ភ្នំពេញ: នៅខែចុងក្រោយបំផុតប្រចាំឆ្នាំ ប្រជាជនជាច្រើននាំគ្នារីករាយនឹងរដូវកាលគ្រិស្តស្មាស់ គួបនឹងបុណ្យចូលឆ្នាំសកល។
ដោយមិនប្រកាន់ជំនឿសាសនា បណ្ដាហាង សណ្ឋាគារ និងភោជនីយដ្ឋានជាច្រើន នៅរាជធានីភ្នំពេញ បានធ្វើការតុបតែងកន្លែងរបស់ខ្លួនជាមួយនឹងពណ៌ក្រហម បៃតង និងទឹកមាស ហើយម្ហូបអាហារនោះទៀតសោត ក៏មានរំលេចការតុបតែងតាមរចនាប័ទ្មគ្រិស្តស្មាស់ផងដែរ។
សម្រាប់អ្នកប្រាថ្នាចង់ប្រារព្ធពិធីបុណ្យដំណាច់ឆ្នាំ ជាមួយអាហារប្រណីត និងបរិយាកាសលំដាប់ខ្ពស់នោះ ទុកជាការចងចាំដ៏កក់ក្ដៅជួបជុំមិត្តភក្ដិ ក្រុមគ្រួសារ និងមនុស្សជាទីស្រឡាញ់ សណ្ឋាគារ Rosewood ភ្នំពេញ បានបង្កើតនូវកម្មវិធីអាហារប្រណីតជាច្រើនជម្រើស។
នៅពេលរសៀល ចាប់ពីថ្ងៃទី ១៥ ខែធ្នូ កម្មវិធី Festive Afternoon Tea នឹងត្រូវបានបម្រើនៅសាលទទួលភ្ញៀវ ជាមួយសាន់វិចលំដាប់ និងនំរចនាម៉ូដអបអររដូវបុណ្យចុងឆ្នាំ ជាមួយតម្លៃ ៤៥ ដុល្លារ សម្រាប់គ្នា ២ នាក់ និង ៨០ ដុល្លារ សម្រាប់គ្នា ២ នាក់បូកស្រាសាំប៉ាញ ២ កែវ។
ភ្ញៀវដែលនិយមអាហារជប៉ុន Festive Iza អាចចំណាយតម្លៃ ៦៥ ដុល្លារ ក្នុងម្នាក់ អាចជាជម្រើសក្នុងការប្រារព្ធរដូវកាលបុណ្យចុងឆ្នាំ ជាមួយរសជាតិគ្រិស្តស្មាស់បែបលោកខាងកើត។
ដោយឡែកនៅរាត្រីមុនថ្ងៃបុណ្យគ្រិស្តស្មាស់ នៅភោជនីយដ្ឋាន Brasserie Louis មានបម្រើនូវមុខម្ហូបអឺរ៉ុប ៣ មុខ ដែលភ្ញៀវអាចទទួលទានបណ្ដើរ ក្រេបស្រាសាំប៉ាញ ក្លែមទេសភាពរាត្រីនៃទីក្រុងភ្នំពេញ យ៉ាងពេញភ្នែក ពីលើជាន់ទី ៣៥ នៃសណ្ឋាគារ។
ឈុតគ្រិស្តស្មាស់អាហារអឺរ៉ុបចាប់ផ្ដើមដោយ ប៉ាតេថ្លើមក្ងាន (Fois Gras Terrine) ស៊ុបល្ពៅ ត្រីចៀនបន្លែ (Pan Seared Fillet of Sea Bass ''Au Pistou'') និងនំវ៉ានីឡា ផ្លែស្ត្រប៊ើរីជាមួយការ៉េមម៉ូដ គ្រិស្តស្មាស់។
អាហារ ១ ឈុតដ៏ប្រណីត ហើយច្រើនបរិបូរណ៍នេះ គួបផ្សំនឹងស្រាសាំប៉ាញ មានតម្លៃម្នាក់ ៩៥ ដុល្លារ។ សម្រាប់កញ្ចប់ទទួលទានអាហារ ដែលមាន ភេសជ្ជៈស្វាគមន៍ និងញ៉ាំស្រាសាំប៉ាញតាមចិត្តចង់ តម្លៃសម្រាប់ម្នាក់ ១៧៥ ដុល្លារ៕