The Phnom Penh Post Search

Search form

Logo of Phnom Penh Post newspaper Phnom Penh Post - សម្ល​ម្ជូរ​ស្រែ​កំពឹស​ ក្ដាម កូនត្រី​ពី​ហាង ធម្មជាតិ​ស្រះ​ស្រង់




សម្ល​ម្ជូរ​ស្រែ​កំពឹស​ ក្ដាម កូនត្រី​ពី​ហាង ធម្មជាតិ​ស្រះ​ស្រង់

Content image - Phnom Penh Post
សុម្ល​ម្ជូរ​ស្រែ​ដាក់​ម្ទេស​កាន់​តែច្រើន​កាន់តែ​ហឹរ​ឆ្ងាញ់ ហើយ​គេ​អាច​ទទួលទាន​ជាមួយ​បាយ​អង្ករ​សំរូប​។ ឈឹម ស្រីនាង

សម្ល​ម្ជូរ​ស្រែ​កំពឹស​ ក្ដាម កូនត្រី​ពី​ហាង ធម្មជាតិ​ស្រះ​ស្រង់

សៀមរាប: ភ្ញៀវ​ទេសចរ​ជាតិ និង​អន្តរជាតិ​ដែលធ្វើ​ដំណើរ​កម្សាន្ត​លម្ហែកាយ​នៅ​ទីក្រុង​សម្បូរ​ប្រាង្គ​ប្រាសាទ​ សៀមរាប​អង្គរ​ ក្រោយពី​ចំណាយ​ពេល​គយគន់​សំណង់​អច្ឆរិយៈ​ដ៏​រុងរឿង​ពី​បុរាណ​ពេញមួយ​ព្រឹកហើយ​នោះ ពួកគេ​ក៏អាច​ធ្វើ​ដំណើរ​ប្រមាណ​ជា ១៥ នាទី​មកកាន់​តំបន់ស្រះ​ស្រង់​ដើម្បី​ទទួលទាន​អាហារ​ថ្ងៃត្រង់​ ក្រោម​ជំនោរ​ខ្យល់​បក់​ត្រសៀក។

ស្ថិតនៅ​ភូមិ​ស្រះ​ស្រង់​ត្បូង សង្កាត់ នគរធំ ខេត្តសៀមរាប ភោជនីយដ្ឋាន លក្ខណៈ​គ្រួសារ​ឈ្មោះ​ថា «ធម្មជាតិ​ស្រះស្រង់​» បាន​ផ្ដល់​បរិយាកាស​បែបស្រុក​ស្រែចម្ការ​សម្រាប់​ភ្ញៀវ​ទេសចរ​ដែលចង់​ប្លែក​មាត់​ពីអាហារ​ទីក្រុង​មកភ្លក្ស​អាហារ​ជនបទ​ ដោយ​ជជែក​គ្នា​លេង​បណ្ដើរ​ គយគន់​ទេសភាព​តាម​មាត់ស្រះ​ ស្រង់ក្លិន​បុប្ផាព្រៃ​ដ៏​ក្រអូប​ប្រហើរ។

Content image - Phnom Penh Post
ភ្ញៀវ​ទេសចរ​អង្គុយ​ទទួល​ទាន​អាហារ​លើ​គ្រែ​ជាប់​មាត់​ស្រះ។

ភោជនីយ​ដ្ឋាន​នេះ​ក៏មាន​គោលបំណង​ណែនាំ​ឲ្យ​ភ្ញៀវ​ទេសចរ​បរទេស និង​អ្នកទីក្រុង​បាន​ស្គាល់​ម្ហូបស្រុក​ស្រែបែប​ធម្មជាតិ មិនមាន​ជាតិ​គីមី​ និង​ចម្អិន​ភ្លាមៗ​ផងដែរ។

ក្នុង​ចំណោម​ម្ហូប​នៅ​ភោជនីយ​ដ្ឋាន ធម្មជាតិ​ស្រះស្រង់​ ដូចជា ខ្យង​ស្ងោរ​ស្លឹក​ក្រូចសើច​ជ្រលក់​ទឹក​ប្រហុក ត្រី​ស្រែ​ដុត​ជ្រលក់​ជាមួយ​បុក​ក្រសាំង ឬ​អម្ពិល ខ្យងឆា​គ្រឿង និង​ម្ហូប​ដទៃ​ជា​ច្រើន​ទៀត មាន​តែម្ហូប​មាន់ដុត​ និង​សម្ល​ម្ជូរ​ស្រែកំពឹស​ ក្ដាម កូនត្រី ទេ​ដែលកុម្ម៉ង់​ឆាប់​បានញ៉ាំ ខណៈ​ម្ហូប​ដទៃ​ទៀត​ភ្ញៀវ​ត្រូវរង់​ចាំយូរ​បន្តិច​។​

Content image - Phnom Penh Post
ទេសភាព​ស្រុក​ស្រែ​នៅស្រះ​ស្រង់​មាន​ខ្យល់​អាកាស​បរិសុទ្ធ។ ឈឹម ស្រីនាង

សម្លម្ជូរ​ស្រែ​ មាន​គ្រឿង​ផ្សំដូច​ជា ត្រកួន ស្លឹក​អម្ពិល កូនត្រី កំពឹស ក្ដាម ខ្ទឹមស រំដេង ប្រហុក ម្រះព្រៅ អម្ពិល​ទុំ ម្ទេស អំបិល ស្ករស និង​ម្សៅស៊ុប។ ចំពោះ​វិធី​ធ្វើ​ដំបូង​ត្រូវដាំ​ទឹក​ឲ្យ​ពុះ រួច​បង់​រំដេង និងខ្ទឹមស​ (ដំបែក​តិចៗ) ចូល​ រួច​ដាក់​កូន​ត្រី កំពឹស និង​ក្ដាម។

ពេល​ទឹក​ពុះចាប់​ផ្ដើម​ជ្រុំប្រហុក​ និង​អម្ពិល​ទុំ រួច​បន្ថែម​គ្រឿង​ផ្សំ​រសជាតិ​ មាន​អំបិល និង​ម្សៅស៊ុប។​ ចុងក្រោយ​បង់​ម្រះពៅ ស្លឹក​អម្ពិល ​ត្រកួន និង​ម្ទេស​ជាការ​ស្រេច។ភោជនីយ​ដ្ឋាន ធម្មជាតិ​ស្រះស្រង់​ក៏មាន​ទទួល​រៀបចំ​ពិធី​ជប់​លៀង​ជួបជុំ​បងប្អូន ក្រុមគ្រួសារ មិត្ត​ភក្ដិ។ សម្រាប់​ភ្ញៀវ​ដែល​មិនចង់​រង់ចាំ​យូរ ពួកគេក៏​អាច​កុម្ម៉ង់​ម្ហូបទុក​ជាមុន​តាមរយៈ​លេខទូរស័ព្ទ ០១២ ៨៤៥​៦៧៣ និង ០១៦ ៨៤៥ ៦៧៣៕

អត្ថបទគួរចាប់អារម្មណ៍