The Phnom Penh Post Search

Search form

Logo of Phnom Penh Post newspaper Phnom Penh Post - សម្ល​ម្ជូរ​ស្រែ​ត្រកួន​កូនត្រី​ ខ្យង កំពឹស ក្ដាម​ពី​ ប៉ែន ចេង បាត់ដំបង​




សម្ល​ម្ជូរ​ស្រែ​ត្រកួន​កូនត្រី​ ខ្យង កំពឹស ក្ដាម​ពី​ ប៉ែន ចេង បាត់ដំបង​

Content image - Phnom Penh Post
សម្ល​ម្ជូរ​ស្រែ​ត្រកួន​កូនត្រី ខ្យង កំពឹស ក្ដាម​នៅហាង ប៉ែន ចេង​​​​។ វុទ្ធី

សម្ល​ម្ជូរ​ស្រែ​ត្រកួន​កូនត្រី​ ខ្យង កំពឹស ក្ដាម​ពី​ ប៉ែន ចេង បាត់ដំបង​

បាត់ដំបង: អ្នក​នៅ​ខេត្ដ​បាត់​ដំបង​ភាគ​ច្រើន​ស្គាល់​ឈ្មោះ​អាហារដ្ឋាន ប៉ែន ចេង ដែល​ស្ថិត​នៅក្នុង​សង្កាត់​ទួល​តា​ឯក ភូមិ​អូរតាគាំ ២ ម្ដុំ​ផ្សារ​រោង​ល្ខោន ក្រុង​បាត់ដំបង​។

ថ្វី​ដ្បិត​តែ​​ជា​ផ្ទះឈើ​ចំណាស់​ក៏ពិត​មែន ប៉ុន្តែ​រសជាតិ​ម្ហូប​អាហារ​នៅ​ទីនោះ បាន​ទាក់ទាញ​អ្នក​ដំណើរ​ឲ្យ​ចុះសំចត​ទទួលទាន​តាំង​ពី​វេលា​ព្រឹក​រហូត​ដល់​យប់​ម៉ោង ៩ តែ​ម្ដង។

ដើមឡើយ ​ប៉ែន​ ចេង ជា​ហាង​លក់​បាយ​មាន់​ល្បី​ក្នុង​ឆ្នាំ ១៩៨៤ មុននឹង​​ម្ចាស់​ហាង​បានបែក​គំនិត​លក់​ជា​បាយ​​ម្ហូបខ្មែរ​បន្ថែម​នៅអំឡុង​ឆ្នាំ ១៩៩៨។ នៅ​អាហារ​ដ្ឋាន​នេះ​ផ្ទាល់ ​អ្នកស្រី ស៊ុន ​ឆាយ​ណាន​ ​ជាម្ចាស់​ហាង គឺ​ចុងភៅ​ធ្វើម្ហូប​ដោយ​ខ្លួន​ឯង។ អ្នកស្រី​​ធ្លាប់​​រៀន​ធ្វើ​ម្ហូប​ខ្មែរជាច្រើន​មុខ​ពី​ចុងភៅ​វាំងជំនាន់​មុន។

អ្នកស្រី​ត្រូវបាន​បង្រៀន​ពី​វិជ្ជា​ផ្ទះបាយ​តាំង​ពី​របៀប​ជ្រើសរើស​បន្លែ​ និង​គ្រឿង​ផ្សំ​ពិសេសៗសម្រាប់​ចម្អិន​ម្ហូបខ្មែរ​ឲ្យ​មាន​​រស​ជាតិ​ឆ្ងាញ់​ប្លែក រហូត​បង្កើត​បាន​ជា​ហាង​ដែលមាន​ឈ្មោះ​បោះ​សំឡេង​នៅ​បាត់ដំបង​។

សម្រាប់​សម្លម្ជូរ​ស្រែ​ត្រកួន​នេះ មាន​គ្រឿង​ផ្សំ​ដូច​ជា កូន​ត្រី ខ្យង កំពឹស ក្ដាម ខ្ទឹមស រំដេង ប្រហុក ម្រះព្រៅ អម្ពិលទុំ ម្ទេស អំបិល ស្ករស និង​ម្សៅស៊ុប។ ចំពោះ​វិធី​ធ្វើ​ដំបូង​ត្រូវ​ដាំ​ទឹក​ឲ្យ​ពុះ រួច​បង់​រំដេង និង​ខ្ទឹម (ដំ​បែក​តិចៗ) ចូល​ រួច​ដាក់​កូន​ត្រី ខ្យង កំពឹស និង​ក្ដាម។

ពេល​ពុះ​ចាប់ផ្ដើម​ជ្រុំ​ប្រហុក​ និង​អម្ពិល​ទុំ រួច​បន្ថែម​គ្រឿង​ផ្សំ​រសជាតិ​ មាន​អំបិល និង​ម្សៅ​ស៊ុប។​ ចុងក្រោយ​បង់​ម្រះពៅ និង​ត្រកួន និង​ម្ទេស​ជាការ​ស្រេច៕

អត្ថបទគួរចាប់អារម្មណ៍