The Phnom Penh Post Search

Search form




Logo of Phnom Penh Post newspaper Phnom Penh Post - សម្ល​ទំពាំង​ខ្យង​ត្រី​ពោ​ហឹរ​ពីភោជ​នីយ​ដ្ឋាន​វ័នម័រ




សម្ល​ទំពាំង​ខ្យង​ត្រី​ពោ​ហឹរ​ពីភោជ​នីយ​ដ្ឋាន​វ័នម័រ

Content image - Phnom Penh Post
សម្ល​​ត្រពាំង​ខ្យង​មាន​បន្លែ​បៃតង​ចម្រុះ​សម្បូរ​ដោយវី​តាមីន​។ ឈឹម ស្រីនាង

សម្ល​ទំពាំង​ខ្យង​ត្រី​ពោ​ហឹរ​ពីភោជ​នីយ​ដ្ឋាន​វ័នម័រ

ភ្នំពេញ: ជម្រាប​សួរ​មិត្ត​អ្នក​អាន​ភ្នំពេញ ប៉ុស្ដិ៍​ សប្ដាហ៍​នេះ​នាង​ខ្ញុំនឹង​នាំ​លោក​អ្នកទៅ​ភ្លក្ស​ម្ហូប​ សម្ល​ទំពាំង​ខ្យង​ត្រីពោ​ នៅ​ភោជនីយដ្ឋាន​វ័នម័រ (One More)។

សម្ល​នេះ​ត្រូវបាន​ចម្អិន​ដោយ​ប្រើ​បន្លែ​បៃតង។ ជាង​នេះ​ទៅទៀត​រសជាតិ​នៃ​សាច់​ខ្យង ជាមួយ​នឹង​ទំពាំង បន្ថែម​ដោយ​សាច់​ត្រីពោ​ និងត្រី​ប្រហុក​នោះ ពិត​ជា​បង្កើន​រសជាតិ​សម្ល​កាន់​ត្រូវ​មាត់​តែ​ម្ដង។

ដូច្នេះ​ហើយ ទើប​សម្លមាន​ប្រភព​មកពី​ទីជន​បទ​មួយ​នេះ មាន​វត្តមាន​នៅ​ក្នុង​បញ្ជី​រាយ​នាម​មុខម្ហូប​ភោជនីយ​ដ្ឋាន​វ័នម័រ។ប្រិយ​មិត្ត​ដែល​​ចង់រៀន​ធ្វើម្ហូប​នេះ ដោយ​ខ្លួន​ឯង សូម​រីករាយ​នឹង​វិធី​ចម្អិន​ដូច​ខាង​ក្រោម៖

គ្រឿងផ្សំ: ត្រីពោ ប្រហុក​ត្រី ទំពាំង ខ្យង ស្លឹក​ម្ទេស ស្លឹកបាស់ ផ្សិតចំបើង ផ្សិត​ស ខ្ទឹមស ស្អំ ននោង និង​ម្ទេស។

គ្រឿង​ផ្សំរសជាតិ: ស្ករស អំបិល ទឹកត្រី​ និង​ម្សៅស៊ុប។

វិធីចម្អិន: ដំបូង​ត្រូវ​បេះ​ស្លឹក​ម្ទេស ស្អំ និង​ស្លឹកបា​ស់​រួច​លាង​ឲ្យស្អាត។ ទំពាំង​ត្រូវ​ហាន់ស្ដើងៗ​រួច​យក​មក​ស្ងោរ​ជាមួយ​ទឹក​អង្ករ ដើម្បី​ឲ្យ​អស់​ជាតិហាង មុន​នឹង​ជ្រំ​ប្រហុក​ចូល។ ត្រីពោត្រូវ​លាង​រួចកាត់​ជា​កង់ៗ។

បន្ទាប់មក​ទៀត​ត្រូវ​ដាក់​ឆ្នាំង​ដាំ​ទឹក​ឲ្យពុះ រួច​ដុំខ្ទឹម​ស​ដាក់។ ចាប់ផ្ដើម បង់​ត្រីពោ និង​គ្រឿងផ្សំ​រសជាតិ រួម​មាន អំបិល ស្ករស ទឹកត្រី​និង​ម្សៅស៊ុប​ សឹម​ជ្រុំ​ប្រហុក​ចូល​មួយរំពុះ។

បន្ទាប់​មក​ទៀត​ចាប់​ផ្ដើមបង់​ទំពាំង ននោង និងខ្យង​រួចទុក​ឲ្យ​ឆ្អិន សឹម​ដាក់​ស្លឹក​បាស់ ស្លឹក​ម្ទេស និង​ស្អំនោះ​ជាការ​ស្រេច។​ ដើម្បី​បង្កើន​សោភ​ណភាព​ចានអាហារ សូម​បន្ថែម​ម្ទេស​ក្រហម ២-៣ គ្រាប់ នឹង​មើល​ទៅគួរ​ឲ្យ​ចង់ស្រក់​ទឹក​មាត់។

ស្ថិត​នៅ​តាមផ្លូវ​ ៣១៥​ ក្នុង​ខណ្ឌ​ទួលគោក ​ភោជនីយ​ដ្ឋាន វ័នម័រ មាន​បម្រើ​ម្ហូប​ខ្មែរមាន​ប្រវត្តិ​ដ៏យូរ​លង់​ និង​ម្ហូបសែ​រាជវង្ស​ជាច្រើន​មុខទៀត​ផង៕

អត្ថបទគួរចាប់អារម្មណ៍