The Phnom Penh Post Search

Search form




Logo of Phnom Penh Post newspaper Phnom Penh Post - មាន់​ស្រែ​ដុត​ចំបើង​ពី The Hut សៀមរាប




មាន់​ស្រែ​ដុត​ចំបើង​ពី The Hut សៀមរាប

Content image - Phnom Penh Post
មាន់ស្រែ​ដុត​ចំបើង និង​ម្ហូប​ជាច្រើន​មុខ​ទៀត​ដែល​មាន​បម្រើ​នៅ The Hut។ ឈឹម ស្រីនាង

មាន់​ស្រែ​ដុត​ចំបើង​ពី The Hut សៀមរាប

សៀមរាប: អ្នកទេសចរ​ដែល​បាន​ធ្វើ​ដំណើរ​មក​ពី​កំពង់​ភ្លុក​ឬក៏​ប្រាសាទ​បឹង​មាលា អាច​ឆៀង​ចូល​ទៅ​សម្រាក​ញ៉ាំ​បាយ​ថ្ងៃ​ត្រង់​នៅ ភោជនីយដ្ឋាន The Hut ជា​កន្លែង​ស្រស់​ស្រូប​បែប​ធម្មជាតិ សម្បូរ​ដោយ​ដើម​ត្នោត​ធំៗ ផ្កា​ស្បៃ​រឿង និង​រុក្ខជាតិ​បៃតង ធ្វើ​ឲ្យ​យើង​មាន​អារម្មណ៍​ដូចជា​នៅ​ក្នុង​ព្រៃ។ ក្យូស​ប្រក់​ស្បូវ មាន​ដើម​ចេក ដើម​ត្នោត​ព័ទ្ធ​ជុំវិញ ផ្ដល់​នូវ​ខ្យល់​អាកាស​ត្រជាក់​ស្រស់​ស្រាយ​បែប​ធម្មជាតិ។

អ្នកស្រី ហៀប រតនា​ម្ចាស់​ភោជនីយដ្ឋាន The Hut បាន​និយាយ​ទាំង​ដៃ​កំពុង​តែ​ដាំ​ផ្កា​ស្បៃរឿង​ក្នុង​សួនច្បារ​ហាង​របស់​ខ្លួន​ថា៖ «មុន​ដំបូង​ឡើយ​ឃើញ​ដី​នៅ​កន្លែង​នេះ គេ​ទុក​ចោល​អស់​រយៈពេល ១៥ ឆ្នាំ​មក​ហើយ​ដោយ​មិន​ឃើញ​អ្នកណា​ធ្វើអី​សោះ ហើយ​ណាមួយ​នៅ​ទីនេះ​ប្រជាជន​ភាគ​ច្រើន​គាត់​អត់​មាន​ធ្វើ​អី​ក្រៅ​ពី​ត្បាញ​ជាល រពាក់ កញ្ជើ ជាដើម អ៊ីចឹង​ធ្វើ​ឲ្យ​ខ្ញុំ​គិតថា ពួក​គាត់​គួ​រតែ​មាន​របរ​អ្វី​បន្ថែម​មួយ​ទៀត។ បន្ទាប់​មក​ក៏ខ្ញុំ​សម្រេចចិត្ត​ជួល​ដី​នេះ​ច្នៃ​បន្ថែម​បន្តិច​បន្តួច​ធ្វើជា​ភោជនីយដ្ឋាន​បែប​ធម្មជាតិ​លក្ខណៈ​ខ្មែរ​ពិតៗ​ដោយ​មាន​ជា​ក្យូស ចង​អង្រឹង​សម្រាប់​អង្គុយ​លេង​ជាមួយ នឹង​ការ​ញ៉ាំ​អាហារ​បែប​ខ្មែរ​ជាដើម»។

ភោជនីយដ្ឋាន The Hut នេះ​ទើប​តែ​បើក​បាន ៧ ខែ​តែ​ប៉ុណ្ណោះ ក៏ប៉ុន្តែ​ដោយសារ​តែ​ទីកន្លែង​ស្អាត និង​ម្ហូប​ឆ្ងាញ់ ធ្វើ​ឲ្យ​ភ្ញៀវ​ជាតិ និង​អន្តរជាតិ​ដែល​ជិះ​ឆ្លង​កាត់​ទីនេះ​តែង​ឆ្លៀត​ចូល​សម្រាក និង​ញុំា​អាហារ​ជា​ហូរហែ។

ទោះជា​កន្លែង​លម្ហែ​ញ៉ាំ​អាហារ​ក្នុង​ក្យូស​ហាក់​រំលេច​វត្តមាន​ច្រើន​ក៏ពិត​មែន តែ​អ្នកស្រី បាន​លើក​ឡើង​ថា៖ «ខ្ញុំ​ជឿជាក់​ទៅ​លើ​ស្នាដៃ​ប្រឹងប្រែង​ស្វែងរក​អ្វី​ថ្មី​ដោយ​ខ្លួនឯង​ដោយ​មិន​ចាំបាច់​ទៅ​លួច​ចម្លង​ពី​គេ​នោះ​ទេ ដូចជា​ក្នុង​កន្លែង​របស់​ខ្ញុំ​មាន​ណែម​ធ្វើ​ពី​ស្លឹក​តើយ​រុំ​ជាមួយ​នឹង​បន្លែ​ជ្រលក់​ទឹកត្រី រសជាតិ​ឆ្ងាញ់​ប្លែក​មាត់ ដែល​ហាង​ដទៃ​មិន​មាន»។

នៅ​ទីនេះ​មាន​បម្រើ​មុខម្ហូប​បែប​ខ្មែរ​ជាច្រើន​ដូចជា​មាន់​ស្រែ​ដុត​ចំបើង ម្ជូរ​ស្រែ ត្រីអាំង ជាដើម ក្នុង​តម្លៃ​សមរម្យ ចាប់​ពី ១ ម៉ឺន ទៅ​ដល់ ៥ ម៉ឺនរៀល។

ភោជនីយដ្ឋាន The Hut មាន​អាស័យដ្ឋាន ស្ថិត​នៅ​ជិត​ប្រាសាទ​បាគង ទល់​មុខ​ផ្លូវ​ទៅ​កំពង់​ភ្លុក។ ព័ត៌មាន​លម្អិត ទំនាក់​ទំនង​ទូរស័ព្ទ​លេខ ០១២ ៩២៦ ៣៩១៕

អត្ថបទគួរចាប់អារម្មណ៍