.jpg)
ទិដ្ឋភាពក្យូសនៅលើទឹក នៅភោជនីយដ្ឋាន សម្រស់ព្រៃប្រស់ ជាទីសំចតសម្រាកទទួលទានអាហារ។ រូបថត យូសុះ អាប់ឌុលរ៉ាស់ហ៊ីម
កំពង់ធំ៖ ដំណើរប្រមាណ ៥ ម៉ោង ទៅមកពីភ្នំពេញទៅសៀមរាប អ្នកដំណើរតាមផ្លូវជាតិលេខ ៦ និយមឈប់សម្រាកលម្ហែកាយ និងទទួលទានម្ហូបខ្មែរឆ្ងាញ់ៗ នៅភោជនីយដ្ឋាន សម្រស់ព្រៃប្រស់ ដែលមានក្យូសមាត់ទឹកអាចឲ្យភ្ញៀវគយគន់សម្រស់ផ្ទៃបឹងព្រៃប្រស់ធំល្វឹងល្វើយ ស្រូបជំនោរខ្យល់ធម្មជាតិ អមដោយទេសភាពស្រុកស្រែនៅត្រើយម្ខាង។
អ្នកគ្រប់គ្រងភោជនីយដ្ឋាន សម្រស់ព្រៃប្រស់ លោក ជឹង សានណា បានប្រាប់ឲ្យដឹងពីមូលហេតុនៃការបង្កើតភោជនីយដ្ឋាននេះថា៖ «ថៅកែនៅទីនេះ គាត់មានក្រុមហ៊ុនដឹកជញ្ជូនភ្ញៀវទេសចរខ្លួនគាត់ គាត់មានឡានដឹកភ្ញៀវស្រាប់ និងមានដីស្រាប់ អ៊ីចឹងនៅឆ្នាំ ២០១៦ គាត់ក៏បង្កើតកន្លែងហ្នឹងទៅ ហើយដំបូងក៏គាត់បើកសម្រាប់តែភ្ញៀវគាត់ដែរទុកឲ្យភ្ញៀវចូលញ៉ាំអាហារ និងសម្រាកតែប៉ុណ្ណឹង»។
លោកបន្ថែមថា៖ «ពេលចាប់បើកដំណើរការដំបូង ភោជនីយដ្ឋានទទួលបានតែភ្ញៀវដែលជាអ្នកទេសចររបស់ក្រុមហ៊ុននេះប៉ុណ្ណោះ ចំណែកអ្នកដំណើរផ្សេងទៀត ហាក់មានចំនួនតិចតួចរហូតដំណើរការបាន ១ ឆ្នាំ ភោជនីយដ្ឋានទទួលបានការគាំទ្រច្រើនពីអ្នកដំណើរទូទៅ និងល្បីរហូតមកដល់សព្វថ្ងៃ សូម្បីតែស្ថានភាពនៅតំបន់នេះក៏មានការប្រែប្រួលផងដែរ ពីមុនទីនេះ ជាទីស្ងាត់មិនសូវមានមនុស្ស តែពេលនេះមានមនុស្សរស់នៅកាន់តែច្រើន»។
ស្ថាបនាលើផ្ទៃដី ១ ហិកតាកន្លះ ដែលធំទូលាយងាយស្រួលចតរថយន្ត ភោជនីយដ្ឋាន សម្រស់ព្រៃប្រស់ មានក្យូសធ្វើពីឈើប្រក់ស្បូវចំនួន ២៩។ ក្យូសធំៗចំនួន ២ ដែលអាចទទួលភ្ញៀវបាន ២៥ នាក់ និងមានក្យូសតូចចំនួន ២៧ អាចឲ្យភ្ញៀវអង្គុយបាន ១០ នាក់ក្នុងក្យូសនីមួយៗ។
ស្ថិតក្នុងចំណោមទីសំចតទទួលទានអាហារ ដែលបើកព្រោងព្រាតតាមផ្លូវជាតិលេខ ៦ ភោជនីយដ្ឋានសម្រស់ព្រៃប្រស់ រក្សាភាពលេចធ្លោរបស់ខ្លួន ដោយផ្ដោតលើទីតាំងល្អ ជម្រើសបន្ទប់បំពាក់ម៉ាស៊ីនត្រជាក់ កន្លែងអង្គុយមានផាសុកភាព តម្រូវចំណូលចិត្តអ្នកនិយមភាពស្ងប់ស្ងាត់។ ទេសភាពស្រស់ស្អាត ខ្យល់ត្រជាក់បរិសុទ្ធ ឡោមដោយធម្មជាតិផ្ទៃបឹង ព្រៃព្រឹក្សា សត្វស្លាប និងសកម្មភាពនេសាទលក្ខណៈគ្រួសារ។
ចំពោះសេវាកម្មអាហារ ម្ហូបប្រចាំសម្រស់ព្រៃប្រស់មានដូចជា មាន់ដុតទឹកឃ្មុំត្រយូងចេកកូកា តម្លៃ ៥ ម៉ឺន ទៅ ៦ ម៉ឺនរៀលតាមទំហំមាន់ ត្រីរ៉ស់ដុត តម្លៃ ២៥ ០០០-៣៥ ០០០ រៀល និងមានម្ជូរស្រែ ម្ជូរគ្រឿង ម្ជូរយួន សាច់គោអាំងជ្រុញ ប្រហុកអាំងជ្រុញ គោងៀត ក្របីងៀត ខ្យងអាំង សម្លខ្មែរបែបស្រុកស្រែគ្រប់ប្រភេទ និងមានម្ហូបឆ្អិនស្រាប់ជាច្រើនទៀតជាមួយតម្លៃសមរម្យ។
