ភ្នំពេញៈ មួយចានមានសរសៃមីទើបនឹងស្រង់ចេញពីឆ្នាំងពុះខ្ជោលៗមានបន្ថែមសាច់ដែលភ្ញៀវបានជ្រើសរើសរួមជាមួយគាវ បន្លែ និងស្លឹកជីរ។ រីឯមួយចានទៀតមានទឹកស៊ុបជាមួយឆ្អឹងស៊ុបអមដោយទឹកជ្រលក់ ២ ចានទៀត ដែលភ្ញៀវអាចរីករាយនឹងញ៉ាំយ៉ាងឆ្ងាញ់ពិសា។
នេះជាមីគោក ៤ រសជាតិដែលបានដំណើរការអស់រយៈពេលជាង ៣ ឆ្នាំកន្លងមកហើយក្រោយពីទទួលបានប្រជាប្រិយភាពពីបណ្ដាភ្ញៀវគ្រប់វ័យរួមទាំងតារាល្បីៗចូលទទួលទាន និងកុម្ម៉ង់ខ្ចប់ ដោយសារតែមីគោកនេះមានរសជាតិបែបហុងកុង ហើយត្រូវបានកែច្នៃថ្មីថែមជាតិប្រៃផ្អែមតម្រូវតាមចិត្តអតិថិជនខ្មែរយើង។
លោក ចាន់ សាអូន វ័យ ២៧ ឆ្នាំជាម្ចាស់ហាងដែលជាកូននៃគ្រួសារមានហាងសាច់ខ្វៃល្បីរយៈពេល ៣០ ឆ្នាំមកហើយបានឲ្យដឹងថា៖ «អាចថាមកពីខ្ញុំជាមនុស្សដែលទំនេរពេកក៏ថាបានដែរ និងមកពីគ្រួសារខ្ញុំមានហាងលក់ជ្រូកខ្វៃ ហើយជ្រូកខ្វៃវាមានរដូវកាល ៣ ធំៗមានសែនចូលឆ្នាំចិន សែនឆេងម៉េង និងសែនក្បាលទឹក ប៉ុន្តែរដូវកាលនេះវាចន្លោះពេលរាងយូរដែរ»។
ដើម្បីបំពេញចន្លោះនោះលោកបានបន្តថា៖ «ខ្ញុំ និងបងប្រុសខ្ញុំក៏បានគិតថា បើមានហាងមួយទៀតប្រហែលជាល្អ ហើយក៏នាំគ្នាគិតថាលក់អី ក៏សម្រេចចិត្តថា លក់មីដោយសារតែមនុស្សភាគច្រើនចូលចិត្តញ៉ាំមីនៅពេលដែលមានអារម្មណ៍ថា មិនចង់ញ៉ាំបាយ»។
ឈ្មោះថា «មីគោក ៤ រសជាតិ» មិនមែនសំដៅលើរសជាតិផ្សេងគ្នានោះទេ ប៉ុន្តែផ្តោតទៅលើរសជាតិសាច់ដែលថែមក្នុងចានមីប្រភេទខុសគ្នាមានសាច់ទា សាច់សាស៊ីវ សាច់ ផាក់ឡូវ និងសាច់ខ្វៃ។
ហាងមានលក់មីគាវសាច់ទាតម្លៃ ១០ ០០០ រៀល មីគាវសាច់សាស៊ីវ មីគាវសាច់ផាក់ឡូវ និងមីគាវសាច់ខ្វៃតម្លៃ ៩ ០០០ រៀល ចំពោះតម្លៃ ១៥ ០០០ រៀលគ្រប់រសជាតិទាំងអស់មានបន្ថែមសាច់ និងគាវ។
ក្រៅពីប្រភេទមី មីគោក ៤ រសជាតិក៏មានលក់ជាប្រភេទសាច់ទា សាច់ខ្វៃ សាច់ផាក់ឡូវ សាច់សាស៊ីវមួយចាន តម្លៃ ១០ ០០០ រៀល។ គាវ មីគាវ ស៊ុបគាវ ១ ចានតម្លៃ ៧ ០០០ រៀល។ ឈាម ១ ចានតម្លៃ ៣០០០ រៀល និងភេសជ្ជៈធ្វើដោយខ្លួនឯងតម្លៃចាប់ពី ១ ០០០ រៀល។
ហាងមីគោក៤រសជាតិ បើកពីម៉ោង ៩ ព្រឹករហូតដល់ម៉ោង ៨ យប់ និងពីថ្ងៃចន្ទដល់ថ្ងៃសៅរ៍ និងមានអាសយដ្ឋានស្ថិតនៅក្រោយវិទ្យាល័យព្រះយុគន្ធរ ផ្លូវលេខ ២៧៦ បត់តាមម៉ូម៉ូខារ៉ាអូខេប្រហែល ៥០ ម៉ែត្រ ថែមទាំងមានការដឹកជញ្ជូនដល់ទីកន្លែងសូម្បីតែមួយប្រអប់។ ទូរស័ព្ទលេខ ០៨៩ ៧១ ៨៨ ៨៧ និង ០៩៨ ៣៧ ៣២ ៣២៕
វីដេអូ៖