ក្រុងហាណូយ៖ ជាមួយក្លិនឈ្ងុយប្លែក មាន់ដុតខ្ចប់ដីឥដ្ឋ គឺជាម្ហូបដ៏ពិសេសមួយប្រចាំតំបន់ភាគនិរតី ប្រទេស វៀតណាម។ នេះបើយោងតាមអ្នកជំនាញចម្អិនម្ហូប ឡឺ គីមជី។
ជី បានតំណាលពីរឿង អ្នកសុំទានម្នាក់បានលួចមាន់ពីកសិដ្ឋានយកទៅបង្កាត់ភ្លើងដុតឲ្យឆ្អិន។ អ្នកសុំទាននោះស្រាប់តែប្រទះឃើញទាហានដើរកាត់ ហើយខ្លួនក៏ព្យាយាមយកដីឥដ្ឋពូនស្រោបមាន់ដុតនោះ ដើម្បីបំបាត់ភ័ស្ដុតាង។ ប៉ុន្តែក្លិនមាន់ដុតនៅតែភាយដល់ស្ដេចមួយអង្គ ដែលយាងកាត់ទីនោះ។
ដោយអត់ទ្រាំពុំបាន ស្ដេចអង្គនោះក៏បញ្ជាទ័ពឲ្យឈប់ រួចយាងទៅសោយសាច់មាន់ដ៏ឈ្ងុយឆ្ងាញ់ជាស្នាដៃបុរសស្មូមចម្អិន។ មាន់ដុតខ្ចប់ដីឥដ្ឋក៏បានក្លាយជាម្ហូបរាជវាំង ក្នុងរឿងព្រេងនិទាននោះ។
មេចុងភៅ ជី បានរៀបរាប់ពីប្រវត្តិម្ហូបនេះថា មាន់ដុតខ្ចប់ដីឥដ្ឋ ជាម្ហូបដ៏ចំណាស់មួយនៅវៀតណាម ហើយពលរដ្ឋនៅភាគនិរតីនិយមប្រើស្លឹកឈូក និងស្លឹកចេក ក្នុងការវេចខ្ចប់សាច់មាន់ ដើម្បីបង្កើនក្លិនឈ្ងុយ និងរសជាតិឆ្ងាញ់ប្លែក។
មាន់ព្រៃ មាន់ចិញ្ចឹមនៅតំបន់ភ្នំ ឬក្នុងទីធ្លារផ្ទះ ត្រូវបានជ្រើសរើសយកទំហំប្រមាណ ១,៣ ទៅ ១,៤ គីឡូក្រាម សម្រាប់ការចម្អិន។
មាន់ដែលបោចរោមសម្អាតរួច ត្រូវបានយកមកជ្រលក់ទឹកម្រេច គ្រឿងប៉ូយកាក់ ស្លឹកក្រូចសើច និងស្លឹកគ្រៃ រួចរុំស្លឹកចេក ឬស្លឹកឈូក មុននឹងពាសដីឥដ្ឋខ្ចប់ឲ្យជិត។ ដីឥដ្ឋចាំបាច់ត្រូវតែទន់ល្មម ហើយភាគច្រើនគេចូកពីទន្លេ ឬបឹងបួ យកមកដុតមាន់។
អ្នកជំនាញម្ហូប ឡឺ គីមជី បានបញ្ជាក់ថា៖ «ដំណាក់កាលយកដីឥដ្ឋខ្ចប់មាន់ ត្រូវធ្វើឡើងដោយប្រយ័ត្ន ដោយស្រទាប់ដីចាំបាច់មិនស្ដើងពេក ឬក្រាស់ពេក។ ការចម្អិនជាទូទៅត្រូវប្រើពេល ២ ម៉ោង»។
ក្រោយពេលសាច់មាន់ឆ្អិនសព្វ ចុងភៅត្រូវវាយបំបែកដីឥដ្ឋយកមាន់ចេញ ហើយហែកវាជាដុំៗ ដើម្បីលាយជាមួយអំបិល ម្រេច ទឹកក្រូចឆ្មារ និងជីរពងទាកូន។
ជី បានបន្តថា៖ «គេនិយមទទួលទានមាន់ដុតដីឥដ្ឋជាមួយបាយដំណើប ដែលគេដាំដោយយកស្រាស្រោចលាងអង្ករ»។
មេផ្ទះស្ទើរតែគ្រប់គ្នាសុទ្ធតែចេះចម្អិនម្ហូបនេះ។
មាន់ដុតដីឥដ្ឋ ត្រូវបានអ្នកជំនាញម្ហូប ក្វាន អានង៉ន ជ្រើសរើសយកមកធ្វើជាម្ហូបប្រចាំ ហាង Mon Ngon Sai Thanh នៅទីក្រុងហាណូយ ដោយពាំនាំយករសជាតិដើមពីភាគនិរតី។ ម្ហូបនេះទទួលបានប្រជាប្រិយភាពពីភ្ញៀវវៀតណាម និងជនបរទេស ជាមួយវិធីចម្អិន និងរឿងតំណាលដ៏គួរឲ្យចាប់អារម្មណ៍។
គីម យ៉ុងស៊ុន ជាមិត្តភក្ដិរបស់លោក ក្វាន មកពីកូរ៉េខាងត្បូង បានលាន់មាត់ថា៖ «ខ្ញុំចូលចិត្តម្ហូបនេះណាស់ ទោះបីជាវាចម្អិនដោយប្រើគ្រឿងទេសវៀតណាម តែវាឆ្ងាញ់ និងគួរឲ្យទាក់ទាញ។ ពេលខ្ញុំត្រឡប់ទៅកូរ៉េវិញ ខ្ញុំតែងនឹកឃើញចង់ញ៉ាំវា»។
បុរសកូរ៉េរូបនេះនិយាយថា៖ «ឲ្យតែមកលេងវៀតណាម ខ្ញុំមិនដែលរំលង មាន់ដុតដីឥដ្ឋនេះឡើយ»៕ Asian News Network/ VNS