ភ្នំពេញ : ទោះបីរដូវកាលនេះជារដូវភ្លៀងក៏ដោយតែសង្កេតឃើញម៉ូតូឡានតូចធំចតត្រៀបត្រាពេញតែមុខហាងមួយដែលគេល្បីតៗគ្នាថាបុកល្ហុងក្តាមសេះឆ្ងាញ់។
នៅទីនោះមិនថាចាស់ក្មេងទេគឺមកញ៉ាំបុកល្ហុងនៅទីនេះឃើញមានអ្នកខ្លះមកជាគ្រួសារខ្លះទៀតមកជាលក្ខណមិត្តភក្តិ។ហាងបុកល្ហុងយីហោ«សម្ផស្ស»នេះមានឈ្មោះល្បីយូរដែរមកហើយនិងនៅតែមានមនុស្សមកញ៉ាំច្រើនកុះករដដែលគឺដោយសារតែរក្សាបាននូវផាសុកភាពសេវាកម្មឆាប់រហ័សនិងរាក់ទាក់។
ដោយសារតែសម្បូរភ្ញៀវច្រើនពេកទើបយើងសង្កេតថាមានអ្នកបុកដល់ទៅ៤នាក់ ហើយម្នាក់ៗគឺបុកយ៉ាងញាប់ដៃតែម្ដង។ហាងសម្ផស្សល្បីល្បាញបុកល្ហុងក្តាមសេះមួយនេះមិនត្រឹមតែមានបុកល្ហុងនោះទេគឺមានបុកមីសួបុកនំបញ្ចុកបុកផ្លែឈើស្លាបមាន់អាំងបាយដំណើប និងភ្លៅមាន់អាំងជាដើម។
យើងបានទៅកុម្ម៉ង់បុកល្ហុងក្តាមសេះបុកមីសួបុកល្ហុងក្តាមប្រៃធម្មតាដើម្បីទទួលទានជាមួយស្លាបមាន់អាំង និងបាយដំណើបដាក់ក្នុងស្មុគ។
អង្គុយចាំប្រមាណជា១០នាទីអ្នកបម្រើសេវានៅទីនោះបានលើកបុកល្ហុកក្តាមសេះមកមុនគេគ្រាន់តែក្លិនឈ្ងុយកាពិ និងក្តាមសេះគឺធ្វើឲ្យយើងទាំងអស់គ្នាទប់ទឹកមាត់ស្ទើរតែមិនបាន។
រសជាតិរបស់វាហឹររីឯសាច់ល្ហុងវិញទន់ស្រួយបន្តិចជាមួយ។ក្តាមសេះឆៅរួមផ្សំគ្រឿងកាពិស្ករសទឹកត្រីខ្ទឹមសនិងសណ្តែកដីគឺពិតជាមានរសជាតិឆ្ងាញ់មែនទែននៅពេលដែលញ៉ាំវាផ្ទាប់ជាមួយសាច់មាន់ និងបាយដំណើប។
បុកល្ហុងក្តាមសេះមួយចានមានតម្លៃ២ដុល្លារ រីឯឈុតស្លាបមាន់បាយដំណើបនិងបុកក្តាមសេះគឺតម្លៃ១២៥០០រៀល។ ចំណែកឯបុកល្ហុងធម្មតាក្តាមប្រៃវិញគឺប្រមាណជា១ដុល្លារ។ហាងសម្ផស្សមានទីតាំងស្ថិតនៅផ្លូវ៣៣៨នៅក្បែរវិទ្យាល័យទួលស្វាយព្រៃ៕
