ភ្នំពេញ: បើនិយាយពីសង្វាក់ យើងច្រើនតែគិតទៅដល់ខេត្តបាត់ដំបង។ តែពេលនេះ មិនបាច់ចំណាយពេលជិះទៅបាត់ដំបងដើម្បីញ៉ាំសង្វាក់ទេ។ នៅទីក្រុងភ្នំពេញ មានកន្លែងច្រើនគួរសមដែលលក់សង្វាក់អាំងនេះ។
ក្នុងចំណោមកន្លែងលក់សង្វាក់ ទាំងនោះ មួយកន្លែងស្ថិតនៅទល់មុខវត្តបទុមវត្តី មានឈ្មោះថា «សង្វាក់គ្រួសារខ្ញុំ» ដែលបានបើកលក់អស់រយៈពេល ៤ ឆ្នាំ កន្លះមកហើយ មានភ្ញៀវចូលញ៉ាំពេញៗ មិនថាអ្នកជិះ កង់ ម៉ូតូឬឡាននោះទេ។
លោក ឃុន ឆាលី ជាម្ចាស់ទីកន្លែងលក់សង្វាក់គ្រួសារខ្ញុំ បានឲ្យដឹងថា៖ «ខ្ញុំជាអ្នកស្រុកបាត់ដំបង បានបើកលក់សង្វាក់នៅទីក្រុងភ្នំពេញនេះអស់រយៈពេល ៤ ឆ្នាំកន្លះមកហើយ»។
លោកបានរំឭកទៀតថា៖ «កាលពីមុនយើងបើកភ្លាមៗ គឺមានភ្ញៀវមកញ៉ាំច្រើន ដោយក្នុងមួយថ្ងៃលក់បាន ១៥០០ សង្វាក់។ ពេលនោះខ្ញុំបានកុម្ម៉ង់សង្វាក់ផ្ទាល់ពីអ្នកធ្វើសង្វាក់នៅខេត្តបាត់ដំបងតែម្តង តែសម្រាប់ឥឡូវនេះមានអ្នកលក់ច្រើនពេកទៅយើងលក់បានតែ ១២០០ ទៅ ១៣០០ សង្វាក់ ប៉ុណ្ណោះ ហើយសង្វាក់ ដែលខ្ញុំយកមកលក់សព្វថ្ងៃនេះគឺបងប្អូនខ្ញុំគាត់ធ្វើផ្ទាល់ដោយខ្លួនឯងវិញ អ៊ីចឹងងាយស្រួលសម្រាប់ខ្ញុំកុម្ម៉ង់លក់មួយថ្ងៃៗ តែប៉ុណ្ណោះ»។
សង្វាក់គ្រួសារខ្ញុំនេះ មានភាពល្បីល្បាញដដែល ដោយសារតែនៅទីនេះរក្សានូវរសជាតិឆ្ងាញ់ បន្លែស្រស់ៗ លាងបានស្អាត មានអនាម័យល្អ ធ្វើឲ្យភ្ញៀវមកម្ដងហើយម្តងទៀត។
លោក ឆាលី បានបន្តថា៖ «សង្វាក់មួយឈុតមានសង្វាក់ ៨ គ្រាប់ បន្លែមួយចាន និងនំបញ្ចុកមួយចាន តម្លៃ ៦០០០ រៀល ក្រៅពីសង្វាក់គឺយើងមានលក់ប្រហិតចៀនជ្រលក់ទឹកសៀង ជារសជាតិប្រចាំខេត្តបាត់ដំបងតែម្តង ដោយក្នុងមួយថ្ងៃយើងអាចលក់ប្រហិតសាច់គោបានប្រហែលជា ៨ ទៅ ១០ គីឡូ ដោតចង្កាក់ ២០០០ រៀល ញ៉ាំជាមួយទឹកសៀងពិសេសមាន ២ រសជាតិហឹរ និងធម្មតា»។
សង្វាក់គ្រួសារខ្ញុំ នៅជិតវត្តបទុមវត្តី អាចទាក់ទងតាមទូរស័ព្ទលេខ ០៩៨ ៣៩៩ ៣៥៩៕