.jpg)
សាច់ខ្ចប់នំបុ័ង ម្ហូបក្រិកបែបមេឌីទែរ៉ាណេ ដ៏ល្អចំពោះសុខភាព។ រូបថត ហុង មិនា
ភ្នំពេញ: ជាមួយទីតាំងភូមិសាស្ត្រចម្ងាយជាង ១ ម៉ឺនគីឡូម៉ែត្រពីគ្នា ឧបនិស្ស័យបាននាំជនជាតិក្រិកលោក ភីតធើរ យ៉ាឡូរ៉ូស មកភពប្រសព្វសាងសុភមង្គលនឹងនារីខ្មែរសាងសុភមង្គលបង្កើតបានកូនស្រីដ៏គួរឲ្យស្រឡាញ់ ២ នាក់ និងភោជនីយដ្ឋានម្ហូបក្រិកដែលមនុស្សជាច្រើនល្បីថាល្អចំពោះសុខភាព។
បុរសពោះម៉ាយវ័យ ៦១ ឆ្នាំលោក ភីតធើរ យ៉ាឡូរ៉ូស បានរៀបរាប់ថា៖ «ខ្ញុំជាកូនកាត់ក្រិក-ស៊ីប ដែលកើតនៅទីក្រុងឡុងដ៍ហើយបានរៀបការជាមួយភរិយាជនជាតិក្រិកបាន ២៣ ឆ្នាំដោយមានកូនប្រុស ២ នាក់។ នៅវ័យ ៤០ ឆ្នាំ ខ្ញុំសឹងតែបោះបង់ចោលអ្វីៗគ្រប់យ៉ាង ព្រោះតែខ្ញុំកើតជំងឺសរសៃឈាមបេះដូង»។
ក្រោយពីលោកឆ្អែតឆ្អន់នឹងជីវិតនៅបស្ចិមប្រទេសលោកក៏សម្រេចចិត្តធ្វើដំណើរមកកាន់អាស៊ី។ លោកបានទៅដល់ម៉ាឡេស៊ី និងថៃនឹងគ្មានគម្រោងមកកម្ពុជាទេ តែនៅឆ្នាំ ២០១០ ពេលកំពុងរង់ចាំរថយន្តក្រុងលោកក៏បានជួបអ្នកស្រី ហ៊ីម សុខរ៉ា ហៅ សារ៉ា ដែលជាភរិយាសព្វថ្ងៃនេះ។
ក្រុមគ្រួសារក្រិក-កម្ពុជា លោក ភីតធើរ យ៉ាឡូរ៉ូស និងអ្នកស្រី សារ៉ា ព្រមទាំងកូនស្រីទាំង ២។ រូបថត ហ្វេសប៊ុក
បុរសជនជាតិក្រិកដែលកំពុងសាងគ្រួសារយ៉ាងកក់ក្ដៅជាមួយស្ត្រីខ្មែររូបនេះ បានរៀបរាប់ថា៖ «ខ្ញុំចាប់ផ្ដើមបង្រៀនភាសាអង់គ្លេស ដើម្បីចិញ្ចឹមគ្រួសារខ្ញុំ រីឯ សារ៉ា បានចូលរៀននៅសាលា ខេមអេត ។ នៅឆ្នាំ ២០១៥ ខ្ញុំក៏ចាប់ផ្ដើមបើកហាងកាហ្វេដោយដាក់ឈ្មោះកូនស្រីខ្ញុំទាំង ២ នាក់»។
ដោយហាងកាហ្វេមានទីតាំងមិនសូវចំកន្លែងអ៊ូអរ ទើបលោកសម្រេចចិត្តប្ដូរបើកជាកន្លែងបម្រើម្ហូបក្រិកដោយផ្តោតលើរសជាតិ អនាម័យ សុខភាព និងការចម្អិនជាគ្រួសារ។
លោក ភីតធើរ បានលើកឡើងថា៖ «យើងព្យាយាមបម្រើម្ហូបក្រិករសជាតិដើមពិតៗក្នុងបរិយាកាសដូចនៅក្រិក។ យើងបានស្គាល់ និងរាប់អានភ្ញៀវជាច្រើន ដែលមកញ៉ាំអាហារនៅហាងយើង។ យើងចូលចិត្តធ្វើម្ហូបបណ្ដើរ មើលកូនបណ្ដើរតាមប្រពៃណីក្រិក។ គ្រួសារពិតជាសំខាន់ណាស់ ហើយពួកយើងបានចូលរួមដាក់ទុនទាំងអស់គ្នាក្នុងការបើកហាងនេះ»។
