ ដោយហៅថា Roku Day»។
ចាប់បើកពីម៉ោង ១១:៣០ នាទីព្រឹក ដល់ម៉ោង ១១ យប់ ភោជនីយដ្ឋាន ជប៉ុន រ៉ុគុ ស្ថិតនៅផ្ទះលេខ ៥៣B ផ្លូវលេខ ៦៣ សង្កាត់បឹងរាំង ខណ្ឌដូនពេញ។ ទំនាក់ទំនង ទូរស័ព្ទលេខ ០៩៥ ៤៦០ ០៧៧ និងហ្វេសប៊ុកផេច Japanese Restaurant Roku៕
វីដេអូ៖