.jpg)
អ្នកនាង វណ្ណនីតា បំពងសត្វល្អិតដ៏មានអនាម័យ។ កណ្ដូបបំពងស្រួយ ១ កំប៉ុងតូចតម្លៃ ៣ ដុល្លារ និងកំប៉ុងធំតម្លៃ ៦ ដុល្លារ។ ហេង ជីវ័ន
ភ្នំពេញៈ ចង្រិតដូង និងកណ្តូបជាច្រើនក្បាលត្រូវបានលាងទឹក សម្ងួតដាក់ក្នុងកញ្ច្រែងយ៉ាងស្អាតមុននឹងច្របល់ជាមួយអំបិល និងស្ករសរួចដាក់ក្នុងខ្ទះប្រេងកំពុងក្តៅខ្លាំង។
សត្វល្អិតដ៏ស្រួយខ្ញោកដែលស្រង់ចេញមកត្រូវលាយគ្រឿង ក្រឡុកជាមួយស្លឹកក្រូចសើច និងសសៃគល់ស្លឹកគ្រៃឆ្មារៗមុននឹងច្រកដាក់ចូលទៅក្នុងកំប៉ុងក្រដាស បិទស្ទិកឃ័រ «ស្រួយ ស្រួយ»។
នេះជាស្នាដៃអ្នកនាង មាស វណ្ណនីតា អ្នកជំនាញផ្នែកអាយធីជាម្ចាស់ហាងលក់សត្វល្អិតបំពងក្រឡុកគ្រឿងរសជាតិដែលមានការពេញនិយមបំផុតនៅប្រទេសថៃដោយមានបងថ្លៃអ្នកនាងជាអ្នកបោះដុំសត្វល្អិតស្រាប់ផង។
អ្នកជំនាញអាយធីដែលលាឈប់ពីការងារមកប្រកបរបរខ្លួនឯងរូបនេះបានប្រាប់ ភ្នំពេញ ប៉ុស្តិ៍ ដោយផ្ទាល់ថា៖ «ទោះបីជាមិនទាន់បានបើកកន្លែងត្រឹមត្រូវក៏ដោយ ប៉ុន្តែភ្ញៀវដែលបានកុម្ម៉ង់សុទ្ធតែជាអ្នកមាន និងកាលីបជិះឡានតម្លៃថ្លៃក្នុងនោះក៏មានតារាមួយចំនួនដែរដូចជាកញ្ញា នីគី គឺជាម៉ូយប្រចាំជួនកាលនៅថ្ងៃដែលគាត់សម្រាកពីការថតអាចកុម្ម៉ង់ ២ កំប៉ុងទៅញ៉ាំ ព្រោះតែរសជាតិឆ្ងាញ់»។
ស្រួយ ស្រួយ មានលក់ចង្រិតដូងមានពង ១ កំប៉ុងតូចតម្លៃ ៥ ដុល្លារ និងកំប៉ុងធំតម្លៃ ១០ ដុល្លារ។ រីឯចង្រិតអត់ពង និងកណ្តូបវិញ ១ កំប៉ុងតូចតម្លៃ ៣ ដុល្លារ និងកំប៉ុងធំតម្លៃ ៦ ដុល្លារ។
គ្រឿងផ្សំនានាក្នុងការចម្អិនសត្វល្អិតបំពង។ ហេង ជីវ័ន
អ្នកលក់វ័យ ២៨ ឆ្នាំរូបនេះបានបង្ហើបថា ខ្លួនកំពុងតែរៀបចំធ្វើហាងនៅខាងមុខផ្ទះដើម្បីដាក់លក់សត្វល្អិតបន្ថែមទៀតមាន រពីង ដុកឌឿ កន្ទាទូក និងប្រមូលផ្តុំសត្វល្អិតជាច្រើនប្រភេទទៀតដើម្បីឲ្យអ្នកដែលនឹកចង់ញ៉ាំសត្វល្អិត គឺនឹកដល់ហាង ស្រួយ ស្រួយ តែម្ដង។
ម្ចាស់ហាងសត្វល្អិត ស្រួយ ស្រួយ អ្នកនាង មាស វណ្ណនីតា បានបញ្ជាក់ថា៖ «មានភ្ញៀវគាំទ្រច្រើនមិនមែនមកពីរសជាតិតែមួយមុខនោះទេ វាគួបផ្សំជាមួយតម្លៃទីផ្សារ ពិសេសគឺគុណភាពអនាម័យខ្ពស់។ ភ្ញៀវដែលបានសាកភ្លក្សចង្រិត ឬ កណ្តូបនៅ ស្រួយ ស្រួយ តែងតែលាន់មាត់ថា មិនធ្វើឲ្យឈឺកដូចកន្លែងដទៃ ហើយថែមទាំងឆ្ងាញ់ទៀតផង»។
សត្វល្អិតបំពង ស្រួយ ស្រួយ មានទីតាំងនៅផ្ទះលេខ ២២ E តាមផ្លូវលេខ ៥៩៤ ខណ្ឌទួលគោក ជិតសាលា ភ្យូឆឺលីដឺ ទាក់ទងតាមទូរស័ព្ទ ០១២ ៦៨៦ ៤៤៤៕
ចង្រិតបំពងរួចត្រូវបានដាក់លើក្រដាសឲ្យបឺតប្រេង។ ហេង ជីវ័ន
ការចម្អិន និងវេចខ្ចប់មានអនាម័យពី ស្រួយ ស្រួយ។ហេង ជីវ័ន
