The Phnom Penh Post Search

Search form




Logo of Phnom Penh Post newspaper Phnom Penh Post - សម្ល​ទំពាំង​ស្អំខ្យង​ពីហាង មាតុភូមិ ​អាហារ​ខ្មែរ​សុទ្ធ ១០០ ភាគរយ​




សម្ល​ទំពាំង​ស្អំខ្យង​ពីហាង មាតុភូមិ ​អាហារ​ខ្មែរ​សុទ្ធ ១០០ ភាគរយ​

Content image - Phnom Penh Post
សម្ល​ទំពាំង​ស្អំ​ខ្យង​​ថែម​ទឹក​ត្រី​ម្ទេសហឹរ​រឹតតែ​ឆ្ងាញ់​នៅ​ហាង​មាតុភូមិ។ រូប សហការី

សម្ល​ទំពាំង​ស្អំខ្យង​ពីហាង មាតុភូមិ ​អាហារ​ខ្មែរ​សុទ្ធ ១០០ ភាគរយ​

ភ្នំពេញ: មិនខុស​ពីស្លាក​យីហោ​ហាង​ដែល​មាន​ន័យយ៉ាង​ច្បាស់​ថា «ប្រទេស​កំណើត»​ ហាង «មាតុ​ភូមិ ប្រហុក និង​អន្លក់» បានរ​ក្សា​អត្តសញ្ញាណ​ខ្មែរ​តាំង​ពីការ​ចម្អិន​ម្ហូប​អាហារ​បែប​ខ្មែរ​សុទ្ធសាធ​ ការ​តុបតែង និង​តន្ត្រី​បុរាណ​ចាក់​កំដរ​ភ្ញៀវ។

ម្ចាស់​ហាង លោក​ មាស ម៉ែន បាន​អះអាង​ថា៖ «យើង​យកម្ហូប​ខ្មែរ​មួយ​ជ្រុង​មក​លក់ ដោយ​មិន​លាយ​ឡំ​ជា​មួយ​ម្ហូប​បរទេស​ឡើយ»។

លោក​បាន​បញ្ជាក់​ថា៖ «ខ្ញុំ​ប្រកាន់​ខ្ជាប់​នូវការ​លក់តែ​ម្ហូបខ្មែរ ដោយ​មិន​បន្ថែម​នូវម្ហូប​បរទេស​ចូល​នោះទេ គឺចង់​បង្ហាញ​ឲ្យខ្មែរ​យើង​ភាគច្រើន​បាន​ស្គាល់ពី​ម្ហូប​ខ្មែរ និងបន្ត​គាំទ្រ​ម្ហូប​ជាតិ​យើងឲ្យ​បាន​ច្រើន»។

នៅ​ខាង​មុខ​ហាង​មាន​ម្ហូប​អាហារ​ឆ្អិន​ស្រាប់​តាំងពីខ​ប្រហុក ត្រីកប់ កាពិ​ផៅ ក្ដាម​ប្រៃ ខមាំ ប្រហុក​គ្រឿង​អាំង ផ្អក​ចំហុយ ផ្អក​ចៀន កាពិបុក ម៉ាំ​ឆៅពោះ​វៀន​តាន់ ត្រីអាំង កង្កែប​បោប ជ្រក់​មមាញ ជ្រក់​សណ្ដែក សម្ល​ម្ជូរ​ពងត្រី ​សម្ល​កកូរ​ត្នោត និង​បន្លែ​អន្លក់​តាម​រដូវកាល​ប្រមាណា ៣០ មុខ។

ក្នុង​ចំណោម​ម្ហូប​ទាំង​នោះ​ សម្ល​ទំពាំង​ស្អំ​ខ្យង ត្រូវបាន​ចម្អិន​ដោយ​ប្រើ​បន្លែ​បៃតង។ ​ឯ​រសជាតិ​នៃ​សាច់​ខ្យង ជាមួយ​នឹង​ទំពាំង ​និងត្រី​ប្រហុក​នោះ ពិតជា​បង្កើន​រសជាតិ​សម្ល​កាន់​ត្រូវ​មាត់តែ​ម្ដង។ ​សម្លមាន​ប្រភព​មកពី​ទីជន​បទ​មួយនេះ​កាន់តែ​មាន​រសជាតិ​ឆ្ងាញ់​​ជាមួយ​ម្ទេស​ហឹរ។

ស្ថិត​នៅម្ដុំ​មេភ្លើង ជាប់​សាកល​វិទ្យាល័យ​ប៊ែលធី ​​ហាង មាតុ​ភូមិ អាច​ទំនាក់​ទំនង​តាម​ទូរស័ព្ទ​លេខ ០៩៧​ ៧៦ ៨៦ ៩៧៧៕

អត្ថបទគួរចាប់អារម្មណ៍