ភ្នំពេញ: ចូលមកដល់ខែបុស្ស (រដូវធ្លាក់ខ្យល់អំឡុងដើមឆ្នាំ) នេះ សម្រាប់អ្នកដែលចូលចិត្តខ្វិតទុំ ប្រាកដជានឹកភ្នកជាចង់ញ៉ាំជាមិនខាន ដោយសារតែរដូវនេះសម្បូរខ្វិតទុំ។
សម្រាប់អ្នកដែលរស់នៅទីក្រុងភ្នំពេញ ក៏អាចរកទិញបាននៅតាមទីផ្សារលក់ត្រីបន្លែសាច់ធំៗ ឬមួយក៏ទិញពីអ្នកស្រុកដែលគាត់ដឹកតាមកង់។
ចំពោះខ្វិតទុំ អ្នកខ្លះចូលចិត្តពុះភ្លាមយកស្លាបព្រាកោសទទួលទាន។ រីឯអ្នកខ្លះទៀតនិយមយកទៅច្របល់ជាមួយស្ករមុននឹងញ៉ាំ។ ខ្វិតទុំកម្រត្រូវបានគេច្នៃយកទៅធ្វើបង្អែម ឬក៏អាហារអ្វីផ្សេងទៀតណាស់ ក្រៅពីពុះញ៉ាំស្រស់។ តែឥឡូវនេះឃើញ ហាងការ៉េមមួយកន្លែងម្តុំទួលទំពូង បានកែច្នៃខ្វិតទុំមកធ្វើជាការ៉េម ដែលមិនធ្លាប់មានពីមុនឡើយ។
បើទោះជាអ្នកខ្លះអាចមិនសូវនិយមក្លិនផ្លែខ្វិតទុំក៏ពិតមែន តែសម្រាប់រសជាតិវិញ ការ៉េមខ្វិតទុំ ឆ្ងាញ់ប្លែកមាត់ ដោយសារតែសាច់ការ៉េមទន់ត្រជាក់ លាយសរសៃខ្វិតធម្មជាតិ និងមានក្លិនឈ្ងុយខ្វិតជាប់ច្រមុះ។
នៅហាងការ៉េម Delikat Gelato ដែលតែងតែច្នៃផ្លែឈើរបស់ខ្មែរតាមរដូវកាលនេះ ក៏មានរសជាតិការ៉េមប្លែកៗដូចជាទុរ៉េន ខ្នុរ ល្ងស្វាយ ដូង ស្រកានាគ ក្រូចវល្លិ (ផាសិន) ល្ពៅ និងជីរអង្គាមជាដើម។ រឹតតែប្លែកទៅទៀត ហាងការ៉េមទំនើបនេះក៏មានការ៉េមត្រប៉ែផងដែរ។
ការ៉េមផ្លែឈើស្រស់ៗទាំងនេះត្រូវបានធ្វើមួយថ្ងៃសម្រាប់ផ្គត់ផ្គង់តម្រូវការមួយថ្ងៃតែប៉ុណ្ណោះ ដើម្បីរក្សាគុណភាពស្រស់ និងឆ្ងាញ់ល្អ។
ចង់ញ៉ាំការ៉េមផ្លែឈើរសជាតិប្លែកៗដូចជាការ៉េមខ្វិតទេ? Delikat Gelato ម្តុំផ្សារទួលទំពូង ទូរស័ព្ទលេខ ០៨៧ ២១១ ២១១៕