The Phnom Penh Post Search

Search form




Logo of Phnom Penh Post newspaper Phnom Penh Post - រទេះ​នំ​ភីហ្សា​ដុត​ឡអុស ​រសជាតិ​អ៊ីតាលី​កាត់​ខ្មែរ




រទេះ​នំ​ភីហ្សា​ដុត​ឡអុស ​រសជាតិ​អ៊ីតាលី​កាត់​ខ្មែរ

Content image - Phnom Penh Post
រទេះ​ឡដុត​នំភីហ្សា​របស់​លោក កូរុំ ដារ៉ា ស្ថិត​នៅ​ផ្លូវ ១៥៥ ទល់​មុខហាង​លក់សម្លៀកបំពាក់ Zando ផ្សារ​ទួលទំពូង។ ឈឹម ស្រីនាង

រទេះ​នំ​ភីហ្សា​ដុត​ឡអុស ​រសជាតិ​អ៊ីតាលី​កាត់​ខ្មែរ

ភ្នំពេញ: បន្ទាប់​ពី​ធ្វើការ​ខាង​ផ្នែក​ចុងភៅ និង​ម្ហូបអាហារ​នៅ​ក្នុង​សណ្ឋាគារ​ធំៗ​ច្រើន​ឆ្នាំ​មក បុរស​ម្នាក់​ក៏​សម្រេចចិត្ត​បើក​ជំនួញ​តូចមួយ​ដែល​រូប​លោក​ស្រឡាញ់​ពេញចិត្ត។

កំពុង​ឈរ​វាយ​ម្សៅ​ភីហ្សា​នៅ​ជិតឡ​រទេះ​ក្បែរ​របង​ផ្ទះ​គេ លោក កូរុំ ដារ៉ា បាន​និយាយថា «ពីមុន​ខ្ញុំធ្លាប់​ធ្វើការ​តាម​សណ្ឋាគារ​ធំៗ​ជាច្រើន​កន្លែង​រួចមក​ហើយ បន្ទាប់​មក​គិតថា​ដូចជា​មិនមាន​សល់​អីសោះ»។

លោក​ក៏នឹក​ឃើញ​ចង់​រំលេច​ស្នាដៃ​ធ្វើ​នំភីហ្សា​បែប​អ៊ីតាលី​កាត់​ខ្មែរ​ដែល​មាន​រសជាតិ​ប្លែក​មាត់​លក់​ជូនដល់​ប្រជាជន​ខ្មែរ​និង​ជនបរទេស​ផងដែរ។

លោក​បន្តថា៖ «ខ្ញុំចង់​ធ្វើ​អ្វីដែល​ខ្លួន​មាន​ជំនាញ​ច្បាស់ ក៏​សម្រេចចិត្ត​បើក​លក់​នំភីហ្សា​តាម​រទេះ​នេះ​តែម្តង​ទៅ ព្រោះ​ថា​នៅ​ស្រុក​ខ្មែរ​យើង​ដូចជា​មិនទាន់​មាន​អ្នកណា​លក់​នំភីហ្សា​ដុត​ភ្លាមៗ​តាមផ្លូវ​អ៊ីចឹង​ទេ»។

លោក ដារ៉ា បន្តថា៖ ទំរាំ​ខ្ញុំ​បើក​លក់​បាន​ការគាំទ្រ​ច្រើន​មកដល់​សព្វថ្ងៃ​នេះ​គឺ​បរាជ័យ​បីដង​រួចមក​ហើយ​តែ​ដោយសារ​តែ​ចិត្ត​ប្រឹង​ជម្នះ​គឺខ្ញុំ​ប្រឹងប្រែង​កែច្នៃ​គុណភាព​នំ ពិសេស​រសជាតិ និង​ការលក់​របស់​ខ្ញុំ​ឲ្យវា​មាន​ភាពខ្លាំង ទើប​ខ្ញុំអាច​ឈរ​ជើង​ដល់​សព្វថ្ងៃ​នេះ»។

Content image - Phnom Penh Post
ការ​ប្រើឡចម្អិន​​ភីហ្សាគឺ​ជា​ប្រពៃណី​របស់​អ៊ីតាលី​។ ឈឹម ស្រីនាង

លោក​យល់​ឃើញ​ថា ការធ្វើ​នំភីហ្សា​នេះ​គឺមិន​ចេះតែ​ធ្វើតាម​គ្នា​នោះ​ទេ គឺ​ត្រូវ​តែមាន​ការរៀនសូត្រ​ច្បាស់លាស់។

លោក កូរុំ ដារ៉ា បាន​ឲ្យ​ដឹង​ទៀត​ថា៖ «ចំពោះ​នំ​ភីហ្សា​របស់ខ្ញុំ​នេះ អ្នក​ដែល​បាន​សាកល្បង​ញ៉ាំ​ម្តង​ហើយ​តែងតែ​ត្រឡប់​មក​ទិញ​ម្តងទៀត មិនថា​ភ្ញៀវ​ខ្មែរ ឬ​បរទេស​នោះ​ទេ ដោយសារ​តែយើង​ប្រើ​គ្រឿង​ផ្សំល្អ​ៗ បន្លែ​ស្រស់ៗ ពិសេស​សាច់​តែម្តង​គឺ​យើង​ជ្រើស​រើសយក​សាច់​ដែល​មានគុណ​ភាពល្អ​សម្រាប់​ធ្វើ​ឲ្យត្រូវ​ជាមួយ​ម្សៅ​ភីហ្សា​បែប​អ៊ីតាលី​នេះ»។

តែ​ចំណុច​ពិសេស​មួយទៀត​របស់​ភីហ្សា​នេះ​គឺត្រង់​ថា​ប្រើឡ​ដុត​ជាមួយ​នឹង​អុស​ដែល​ជាប្រពៃណី​ដើម​របស់​អ៊ីតាលី​តែម្តង គឺ​ធ្វើឲ្យ​នំ​ភីហ្សា​មាន​រសជាតិ​ស្រួយ​ឆ្ងាញ់។

រទេះ​នំភីហ្សា​នៅ​ផ្លូវ ១៥៥ ទល់មុខ​ហាង​លក់​សម្លៀក​បំពាក់ Zando។ ភីហ្សា​ខ្នាតតូច តម្លៃ ៥,៥ ដុល្លារ និង​ខ្នាត​ធំ ៨,៥ ដុល្លារ ទូរស័ព្ទ​លេខ ០៩៦ ៨៣៦ ២៧២៨៕

Content image - Phnom Penh Post
ភីហ្សា​រសជាតិគ្រឿង​សមុទ្រ​ខ្នាត​កណ្ដាល។ ឈឹម ស្រីនាង

អត្ថបទគួរចាប់អារម្មណ៍