The Phnom Penh Post Search

Search form

Logo of Phnom Penh Post newspaper Phnom Penh Post - សម្ល​ប្រហើ​រ​កូនក្ដាមស្រែ​ពី​ហាង ម្ហូប




សម្ល​ប្រហើ​រ​កូនក្ដាមស្រែ​ពី​ហាង ម្ហូប

Content image - Phnom Penh Post
សម្ល​ប្រហើរ​កូន​ក្ដាមស្រែ​មានការ​តុបតែង​ចានអាហារ​ដ៏ស្អាត​​។ ហុង មិនា

សម្ល​ប្រហើ​រ​កូនក្ដាមស្រែ​ពី​ហាង ម្ហូប

សៀមរាប: ភោជនីយដ្ឋាន «ម្ហូប» នៅ​ខេត្ត​សៀមរាប ​គ្រាន់តែ​ឮ​ឈ្មោះ​ហាងបែបខ្មែរ​ដូច្នេះ​ធ្វើ​ឲ្យយើង​នឹក​ដល់​អាហារ​ឆ្ងាញ់ៗ។ ជា​ការ​ពិត​ណាស់ ហាង​នេះមិន​ត្រឹមតែ​មាន​បម្រើ​ម្ហូបខ្មែរ​នោះ​ទេ សូម្បី​តែ​ទីតាំង​ក៏ស្ថិតនៅ​សំណង់ផ្ទះបែប​ខ្មែរដែរ។

ម្ហូប​បែប​ខ្មែរ​ដែល​យើង​នឹងយក​មក​បង្ហាញ​ថ្ងៃ​នេះ​គឺ​សម្ល​ប្រហើរ​កូន​ក្ដាម​ស្រែ​ ដែល​មាន​គ្រឿង​ផ្សំ​ដូច​ជា ត្រី​ឆ្លាំង ក្ដាម​ស្រែ ស្លឹកម្ទេស ខ្ទឹមសដំ​ឲ្យបែក ​ខ្ជាយ ហាន់ជាសរសៃ ល្ពៅ​ចិតជាដុំៗតូច ត្រួយ​ល្ពៅ ស្លឹកផ្ទី ផ្សិត​ចំបើងពុះ​ជា​ពីរ​ ននោង​ចិតជា​ដុំ​តូចៗ​ ត្រឡាច​ចិតទទឹង​រាងបន្ទះ ស្នៀត​ពោត​ពុះ​ជា​ពីរ ជីរ​នាងវង ស្លឹកគ្រៃ ប្រហុក​ត្រី ​ស្ករស ទឹកត្រី ទឹកស៊ុបមាន់ និង​ម្សៅស៊ុប។ ​ជាដំបូងត្រូវ​យក​ត្រី​ឆ្លាំង​អាំង​ឲ្យ​ឆ្អិន រួច​យក​ទៅ​បុក​ជាមួយ​កូនក្ដាម។

បន្ទាប់មក​ត្រូវដាក់​ឆ្នាំងដាំទឹក​ឲ្យពុះ បន្ទាប់​មក​ចាក់​ទឹកស្ងោរស៊ុបចូល។ ពេល​ពុះម្ដង​ទៀត​ចាប់ផ្តើមជ្រំ​ប្រហុក បន្ថែម ទឹកត្រី ខ្ជាយ ខ្ទឹមស ស្លឹកគ្រៃ ស្ករស ម្សៅស៊ុប ត្រីបុក ជាមួយ​កូនក្ដាម ល្ពៅ រួចហើយ​គ្របទុក​ឲ្យល្ពៅរាងផុសបន្តិច។

នៅ​ពេល​ដែល​ទឹក​ពុះ​ហើយ​ល្ពៅ​ផុស​តិចៗ ត្រូវ​ដាក់​បន្លែ​ថែម​ត្រឡាច ននោង ស្នៀត​ពោត ផ្សិត​ចំបើង ត្រួយ​ល្ពៅ​ ផ្ទី ​កូនក្ដាម ​គ្រប​ទុក​ប្រហែលជា ៥ នាទី​។

ជាចុងក្រោយ​អ្នក​ត្រូវដាក់ ស្លឹក​ម្ទេស និងជីរ​នាងវង​ កូរ មួយ​ត្រឡប់​លើកចេញ​ជាការ​ស្រេច។

សម្ល​ប្រហើរ​កូនក្ដាមស្រែ​ មាន​បម្រើ​ជាមួយបាយ ក្នុង​តម្លៃ ១ ឈុត ៥ ដុល្លារ អាច​ញ៉ាំ​បាន​គ្នា​ពីរ​នាក់។

​​ភោជនីយដ្ឋាន ម្ហូប ក៏​មាន​បម្រើ​អាហារ​ឆ្ងាញ់ៗ​ជាច្រើន​ទៀត​ដូចជា ខ្យង​គ្រឿង​អប់​អំបិល ត្រី​ឆ្លាំង​អាំង​ម្រេចខ្ចី និង​ឡុក​ឡាក់​សាច់គោ​ក្រសាំងទាប ជាដើម។​

ភោជនីយដ្ឋាន​នេះ​ស្ថិត​នៅ​ផ្ទះ​លេខ ១៣៧ ភូមិត្រាំង ក្រុម ៣ ម្ដុំ​ផ្លូវ​តំបន់អភិរក្ស​អង្គរ ខេត្ត​សៀមរាប៕

អត្ថបទគួរចាប់អារម្មណ៍