សៀមរាប: ដំណើរកម្សាន្តទៅកាន់ទឹកដីសៀមរាបអង្គរ ក្រៅពីការទស្សនាស្វែងយល់ពីប្រាង្គប្រាសាទដ៏អច្ឆរិយ ភ្ញៀវទេសចរទាំងឡាយ ក៏មិនភ្លេចការលម្ហែកាយជាមួយនឹងអាហារបែបខ្មែរក្នុងបរិយាកាសស្រុកស្រែចម្ការផងដែរ។
ដោយចំណាយពេលធ្វើដំណើរពីក្រុងសៀមរាបតែប្រមាណ ១៥ នាទី ទេសចរអាចទៅដល់ «ផ្ទះម៉ែឡន» ដែលស្ថិតតាមបណ្តោយផ្លូវជាតិលេខ ៦ ឆ្ពោះទៅប៉ោយប៉ែត ភូមិជ័យ ឃុំទឹកវិល។
កន្លែងទទួលទានអាហារ «ផ្ទះម៉ែឡន» មានក្យូសព័ទ្ធដោយសំណាបខៀវខ្ចី ឬក៏ស្រូវ ទៅតាមរដូវកាល អមដោយ ស្រះទឹក និងខ្យល់អាកាសក៏ត្រជាក់បរិសុទ្ធ។
ម៉ែឡន គឺជាម្ចាស់កន្លែងបាននិយាយទាំងដៃកំពុងតែឆាខ្យងថា៖ «នៅកន្លែងនេះ រាល់មុខម្ហូបដែលខ្ញុំធ្វើគឺទៅតាមរដូវកាលដូចជាត្រីអាំង ឬមួយក៏កង្កែបអាំងសម្រាប់ខែនេះគឺវាសម្បូរត្រីស្រែស្រស់ៗ និងកង្កែបច្រើនគ្រាន់បើគឺខ្ញុំប្រមូលទិញពីអ្នកស្រុកគាត់ដើររក តាមវាលស្រែក្បែរៗហ្នឹង»។
ម៉ែឡន បានបន្តទៀតថា៖ «ចំពោះបន្លែវិញគឺយើងដាំខ្លះៗនៅក្នុងផ្ទះដូចជា ក្រូចឆ្មារ ស្លឹកគ្រៃ ត្រួយល្ពៅ និងបន្លែខៀវផ្សេងៗ ក្រៅពីនេះក៏មានចិញ្ចឹមមាន់ ទាជាលក្ខណៈគ្រួសារផងដែរ»។
ម្ហូបល្បីៗនៅផ្ទះម៉ែឡនមានដូចជា មាន់អាំងទឹកឃ្មុំ ជ្រលក់បុកក្រសាំង តម្លៃ ៥២ ០០០ រៀល ទឹកគ្រឿងខ្យង ចានតូច ៣ ម៉ឺនរៀល ចានធំ ៤៥ ០០០ រៀល ឆាគ្រឿងខ្យង ចានតូច ១៥ ០០០ រៀល ចានធំ ២ ម៉ឺនរៀល ម្ជូរព្រលឹតត្រីស្រែ ឆ្នាំងតូច ២៥ ០០០រៀល ឆ្នាំងធំ ៣ ម៉ឺនរៀល ត្រីស្រែអាំង ចានតូច ១២ ០០០ រៀល និងចានធំ ១៥ ០០០ រៀល។
លោក ចាន់ សុភា ជាម្ចាស់ក្យូស និងជាកូនរបស់ម៉ែឡន បានថ្លែងទាំងទឹកមុខរីករាយថា៖ «ដោយសារបច្ចុប្បន្ននេះមានភ្ញៀវថ្មីចាស់គាត់មកកន្លែងខ្ញុំច្រើន ណាមួយនៅម្តុំនេះមានគេបើកមុខរបរដូចខ្ញុំច្រើនដែរ អ៊ីចឹងហើយបានជាខ្ញុំប្រឹងប្រែងតុបតែងកន្លែងរបស់ខ្ញុំឲ្យមានភាពស្អាត អនាម័យខ្ពស់ជាងមុន ជាមួយការចម្អិនម្ហូបដោយយកចិត្តទុកដាក់ និងរក្សារសជាតិឲ្យបានស្មើគ្នា។ ជាពិសេសជាងនេះទៅទៀតនោះ គឺខ្ញុំបានបន្ថែមក្យូសរហូតដល់ទៅ ១៦ ក្យូស ដើម្បីបំពេញតម្រូវការរបស់ភ្ញៀវ»។
លោក ចាន់ សុភា បានបន្តទៀតថា៖ «ខ្ញុំព្យាយាមធ្វើឲ្យទីសម្រាកកម្សាន្តជាលក្ខណៈគ្រួសារនេះ ទៅជាកន្លែងដែលទាក់ទាញទេសចរជាតិ និងអន្តរជាតិឲ្យមកសម្រាក និងអង្គុយញ៉ាំម្ហូបខ្មែរពិតៗ មានអនាម័យ ក្រោយអស់កម្លាំងពីការដើរលេងកម្សាន្តប្រាសាទនានា គឺអាចនឹកដល់ផ្ទះម៉ែឡន ដើម្បីសម្រាកកាយស្រូបយកខ្យល់អាកាសបរិសុទ្ធ»។
ផ្ទះម៉ែឡន បើកពីម៉ោង ៩ ព្រឹក ដល់ ៩ យប់។ ទាក់ទងតាមលេខ ០១៧២៥៧ ៧៥៥៕