The Phnom Penh Post Search

Search form

Logo of Phnom Penh Post newspaper Phnom Penh Post - ភ្លាបង្គា​កោះកុង​ក្ទម្ពទេស ​ស្រូប​ម្ទេស​ពីរ​ពណ៌​ នៅ​ទួលគោក​ពិភពសាច់អាំង ៤




ភ្លាបង្គា​កោះកុង​ក្ទម្ពទេស ​ស្រូប​ម្ទេស​ពីរ​ពណ៌​ នៅ​ទួលគោក​ពិភពសាច់អាំង ៤

Content image - Phnom Penh Post
បង្គា​ឆៅ​ញ៉ាំ​ជាមួយ​ខ្ទឹម​ក្រហម​បំពង និង​ក្ទម្ពទេស​ដូច​អយស្ទ័រ​។ ឈឹម ស្រីនាង

ភ្លាបង្គា​កោះកុង​ក្ទម្ពទេស ​ស្រូប​ម្ទេស​ពីរ​ពណ៌​ នៅ​ទួលគោក​ពិភពសាច់អាំង ៤

ភ្នំពេញ: ស្ថិត​នៅ​ម្ដុំ​សាលា​បឋម​សិក្សា​ទួលគោក ភោជនីយដ្ឋាន «ទួលគោក​ពិភព​សាច់អាំង ៤ » មាន​បម្រើ​នូវ​គ្រឿង​សមុទ្រ និង​សាច់​អាំង​ជា​ច្រើន​ប្រភេទ។

នៅ​ខាង​ក្នុង​ហាង​មាន​តុ​កៅអី​ទាបៗ​ដោយ​មាន​ចង្ក្រាន​ដី និង​ចង្អើរ​ដែក​សម្រាប់​ឲ្យ​ភ្ញៀវ​អង្គុយ​អាំង​គ្រឿងសមុទ្រ​ស្រស់ៗ​តម្រូវ​តាម​ចិត្ត​រៀងៗ​ខ្លួន។

បន្ថែម​ពី​លើ​ជម្រើស​សាច់អាំង​មាន​ក្ដាម ខ្យង បង្គា មឹក ជើង​មាន់ សាច់គោ សាច់ជ្រូក​បី​ជាន់ កង្កែប ងាវ ត្រី​ចំហុយ ពោត​បារាំង ដែល​សុទ្ធសឹង​តែ​ប្រឡាក់​ម្ទេស​ហឹរ​ក្រហម​ច្រាល​សម្រាប់​អាំង​លើ​ចង្អើរ​ក្ដៅ​ភ្លាមៗ​នោះ ​ភ្ញៀវ​ក៏​មាន​ជម្រើស​កុម្ម៉ង់​ម្ហូប​គ្រឿង​សមុទ្រ​ប្លែកៗ​ដទៃ​ទៀត​ដែល​កម្រ​មាន​លក់​នៅ​តាម​បណ្ដា​ហាង​សាច់​អាំង​​នៅ​រាជធានី​ភ្នំពេញ។

ម្ហូប​ប្លែកៗ​ទាំងនោះ​មាន​ដូចជា​ ស៊ុប​បបែល​ឆ្នាំង​ដី ញាំ​ខ្យង​ជីរ​ពងទា​កូន ខ្យង​ប្រឡាក់​អំបិល​ម្ទេស​ចំហុយ កាំ​ប្រមា​សមុទ្រ​ញ៉ាំ​ជាមួយ​អំបិល​ម្ទេស និង​បង្គា​កោះកុង​ញ៉ាំ​ស្ទីល​បែប​អយស្ទើរ ជា​ដើម។

ខុស​ប្លែក​ពី​បង្គា​កោះកុង​ទូទៅ​ដែល​មានតែ​បង្គា​ស្រស់ និង​ទឹក​ជ្រលក់​ខ្ទឹមស​ហឹរ​ នៅ​ហាង​ទួលគោក​ពិភព​សាច់​អាំង ៤ បង្គា​កោះ​កុង​មាន​ភ្ជាប់​បន្លែ​ក្ទម្ពទេស ខ្ទឹម​ក្រហម​បំពងដ៏​ឈ្ងុយ​ ម្ទេស​ក្រហម និង​ម្ទេស​បៃតង​ចិញ្ច្រាំ​ស្រូប​ទឹក​ត្រី​​ធ្វើ​ឲ្យ​រសជាតិ​ហឹរ​អស់ទាស់តែ​ម្ដង។

​បង្គា​កោះកុង​ក្ទម្ពទេស​នេះ​មាន​តម្លៃ​៤​ដុល្លារ​​ទួលគោក​ពិភព​សាច់​អាំង ៤ ស្ថិតនៅ​ផ្លូវ ៥៦៦ កាច់​តាម​ស្ដុប​សាលាបឋមសិក្សា​ទួលគោក៕​

អត្ថបទគួរចាប់អារម្មណ៍