The Phnom Penh Post Search

Search form

Logo of Phnom Penh Post newspaper Phnom Penh Post - វិធី​ធ្វើ​ញាំ​ត្រយូង​ចេក​ស្បែក​ជ្រូក​​ឆ្ងាញ់​​ ហើយ​មាន​សោភ​ណភាព​




វិធី​ធ្វើ​ញាំ​ត្រយូង​ចេក​ស្បែក​ជ្រូក​​ឆ្ងាញ់​​ ហើយ​មាន​សោភ​ណភាព​

Content image - Phnom Penh Post
ញាំ​ត្រយូង​ចេកស្បែក​ជ្រូក​ ​ញ៉ាំ​ជា​គ្រឿង​ក្លែម ឬ​ជាមួយ​បាយ​ក៏​បាន​។ សារី​

វិធី​ធ្វើ​ញាំ​ត្រយូង​ចេក​ស្បែក​ជ្រូក​​ឆ្ងាញ់​​ ហើយ​មាន​សោភ​ណភាព​

ភ្នំពេញ: ត្រយូង​ចេក​ ​មាន​គុណ ប្រយោជន៍​ច្រើន​ចំពោះ​សុខភាព។ វា​ត្រូវ​បាន​គេ​រក​ឃើញ​ថា​អាច​ជួយ​រាង​កាយ​ការពារ​ជំងឺ​ទឹក​នោម​ផ្អែម​ ​លើស​ជាតិ​ស្ករ​ក្នុង​ឈាម និង​មហារីក​។

បន្លែ​មាន​ជាតិ​សរសៃ​មួយ​នេះ​ជួយ​បង្កើត​កោសិកា​​ឈាម​ក្រហម​ ព្រមទាំង​​ផ្ទុក​នូវ​​ប្រូតេអ៊ីន ម៉ាញេស្យូម ជាតិ​ដែក កាល់ស្យូម និង​ស័ង្កសី។

វា​ត្រូវ​បាន​គេ​ប្រើ​ធ្វើ​ជា​បន្លែ​អន្លក់​ ល្បោយ​នំ​បញ្ចុក ស្ល ចំហុយ និង​ញាំ​ជាដើម។ ម្ហូបពី​ត្រយូង​ចេក​ដែល​ងាយ​ធ្វើ​​បំផុត​នោះ​គឺញាំ ដែល​យើង​ត្រូវការ​គ្រឿង​ផ្សំដូច​ជា ស្បែក​ជ្រូក ជីរ​គ្រប់​មុខ សណ្ដែក​ដីបុក ម្ទេស ក្រូច​ឆ្មារ ខ្ទឹមស ស្ករ​ស និង​ម្សៅ​ស៊ុប។

ដំបូង​ត្រូវយ​ក​ស្បែក​ជ្រូកមក​ចំហុយ​ឲ្យ​ឆ្អិន​ល្អ រួច​ហាន់ជា​សរសៃៗ ហើយ​ទុក​ក្នុង​ចាន​គោម​ធំ។

ម្ទេស​ត្រូវ​ហាន់​វា​ជា​កង់ៗ​តូចៗ។ ជីរ​គ្រប់មុខ​ត្រូវ​បេះ​វាលាង​ទឹក។ ខ្ទឹម​ស​ត្រូវ​ហាន់ស្ដើងៗ។ ត្រយូង​ចេក​ត្រូវ​​ហាន់​ស្ដើងៗ រួច​ត្រាំ​ទឹក​ ដោយ​ច្របាច់​ក្រូច​ឆ្មារ​ចូល​បន្តិច​កុំ​ឲ្យ​វា​ប្រែ​ពណ៌​ខ្មៅជាំ។

ដាក់​ត្រយូង​ចេក​ដែល​ហាន់​រួច​ក្នុ​ង​ចាន​គោមជាមួយ​​ស្បែក​ជ្រូក រួច​ដាក់​ខ្ទឹ​ម​ស ម្ទេស ជីរ​គ្រប់​មុខ ហើយ​ច្របាច់​ក្រូចឆ្មារ ចាក់​ទឹកត្រី ដាក់​សណ្ដែក​ដី​បុក បង់​ស្ករស និង​ម្សៅស៊ុប សឹម​ច្របល់​ឲ្យ​ចូល​ជាតិ​គ្នា។

ដើម្បី​បន្ថែម​សោភណភាព ស្រទាប់​ត្រយូង​ចេក ៧-៨ សន្លឹក​​នៅ​សល់​​ត្រូវ​​កាត់​ស្រួចៗ​ដូច​ធ្មេញ​រណារ​ដូចក្នុង​រូបភាព រួច​តម្រៀប​ទ្រាប់​បាត​​ចាន ហើយ​ចាំ​ដួស​ញាំ​ដាក់​ពីលើ និង​បន្ថែម​ម្ទេស​ដៃ​នាង​ក្រហម​ឆ្អិន​ឆ្អៅ​ទាំង​មូល នោះ​ជាការ​ស្រេច៕

អត្ថបទគួរចាប់អារម្មណ៍