The Phnom Penh Post Search

Search form

Logo of Phnom Penh Post newspaper Phnom Penh Post - ភ្លក្ស​បង្អែម​ខ្មែរ​ក្នុង​បរិយាកាស​​​ទំនើប​នៅ​ហាង «ទឹកស្ករ»




ភ្លក្ស​បង្អែម​ខ្មែរ​ក្នុង​បរិយាកាស​​​ទំនើប​នៅ​ហាង «ទឹកស្ករ»

លោក គឹម រស្មី ជា​ម្ចាស់​ហាង​ចាក់​បង្អែម​ជូន​ភ្ញៀវ​។
លោក គឹម រស្មី ជា​ម្ចាស់​ហាង​ចាក់​បង្អែម​ជូន​ភ្ញៀវ​។ ឈឹម ស្រីនាង

ភ្លក្ស​បង្អែម​ខ្មែរ​ក្នុង​បរិយាកាស​​​ទំនើប​នៅ​ហាង «ទឹកស្ករ»

ភ្នំពេញ: បង្អែម​​ខ្មែរ​ប្រមាណ​ ២០ ​មុខ​ត្រូវ​បាន​ហាង «ទឹកស្ករ» ពាំនាំ​​រសជាតិ​មក​បំពេញ​ចិត្ត​អតិថិជន​ក្នុង​បរិយាកាស​​ទទួលទាន​ដ៏ទំនើប និង​តម្លៃ​ថោក​សមរម្យ។

នៅក្នុង​ហាង ទឹកស្ករ ក្រៅពី​មាន​រសជាតិ​បង្អែម​​ឆ្ងាញ់​ប្លែក តុ​កៅអី និង​បរិក្ខារ​តុបតែង​ក៏​រឹតតែ​ទាក់ទាញ​អាច​ឲ្យ​ភ្ញៀវ​ទាំងឡាយ​អង្គុយ​ជជែក​គ្នា​លេង​បណ្ដើរ​រីករាយ​នឹង​ញ៉ាំ​បង្អែម​តាម​ចំណូល​ចិត្ត​បណ្ដើរ។

អំពូល​ភ្លើង​រំយោល​ពណ៌​ខ្មៅ​​បញ្ចេញ​ពន្លឺ​ភ្លើង​លឿង​ស្រទន់​សម​នឹង​គ្រឿង​សង្ហារិម​ឈើ​មាន​ទាំង​តុ​តូច​សម្រាប់​គ្នា​ ២ ​នាក់ និង​តុ​វែង​សម្រាប់​អង្គុយ​ជា​ក្រុម​ផង​ដែរ​។

ដើម្បី​សម្រួល​ដល់​ការ​កុម្ម៉ង់​រូបថត​បង្អែម​គ្រប់​មុខ​ត្រូវ​បាន​តាំង និង​បំភ្លឺ​ដោយ​​ភ្លើង​យ៉ាង​ច្បាស់​គួរ​ឲ្យ​ទាក់​ភ្នែក​អ្នក​ចូល​មក​ទទួលទាន។ រីឯ​នៅ​កន្លែង​បុគ្គលិក​ឈរ​វិញ​ថាស​បង្អែម​ជាច្រើន​តម្រៀប​គ្នា​បង្ហើរ​ក្លិន​ក្រអូប​បែប​ផ្អែម​គួរ​ឲ្យ​ចង់​ស្រង់​ក្លិន និង​ភ្លក្ស​រសជាតិ​តែ​ម្ដង។

ចាខ្វៃក្ដៅ​ជ្រលក់​ទឹកខ្ទិះ​ទុរេន និង​ស្លឹកតើយ​។
ចាខ្វៃក្ដៅ​ជ្រលក់​ទឹកខ្ទិះ​ទុរេន និង​ស្លឹកតើយ​។ ឈឹម ស្រីនាង

ផ្លែ​ឈើ​ស្រស់ៗ​ជាង ១០ មុខ​ត្រូវ​បាន​រៀប​នៅក្នុង​ចាន​មាន​ពងមាន់​ក្រហម​ស្រូប​ដោយ​ទឹកស្ករ និង​ខ្ទិះដូង​មើល​​ទៅ​​គូរ​ឲ្យ​ចង់​ទទួលទាន។ បង្អែម​ផ្លែឈើ​គ្រប់មុខ​នេះ​មាន​ឈ្មោះ​ល្បី​នៅក្នុង​ហាង ទឹកស្ករ តែ​ម្ដង។

