ក្រុងញូវយ៉ក: វិធីចម្លែកបង្កើតជាភាពវិសេសសម្រាប់ភោជនីយដ្ឋានថ្មីនោះគឺមុខម្ហូបផ្គាប់អ្នកនិយមប្រើបណ្ដាញសង្គមអ៊ីនស្ដាក្រាម។ នោះជាអ្វី ដែលភោជនីយដ្ឋាន Thai-mee នៅឧទ្យាន McCarren ដែលដំណើរការបាន ១ ឆ្នាំនៅសណ្ឋាគារ McCarren Hotel & Pool នៅប្រូកលីនបានក្លាយជាគោលដៅមិនគួររំលងពេលរាត្រី។
ភោជនីយដ្ឋានថៃថ្មីលក់ម្ហូប ១ មុខឈ្មោះ «ញាំមីសួវេទមន្ដ» ដែលផ្សំឡើងពីសរសៃមីសួពណ៌ខៀវ ហើយប្រែពណ៌ពីខៀវទៅស្វាយនៅលើចាន។
មីសួពណ៌ឆើតប្រាកដជាទាក់ចិត្ដដោយមិនចាំបាច់ប្រើបច្ចេកវិទ្យាកែពណ៌ និងកំពុងពេញនិយមនៅលើបណ្ដាញសង្គមអ៊ីនស្ដាក្រាម។
ញាំមីសួវេទមន្ដតម្លៃ ១២ ដុល្លារ ជាគំនិតផ្ដួចផ្ដើមរបស់មេចុងភៅ ហុង ថៃមី។ លោកចាប់ផ្ដើមលក់មីសួជ្រលក់ពណ៌ខៀវដោយប្រើទឹកផ្កាអមតៈ។
បន្ទាប់មក គេយកវាទៅស្ងោរមុនពេលត្រាំទឹក និងរំលេចពណ៌ខៀវទាំងស្រុង ពេលវាត្រូវបានដាក់លើចានបន្ថែមដោយប៉េងប៉ោះ ជីរ ខ្ទឹមក្រហម និងគ្រឿងជ្រលក់ហឹរ។
អតិថិជនអាចបន្ថែមសាច់ រួមមាន បង្កង បង្គា និងសាច់មាន់ទៅតាមការកុម្ម៉ង់។ ចុងក្រោយ ពេលលើកជូនភ្ញៀវ អតិថិជនពេញចិត្ដនឹងញាំមីសួប្រែពណ៌នេះ។ លាយជាមួយទឹកក្រូចឆ្មារ ញាំមីសួបានប្រែពណ៌ពីខៀវទៅស្វាយ។
អ្នកប្រើប្រាស់អ៊ីនស្ដាក្រាមម្នាក់បានសរសេរអំពីចំណាប់អារម្មណ៍ថា៖ «បើពេញចិត្ដនឹងម្ហូបវេទមន្ដ មិនបាច់ទៅណាឆ្ងាយពីមីសួវេទមន្ដពី Thaimee McCarren នោះទេ»៕HR