.jpg)
ប៊ឺហ្គឺផ្សំពីដង្កូវពណ៌ស ដែលទទួលស្គាល់ថាជាសត្វល្អិតមានសុវត្ថិភាពក្នុងការទទួលទាន។ រូបថត AFP
ក្រុងព្រុចសែល៖ អង្គភាពចំណីអាហាររបស់សហភាពអឺរ៉ុបកាលពីសប្ដាហ៍មុន បានត្រួសត្រាយផ្លូវសម្រាប់អ្នកទទួលទាននៅទូទាំងតំបន់អឺរ៉ុបដើម្បីមានឱកាសបានទំពារសត្វល្អិត ខណៈអង្គភាពនេះបានផ្ដល់ការអនុម័តសុវត្ថិភាពសម្រាប់ការទទួលទានរបស់មនុស្សនូវដង្កូវសឆ្អើរ។
សេចក្ដីសម្រេចរបស់អាជ្ញាធរសុវត្ថិភាពចំណីអាហារអឺរ៉ុប (EFSA) ជាជំហានត្រូវដើរទៅមុខដ៏ចាំបាច់ មុនពេលក្រុមមន្ដ្រីអាចសម្រេចថា តើគួរអនុញ្ញាតឱ្យមានការលក់ដូរដង្កូវស លក់នៅបណ្ដាប្រទេស ២៧ នៃតំបន់អឺរ៉ុបឬយ៉ាងណា។
ការសម្រេចនេះកើតចេញពីការវាយតម្លៃចុងក្រោយបឋមលើហានិភ័យចំពោះសុវត្ថិភាពចំណីអាហារសត្វល្អិត ដែលដាក់ស្នើដោយទីភ្នាក់ងារ ខណៈវាក៏ត្រៀមបង្កើនពាណិជ្ជកម្មធំដុំ ដែលអាចផ្ដល់ជាប្រភពប្រូតេអ៊ីនចីរភាព។
Ermolaos Ververis មន្ដ្រីផ្នែកវិទ្យាសាស្ដ្រក្នុងអង្ភភាព NUTRI នៃអាជ្ញាធរ (EFSA) បានឱ្យដឹងក្នុងសេចក្ដីថ្លែងការណ៍ថា៖ «វាអាចត្រួសត្រាយផ្លូវសម្រាប់ការអនុម័តជាផ្លូវការលើកដំបូងនៅទូទាំងតំបន់អឺរ៉ុប»។
EFSA បានឱ្យដឹងថាខ្លួនបានរកឃើញថាដង្កូវស ឬដង្កូវតេណេប្រ៊ីយ៉ូម៉ូលីទ័រមានសុវត្ថិភាពចំពោះការទទួលទាន ទាំងការទំពារទាំងមូល ឬជាទម្រង់ម្សៅក្រោយពីមានការស្នើសុំពីក្រុមហ៊ុនសត្វល្អិតបារាំង Micronutris។
សាច់ប៊ឺហ្គើផ្សំពីសត្វល្អិនកិនចូលគ្នា មានដាក់លក់នៅទីផ្សារអឺរ៉ុប។ រូបថត AFP
សេចក្ដីថ្លែងការណ៍បានបន្ដថា៖ «សមាសធាតុចម្បងរបស់វាគឺមានប្រូតេអ៊ីនខ្លាញ់ និងហ្វៃប៊័រ»។
ប៉ុន្ដែអង្គភាពបានព្រមានថា ពួកគេត្រូវមានការស្រាវជ្រាវបន្ថែមទៀតជុំវិញបញ្ហាអ្នកមានអាឡាក់ស៊ីចំពោះសត្វល្អិត។
អាជ្ញាធរ EFSA មូលដ្ឋាននៅប្រទេសអ៊ីតាលីបានបើកការស៊ើបអង្កេតបន្ថែមទៀតលើអាហារសត្វល្អិត និងក៏ត្រៀមសិក្សាមើលថាតើចង្រិតនិងកង្កូបក៏អាចជាអាហារដ៏ឆ្ងាញ់ពិសាផងដែរ។
សត្វល្អិតត្រូវបានទទួលទានយ៉ាងទូលំទូលាយរួចហើយនៅតំបន់ផ្សេងៗទៀតនៃសកលលោកដោយមានការប៉ាន់ប្រមានថា សត្វល្អិតប្រមាណ ១ ពាន់ប្រភេទ ត្រូវបានក្លាយជាអាហារសម្រាប់ប្រជាជន ២ពាន់លាននាក់នៅតំបន់អាហ្វ្រិក អាស៊ី និងអាមេរិកឡាទីន។
ខាងឧស្សាហកម្មសត្វល្អិត បានឱ្យដឹងថាខ្លួនរំពឹងថា ទីផ្សារនៅអឺរ៉ុបចំពោះផលិតផលធ្វើពីសត្វល្អិតនឹងកើនឡើងយ៉ាងខ្លាំងនៅប៉ុន្មានឆ្នាំបន្ទាប់ ហើយផលិតផលទាំងនេះនឹងហក់ឡើងប្រមាណ ២៦ ម៉ឺនតោន នៅឆ្នាំ ២០៣០៕ AFP/HR
ស្ត្រីម្នាក់ភ្លក្សស្ករសូកូឡាលាយសត្វល្អិត ដែលជាទំនោរទទួលទានថ្មីនៅបស្ចិមប្រទេស។ រូបថត AFP