ភរិយារបស់លោក អ្នកស្រី សារ៉ា បានលើកឡើងថាខ្មែរយើងស្គាល់តែម្ហូបអឺរ៉ុបទូទៅ តែមិនសូវដឹងពីម្ហូបក្រិកទេ ដូច្នេះអ្នកស្រីសង្ឃឹមថាភ្ញៀវ ជាពិសេសក្មេងៗនឹងចាប់អារម្មណ៍ភ្លក្សអាហារសុខភាពជាមួយរូបមន្តមកពីចម្ងាយរាប់ពាន់គីឡូម៉ែត្រ។
ជារៀងរាល់ថ្ងៃព្រហស្បតិ៍ Greek Souvlaki មានបម្រើម្ហូប ១ ចានតម្លៃត្រឹមតែ ១ ដុល្លារដូចជា moussaka (សាច់ចិញ្ច្រាំជាមួយត្រប់ ឬដំឡូងបារាំង) សាច់ និងបន្លែអាំងដោតចង្កាក់ (souvlaki) gyros (សាច់ខ្ចប់) hummus (នំប៉័ងជ្រលក់ទឹកសណ្ដែក ប្រេងអូលីវ ខ្ទឹម) tzatziki (នំប៉័ងជ្រលក់ទឹកដោះគោជូរ អូលីវ) papoutsakia (ត្រប់ញាត់សាច់ និងឈីស) pastichio (ប៉ាស្តាសាច់ចិញ្ច្រាំ) និងស្រាដ៏ល្បីនៅក្រិកឈ្មោះថា Ouzo។
ថៅកែស្រីអាយុ ៣០ ឆ្នាំបាននិយាយថា៖ «យើងធ្វើនំ dolmades (នំអន្សមក្រិក មានបន្លែខ្ចប់អង្ករ និងបន្លែ) ដោយផ្ទាល់ដៃ។ វាជាម្ហូបដ៏ពេញនិយមក្នុងប្រវត្តិសាស្ត្រក្រិកតាំងពីអាណាចក្រអូតូម៉ង់នៅអឺរ៉ុប»។
ក្រោយពីដំណើរការនៅទីតាំងថ្មីបានប្រមាណ ៦ ខែ ប្ដីប្រពន្ធខ្មែរ-ក្រិក រីករាយនឹងស្វាគមន៍ភ្ញៀវទាំងខ្មែរ និងបរទេសមកទទួលយកនូវបទពិសោធអាហារឆ្ងាញ់ក្នុងបរិយាកាសស្រស់ស្រាយ។
អ្នកស្រី សារ៉ា បាននិយាយថា៖ «យើងចម្អិនម្ហូបក្រិកពីគ្រឿងផ្សំល្អៗ ថ្មី ស្រស់ៗ ជារៀងរាល់ថ្ងៃ។ រូបភាព អាហារនៅទីនេះជារូបម្ហូបពិតៗអត់មានកែកុនអីទេ។ យើងបម្រើម្ហូបអាហារជូនភ្ញៀវ ដូចទៅនឹងអ្វីដែលគ្រួសារយើងញ៉ាំនៅផ្ទះអ៊ីចឹងដែរ»។
ជារៀងរាល់ ១ ខែម្ដង Greek Souvlaki ក៏នាំមកនូវការសម្ដែងរបស់អ្នកនាង លីនដា (Linda Asha Abdalla) ដែលជាគ្រូរបាំគ្រវីចង្កេះ (belly dance) និងធ្លាប់បានអង្រួនវេទិកា Cambodia''s Got Talent រដូវកាលទី ២ ។ រាត្រីទស្សនីយភាពនេះនឹងប្រព្រឹត្តទៅនៅថ្ងៃទី ១៥ ខែមីនា។
Greek Souvlaki ស្ថិតនៅផ្ទះលេខ ៩៦ ផ្លូវ ៤៥៤ ម៉ោងបើកដំណើរការ ១១:៣០ ព្រឹក-៣:០០ រសៀល និង ៥:៣០ ល្ងាច ១០:០០ យប់៕
វីដេអូ៖