ដៃ​រវល់​ចាប់​បង្អែម​​​ដាក់​ចាន លោក គឹម រស្មី ជា​ម្ចាស់​ហាង​រៀបរាប់​ថា៖ «​​ម្តាយ​របស់​ខ្ញុំ​គាត់​​មាន​​បទពិសោធ​ធ្វើ​បង្អែម​ខ្មែរ​លក់​ជាង ៣៥ ឆ្នាំ​មក​ហើយ​បង្អែម​របស់​គាត់​ល្បី​ខ្លាំង​នៅ​តាខ្មៅ។ អ្នក​ណាៗ​ក៏​គេ​ទៅ​ញុំា​​នៅ​ទី​នោះ​ដែរ​ហើយ​ខ្ញុំ​តែងតែ​ជួយ​លក់​គាត់​បន្ទាប់ពី​រៀន»។

ម្ចាស់​ហាង​វ័យក្មេង​រូប​នេះ​រៀបរាប់​បន្ត​ទៀត​ថា៖ «នៅ​ចុង​ឆ្នាំ​ ២០១៤ ​​មិត្តភ័ក្តិ​ច្រើន​ផ្តល់​គំនិត​ឲ្យ​ខ្ញុំ​បើក​ជា​ហាង​លក់​បង្អែម​ដែល​មាន​​កន្លែង​ស្រស់​ស្អាត​មាន​ផាសុកភាព​មិន​រញ៉េរញ៉ៃ​​ដូច​តាម​ដង​ផ្លូវ​ហើយ​ណា​មួយ​ចង់​រក្សា​នូវ​ស្នាដៃ​រសជាតិ​បង្អែម​របស់​ម្តាយ​ឲ្យ​​ស្ថិតស្ថេរ​ក៏​សម្រេច​​ចិត្ត​បើក​ហាង​បង្អែម​​​ឈ្មោះ​ថា ទឹកស្ករ នេះ»។

ទិដ្ឋភាព​ហាង​ «ទឹកស្ករ» មាន​ការ​តុបតែង​បែប​ទំនើប​មិន​ចាញ់​ហាង​កាហ្វេ​លំដាប់​ខ្ពស់​។
ទិដ្ឋភាព​ហាង​ «ទឹកស្ករ» មាន​ការ​តុបតែង​បែប​ទំនើប​មិន​ចាញ់​ហាង​កាហ្វេ​លំដាប់​ខ្ពស់​។ ឈឹម ស្រីនាង

ក្នុង​ហាង​មាន​បម្រើ​នូវ​បង្អែម​ខ្មែរ​ប្រមាណ​ជាង​ ២០ ​មុខ​ដូចជា បង្អែម​ខ្មែរ​គ្រប់មុខ បបរ​ត្រាវ បាញ់ចានឿក បាយដំណើប​សង់ខ្យាទុរេន បបរ​ពោត នំ​ម្សៅកាត់​ទន់​ស្វិត​លាយ​ផ្លែ​មៀន​ផ្អែម​ក្រអូប សាច់​ខ្នុរ​ស្រស់ និង​គ្រាប់​ទទឹម បបរ​សណ្តែក​ក្រហម​ ឬ​ខៀវ បង្អែម​ផ្លែឈើ បបរ​ចាដូវ ចាខ្វៃ​ក្តៅ​ជ្រលក់​ទឹកខ្ទិះ​ទុរេន និង​ទឹក​ស្លឹក​តើយ និង​បង្អែម​ជាច្រើន​មុខ​ទៀត។ ក្រៅពី​បង្អែម​ហាង​ក៏​មាន​លក់​​នំបុ័ង​ដាក់​សាច់​ជា​អាហារ​សម្រន់​ផង​ដែរ។

បង្អែម​មួយ​ចាន​តម្លៃ​ ៤ ​ពាន់​រៀល​លើកលែង​តែ​សង់ខ្យាទុរេន តម្លៃ​ ១,២ ​ដុល្លារ​។ ហាង​បង្អែម​ ទឹកស្ករ ស្ថិត​នៅ​ផ្លូវ​ ៣៦០ ទល់មុខ​ស្ថានីយ​ពន្លត់​អគ្គិភ័យ៕

អត្ថបទគួរចាប់អារម្មណ៍