ម្ហូបខ្មែរបែបស្រុកស្រែឆ្ងាញ់ៗ មានតម្លៃថោកសមរម្យ។ រូបថត យូសុះ អាប់ឌុលរ៉ាស់ហ៊ីម
អ្នកគ្រប់គ្រងភោជនីយដ្ឋាន សម្រស់ព្រៃប្រស់ បានឲ្យដឹងទៀតថា៖ «មាន់នៅភោជនីយដ្ឋានយើង គឺមាន់ស្រែ សុទ្ធល្អ ឆ្ងាញ់ សូម្បីតែត្រីក៏អ៊ីចឹងដែរ ព្រោះយើងប្រមូលទិញពីប្រជាពលរដ្ឋរស់នៅជុំវិញនេះ គាត់ចិញ្ចឹមមាន់ និងនេសាទត្រីហ្នឹង»។
បន្ថែមពីនេះ លោក ជឹង សានណា អាយុ ៣២ ឆ្នាំ បញ្ជាក់ថា៖ «នៅភោជនីយដ្ឋានយើងស្អាត តែបើខែ ១០ គឺស្អាតខ្លាំង ព្រោះទឹកឡើង ផ្ទៃទឹកស្អាតណាស់ មានឈូក មានត្រកួន មានខ្យល់ត្រជាក់ ហើយបើភ្ញៀវចង់ស្ទូចត្រី មានសន្ទូចឲ្យខ្ចីដោយឥតគិតលុយទេ ហើយទីនេះសម្បូរត្រីណាស់ មានត្រីឆ្តោ ត្រីឌៀប ត្រីរ៉ស់ ត្រីសណ្តាយ ត្រីកេះ ឆ្លូញជាដើម»។
ចាប់បើកពីម៉ោង ៦ ព្រឹក ដល់ម៉ោង ៩ យប់ ភោជនីយដ្ឋានមានសេវាកម្មរហ័ស ដោយបុគ្គលិកមានចំនួនជិត ៥០ នាក់ ដែលជាប្រជាជនរស់នៅក្នុងតំបន់នេះ ដែលនេះ គឺជាការលើកស្ទួយការងារដល់ប្រជាជន ផ្តល់ប្រាក់ខែ ចៀសវាងពីការចំណាកស្រុក ថែមទាំងកាត់បន្ថយការចំណាយដោយភោជនីយដ្ឋានមានអាហារ ២ ពេល សម្រាប់បុគ្គលិកទាំងអស់។
ភោជនីយដ្ឋាន សម្រស់ព្រៃប្រស់ មានក្យូសសរុបចំនួន ២៩ សម្រាប់អង្គុយញ៉ាំអាហារ។ រូបថត យូសុះ អាប់ឌុលរ៉ាស់ហ៊ីម
លោក សានណា រៀបរាប់ថា៖ «ទិដ្ឋភាពនៅភោជនីយដ្ឋានសម្រស់ព្រៃប្រស់ នាពេលរាត្រី មានសម្រស់ស្រស់ស្អាត ដោយនៅតាមស្ពានឆ្លងកាត់ មានបំពាក់អំពូល ដែលប្រើប្រាស់ថាមពលសូឡា ចែងចាំងប៉ះផ្ទៃទឹក បង្កើតបានជាសម្រស់ប្លែកមួយ ឡោមជាមួយរាត្រីស្ងប់ស្ងាត់ បន្លឺសំឡេងសត្វល្អិតយំ ជាវេលាដ៏ស័កិ្តសម សម្រាប់ការជួបជុំគ្រួសារ»។
ថ្ងៃធម្មតាភោជនីយដ្ឋាននេះទទួលបានភ្ញៀវ ៣០០ នាក់ និងនៅថ្ងៃចុងសប្តាហ៍ ទទួលភ្ញៀវបានប្រមាណជិត ៥០០ នាក់ ចំណែកថ្ងៃបុណ្យទាន គឺពេញគ្មានកន្លែងអង្គុយ ដោយគិតជាចំនួនប្រមាណ ៨០០ នាក់។
ទៅថ្ងៃអនាគត ភោជនីយដ្ឋានមានគម្រោងពង្រីកចំណតឲ្យធំ និងធ្វើជាបាងហ្គាឡូសម្រាប់សម្រាក ដែលមានកាណូតសម្រាប់ជិះកម្សាន្តផងដែរ។
ភោជនីយដ្ឋាន សម្រស់ព្រៃប្រស់ ស្ថិតនៅស្រុកកំពង់ស្វាយ ខេត្តកំពង់ធំ ចម្ងាយ ១៨ គីឡូម៉ែត្រ ពីទីរួមខេត្ត កំពង់ធំ តាមផ្លូវជាតិលេខ ៦ ជាប់នឹងស្ពានព្រៃប្រស់លេខទូរស័ព្ទ ០១៥ ៨១ ៩៧ ៨៩ និង ០១១ ៨៤ ៩៤ ៨៧ ហ្វេសប៊ុក ភោជនីយដ្ឋាន សម្រស់ព្រៃប្រស់៕
វីដេអូ៖
