.jpg)
អតិថិជនដែលមិនចង់ទៅដល់ភោជនីយដ្ឋាន ពួកគេអាចកុម្ម៉ង់ម្ហូបអាហារ និងភេសជ្ជៈពី ភ្លេងច័ន្ទ យកទៅទទួលទាននៅផ្ទះបាន។ រូបថត យូរសុះ អាប់ឌុលរ៉ាស់ហ៊ីម
ភ្នំពេញ៖ លម្អដោយវល្លិ៍រំយោលតាមពិដាន រុក្ខជាតិបៃតងស្ទើរតែគ្រប់ជ្រុង និងកណ្ដឹងខ្យល់បន្លឺសំឡេងស្រាលស្រទន់ ហាងកាហ្វេ ភ្លេងច័ន្ទ ជាទីស្ងប់ស្ងាត់សម្រាប់អ្នកចូលចិត្តអានសៀវភៅ និងអ្នកស្នេហាធម្មជាតិ មកអង្គុយក្រេបភេសជ្ជៈ ភ្លក្សបង្អែម និងអាហារឆ្ងាញ់ៗជាច្រើនជម្រើស។
ការរចនាដើមឈើ ភ្លេងច័ន្ទ ជាភាពទាក់ទាញមួយនៅក្រុង ដែលផ្ដល់ភាពស្រស់ស្រាយ រំសាយស្ត្រេស។
យ៉ាងណាមិញ ដោយមនុស្សជាច្រើនត្រូវបានណែនាំឲ្យធ្វើការនៅផ្ទះ និងកាត់បន្ថយការចេញក្រៅ ទោះជាអតិថិជនដែលជាប់ចិត្តនឹងរសជាតិអាហារ និងភេសជ្ជៈរបស់ ភ្លេងច័ន្ទ នៅតែអាចធ្វើការកុម្ម៉ង់ញ៉ាំនៅផ្ទះ។
អាហារល្បីប្រចាំហាង ដែលអតិថិជននិយមកុម្ម៉ង់ច្រើនជាងគេ មាន បាយស្រូបសាច់ជ្រូកពងទាខ និងពងទាចៀន (២,៨៥ និង ៣,២៥ ដុល្លារ) ខគោនំប៉័ង (៤,៤៥ ដុល្លារ) គុយទាវភ្លេងច័ន្ទ (៣,៥៥) និងមីឆាសាច់គោ (៣,៨៥ ដុល្លារ)។
ភេសជ្ជៈ (Cookies and Cream Frappe តម្លៃ ៣,៥៥ និង ៣,៩៥ ដុល្លារ) និងតែអ៊ូឡុង (៤,៥៥ ដុល្លារ) មានប្រជាប្រិយភាពខ្លាំង។
នៅមានជម្រើសអាហារសម្រន់ និងបង្អែម ដូចជា នំចាក់ចុល កាហ្វេទឹកដោះគោ (៣,២៥ ដុល្លារ) និង សង់ខ្យាល្ពៅ (២,៥ ដុល្លារ)។
ចំពោះអ្នកចង់រក្សាទម្ងន់ ភ្លេងច័ន្ទ ក៏មានសាលាដមាន់ចៀន (៤,១៥ ដុល្លារ) គួងផ្លែឈើស្រស់ (៣,២៥ ដុល្លារ) និងសាលាដបៃតងចម្រុះ (៣,៤៥ ដុល្លារ)។
អតិថិជនអាចសាកល្បង ក្លិបសេនវិច (៤,៤៥ ដុល្លារ) ពងមាន់បែននឹឌិក (១,២៥ ដុល្លារ) ហ្វ្រេនថូស (៤,៥ ដុល្លារ) ហេមឈីសសេនវិក (៣,៩៥ ដុល្លារ) និងខ្ទះឆាគ្រប់រដូវ (៥,១៥ ដុល្លារ)។
សម្រាប់ភេសជ្ជៈជាទូទៅមានតម្លៃ ១,៩៥ ដល់ ៣,១៥ ដុល្លារ រួមមាន កាហ្វេខ្មៅ ខារ៉ាមែលឡាតេ តែបៃតងឡាតេ ម៉ូកា ភេសជ្ជៈស្រអែមខៀវខ្ចី និងវ៉ាន់នីឡាឡាតេ។
រចនាប័ទ្មក្នុងភោជនីយដ្ឋាន ភ្លេងច័ន្ទ ផ្ដោតលើបរិស្ថានដែលស្រោបទៅដោយរុក្ខជាតិបៃតង។ រូបថត រ៉ាស់ហ៊ីម
អ្នកគ្រប់គ្រងហាង ភ្លេងច័ន្ទ លោក សោម សំណាង ឲ្យដឹងថា ចំណូលចិត្តកុម្ម៉ង់អាហាររបស់អតិថិជនអាស្រ័យទៅតាមពេលវេលា។
លោកថា៖ «ភ្ញៀវមានចំណូលចិត្តផ្សេងៗគ្នា និងកុម្ម៉ង់ប្លែកៗគ្នា ដោយពេលព្រឹកគាត់ចូលចិត្តកាហ្វេ និងពេលថ្ងៃភាគច្រើនប្រភេទសូដា និងភេសជ្ជៈក្រឡុក»។
ស្ថិតនៅក្នុងហាងទូលាយ ៣០០ ម៉ែត្រការ៉េ ដែលមានគម្លាតកន្លែងអង្គុយមិនសូវជិតគ្នា ដើម្បីសម្រួលដល់ការផ្ចង់អារម្មណ៍អានតួអក្សរលើទំព័រសៀវភៅ លោកថា៖ «ក្រៅពីអាហារ និងភេសជ្ជៈ អតិថិជនក៏ចូលចិត្តបរិយាកាសក្នុងហាងដែរ ដែលវាជួយជំរុញពួកគាត់ឲ្យមានអារម្មណ៍ស្រស់ថ្លាសម្រាប់ការធ្វើការងារ»។
លោក សោម សំណាង ឲ្យដឹងថា ជាលទ្ធផលនៃការច្របាច់បញ្ចូលគ្នារវាងវប្បធម៌ខ្មែរបុរាណ និងសហសម័យ ដើម្បីបំផុសភាពច្នៃប្រឌិត និងអារម្មណ៍ស្រស់ថ្លាដល់ភ្ញៀវ។
អ្នកគ្រប់គ្រងរូបនេះនិយាយថា៖ «ជាមួយការវិវឌ្ឍ ក៏ដូចជាការជឿនលឿនតាមសម័យកាល និងពេលវេលានាំឲ្យមានការផ្លាស់ប្ដូរ ក៏ដូចជាការបង្កើតឡើងនូវរបស់ថ្មីៗ និងគំនិតថ្មីៗជាច្រើន ជាមួយគ្នានេះដែរ ទោះការដុះដាលជឿនលឿននូវបរិបទថ្មី ក៏ដូចជាការកើនឡើងទំនើបកម្មផ្សេងៗក៏ដោយ ក៏ការថែរក្សា និងអភិរក្សនូវអ្វីដែលយើងមានរួចស្រាប់ នៅតែស្ថិតនៅក្នុងគោលគំនិតរបស់ក្រុមការងារទាំងមូលផងដែរ»។
រចនាប័ទ្មបុរាណត្រូវបានរំលេចតាមរយៈបង្អួចឈើបែបផ្ទះខ្មែរ។ រីឯឈ្មោះហាង ភ្លេងច័ន្ទ បានរំឭកពីបទចម្រៀង «លួចស្នេហ៍ដួងច័ន្ទ» ដោយមិនមែនសំដៅលើអត្ថន័យស្នេហាប៉ុណ្ណោះទេ ប៉ុន្តែក៏ប្រដូច ដួងច័ន្ទទៅនឹងក្ដីសុបិនដែលមនុស្សគ្រប់គ្នាប្រាថ្នា។
ព្យ៉ាណូតាំងបង្ហាញនៅភោជនីយដ្ឋាន ភ្លេងច័ន្ទ។ រូបថត យូរសុះ អាប់ឌុលរ៉ាស់ហ៊ីម
ក្រៅពីបរិយាកាសបៃតងត្រជាក់ចិត្ត ភ្លេងច័ន្ទ ក៏មានឧបករណ៍តន្ត្រី និងសៀវភៅ ៣ ៥០០ ក្បាល ជាភាសាខ្មែរ បារាំង អង់គ្លេស និងរុស្ស៊ី តម្រូវចិត្តអ្នកនិយមប្រលោមលោក ប្រវត្តិសាស្ត្រ និងប្រភេទអំណានលើកទឹកចិត្ត។
លោក សំណាង ថា៖ «ភ្លេងច័ន្ទ រៀបចំសិក្ខាសាលាទាក់ទងការអប់រំ ថែទាំសុខភាព ក៏ដូចជាការត្រៀមខ្លួនក្នុងឱកាសការងារផ្សេងៗទៀតផង ដោយបើកឲ្យអតិថិជនចូលរួមដោយសេរី មិនគិតថ្លៃនោះទេ»។
លោកលើកឡើងថា៖ «ភ្លេងច័ន្ទ ក៏មានការរៀបចំនូវក្លិបសិក្សាមួយចំនួនដូចជា ក្លិបអាន ក្លិបតន្ត្រី ក្លិបគំនូរ និងក្លិបថតរូប»។
លោកនិយាយថា៖ «ពេលខ្លះក៏មានអតិថិជនដែលជាសិស្សានុសិស្សមកលេងឧបករណ៍តន្ត្រីដូចជាព្យ៉ាណូជាដើម»។
ភ្លេងច័ន្ទ ស្ថិតនៅផ្ទះលេខ ២៣២ ផ្លូវលេខ ៦៣ សង្កាត់បឹងកេងកង ១។ ទំនាក់ទំនងលេខ ០៩៣ ៧០២ ៥២៥ ឬធ្វើការកុម្ម៉ង់អាហារតាមរយៈកម្មវិធីទូរស័ព្ទ Nham24៕
វីដេអូ៖
